Կհաստակեցվեն հաճախորդի պատշաճ ուսումնասիրությանն առնչվող գործընթացները, ինքնության հետաձգված ստուգում իրականացնելու հիմքը եւ կարգը

Հայաստանի փողերի դեմ պայքարի ընդհանուր համակարգն այս պահին գնահատման փուլում է, եւ մենք կատարել ենք օրենսդրական դաշտի ամբողջական վերլուծություն՝ հասկանալու համար, թե լավագույն օրենսդրական ստանդարտներից ինչ շեղումներ կան: Այս մասին ասել է ՀՀ կենտրոնական բանկի նախագահի տեղակալ Արմեն Նուրբեկյանը՝ առաջին ընթերցմամբ քննարկման ներկայացնելով «Փողերի լվացման եւ ահաբեկչության ֆինանսավորման դեմ պայքարի մասին» եւ կից մի շարք օրենքներում փոփոխություններ եւ լրացումներ նախատեսող օրենսդրական փաթեթը: Այս մասին հայտնել են ԱԺ-ից:

Զեկուցողը տեղեկացրել է, որ Եվրոպայի խորհրդի ՄԱՆԻՎԱԼ հանձնախմբի այցը Հայաստան նախատեսվում է 2025 թվականի սեպտեմբերին: Կատարված վերլուծության արդյունքում ի հայտ են եկել տեխնիկական բնույթի խնդիրներ, որոնց լուծման նպատակով էլ Կառավարությունը հանդես է եկել համապատասխան օրենսդրական նախաձեռնությամբ:

Առաջարկվող փոփոխություններով եւ լրացումներով հստակեցվում են հաճախորդի պատշաճ ուսումնասիրությանն առնչվող գործընթացները, հաճախորդի ինքնության հետաձգված ստուգում իրականացնելու հիմքը եւ կարգը, ինչպես նաեւ ընդլայնվել են գործարքի կամ գործարքի հարաբերության մերժման հիմքերը: Նշվել է, որ փոփոխությունները վերաբերում են ԿԲ-ի եւ այլ իրավասու մարմինների համագործակցության կարգավորմանը, դրամական փոխանցումներ իրականացնող անձանց պարտականությունների փոփոխմանը, ոչ ֆինանսական հաստատություններին առնչվող կարգավորումներին:

Արմեն Նուրբեկյանն ընդգծել է, որ ընդլայնվել է օրենքով նախատեսված որոշ մեխանիզմների կարգավորման առարկան: Մասնավորապես, ռիսկերի գնահատման արդյունքները եւ ներքին իրավական ակտերի մշակմանն առնչվող կարգավորումները կծառայեն ոչ միայն փողերի լվացման եւ ահաբեկչության ֆինանսավորման, այլ նաեւ զանգվածային ոչնչացման զենքերի տարածման ֆինանսավորման դեմ պայքարի նպատակին:

Ներդրվել են պարտականություններ օտարերկրյա տրաստերի եւ համանման իրավաբանական կազմավորման կառավարիչների համար, հստակեցվել է «տրաստ» հասկացությունը, ամրագրվել են ահաբեկչության կամ զանգվածային ոչնչացման զենքի տարածման հետ կապված անձանց գույքի սառեցման դեպքերը: Նախատեսվել են նաեւ ֆինանսական հաստատությունների ղեկավարների, նշանակալից մասնակիցների, իրական շահառուների եւ նրանց փոխկապակցված անձանց անաղարտության պահանջներ:

Հանձնաժողովը դրական եզրակացություն է տվել օրենսդրական փաթեթին եւ առաջարկել դրա երկրորդ ընթերցմամբ քննարկումն անցկացնել առաջին ընթերցմամբ ընդունվելուց հետո` 24 ժամվա ընթացքում:

Հարցը քննարկվել է Ֆինանսավարկային եւ բյուջետային հարցերի մշտական հանձնաժողովի՝ հունիսի 13-ի արտահերթ նիստում: