Կառավարությունը մերժեց Առողջապահության նախարարությանը պահուստային ֆոնդից գումար հատկացնել

Կառավարության` սեպտեմբերի 27-ի նիստը վարում է ՀՀ առաջին փոխվարչապետ Արարատ Միրզոյանը: Վարչապետ Նիկոլ Փաշինյանը Հայաստանում չէ: Նիստի ժամանակ օրակարգում ընդգրկված չզեկուցվող հարցերից երեքը ՀՀ ֆինանսների նախարար Ատոմ Ջանջուղազյանի առաջարկով դարձան զեկուցվող: Դրանցից առաջինը վերաբերում էր Առողջապահության նախարարությանը ՀՀ կառավարության պահուստային ֆոնդից գումար հատկացնելուն:

Ջանջուղազյանը նշեց, որ գործող կարգավորումների համաձայն` այն դեպքում, երբ որևէ պետական մարմնի առաջնահերթությունների փոփոխության հարց է առաջանում, պահուստային ֆոնդից ոչ թե ուղիղ հատկացում է արվում, այլ պահուստային ֆոնդն ավելացվում է տվյալ պետական մարմնի կողմից իրականացվող ծրագրերի նվազեցման հաշվին, այլ կերպ ասած,  վերաբաշխում է կատարվում ոչ միայն առաջնահերթությունների, այլև բյուջեի մեջ: Նախարարի խոսքով` արտակարգ իրավիճակ տեղի չի ունեցել, որևէ խնդիր չի առաջացել, որն անհաղթահարելի ուժով է պայմանավորված, պարզապես հերթական ծրագիր կամ ծրագրի ինչ-որ մաս է իրականացվում պետական մարմնի կողմից, հետևաբար չի բացատրվում, թե ինչու պետք է հատկացվեն բոլորի արտակարգ իրավիճակների համար նախատեսված միջոցները: Նա առաջարկեց հարցը լուծել վերաբաշխման ճանապարհով:

ՀՀ առողջապահության փոխնախարար Սերգեյ Խաչատրյանը նշեց, որ անհաղթահարելի խնդիր է առաջացել. բեռներ են ուղարկվել մի կազմակերպության անվանումով, որը դադարեցրել է իր գործունեությունը մինչև տեղ հասնելը, դրանց՝ Փոթի նավահանգիստ հասնելու պահին այդ կազմակերպությունը գոյություն չի ունեցել, իրենք ստիպված են եղել մարդասիրական կենտրոնի կողմից նորից վերաձևակերպել բեռները Փոթիում, ինչն իրականում անհաղթահարելի է:

Արարատ Միրզոյանն արձագանքեց, թե այս հիմնավորմամբ հանդերձ չի բացատրվում միջոցների մասը, պարզ է` կազմակերպությունը լուծարվել է, խնդիրներ առաջացել են, նա ֆինանսների նախարարին խնդրեց տեսակետ հայտնել այս հարցի վերաբերյալ: Ջանջուղազյանը նշեց, որ ոչ մի կերպ չի կարողանում արտակարգ իրավիճակի սահմանման մեջ տեղավորել տեղի ունեցածը ու հենց դրանով է պայմանավորված իրենց առաջարկը:

«Մենք առիթ ունեցել ենք համոզվելու, որ մեր ունեցած պահուստային ֆոնդը չափազանց փոքր է, Աստված մի՛ արասցե, արտակարգ իրավիճակների դեպքերում ծագած խնդիրները լուծելու համար: Մեր առաջարկն այն է, որ մենք մեր ունեցած հնարավորություններն օգտագործենք առավելագույնս խնայողաբար և արդյունավետ»,- ասաց նա:

Միրզոյանը նշեց, որ կարծես թե առանձնապես մեծ գումարի մասին չեն խոսում, ուստի Առողջապահության նախարարությունը պետք է որ կարողանա իր բյուջեի սահմաններում լուծել այդ հարցը:

Փոխվարչապետ Տիգրան Ավինյանն էլ հավելեց.

«Խոսքն ընդամենը 13 միլիոն 587 հազար դրամի մասին է: Չեմ կարծում, որ Առողջապահության նախարարության բյուջեն որոշակի վերաբաշխման միջոցով այս գումարները չի կարող գեներացնել, հետևապես հենց ամենասկզբից զարմանալի է եղել, որ պահուստային ֆոնդից է պահանջվել: Մենք այլ նախարարություններում ունեցել ենք բազմաթիվ ծրագրեր` տասնյակ անգամ ավելի մեծ գումարներով, որ արվել են իրենց բյուջետային միջոցներով»:

Հարցը դրվեց քվեարկության, նախագիծը հաստատվեց Ատոմ Ջանջուղազյանի առաջարկած խմբագրված տարբերակով:

Առողջապահության նախարարության ներկայացրած նախագծի համաձայն` ամերիկահայ բարերար Մայք Սարյանի կողմից տրամադրված բժշկական սարքավորումների (թվով` 4 բեռնարկղ)` 01.06.2018թ. մինչև 29.08.2018թ. ժամանակահատվածում Փոթի նավահանգստում պահման և պահպանման, ինչպես նաև դրանց` Փոթի նավահանգստից Երևան տեղափոխման` «Ապավեն» սահմանափակ պատասխանատվությամբ ընկերության ծառայությունների ծախսերը Առողջապահության նախարարության «Մարդասիրական օգնության հանրապետական կենտրոն» պետական ոչ առևտրային կազմակերպության միջոցով փոխհատուցելու նպատակով Առողջապահության նախարարությանը 2018 թվականին պետք է հատկացվեր 13,587.0 հազ. դրամ՝ Հայաստանի Հանրապետության 2018 թվականի պետական բյուջեով նախատեսված Հայաստանի Հանրապետության կառավարության պահուստային ֆոնդի հաշվին (բյուջետային ծախսերի տնտեսագիտական դասակարգման «Ընթացիկ դրամաշնորհներ պետական և համայնքների ոչ առևտրային կազմակերպություններին» հոդվածով):