Երկու շաբաթ է` Մանթաշի ջրամբարից Արթիկի գյուղերին կասկածելի բաղադրության ջուր է հասնում

Շիրակի մարզում ոռոգման սեզոնին ջրի բացթողնման, ինչպես նաև տեղումների բացակայության պատճառով Մանթաշի ջրամբարում ջրի մակարդակը նվազել է, ինչն էլ անհետևանք չի մնացել, քանի որ հենց այս ջրամբարից է խմելու ջուր հասնում Արթիկի տարածաշրջանի տասնյակ գյուղերի: Ջրի ծավալը նվազելու հետևանքով տիղմը և այլ մանրէներ ջրի երես են դուրս եկել: Բաց ջրամբարով սպառողը ստանում է չմանրէազերծված ջուր, տասնյակ գյուղերի բնակիչներ բողոքում են ջրի որակից: Հիգիենիկ և հակահամաճարակային տեսչության մարզային կենտրոնի մասնագետները ստուգումներ են անցկացրել և հայտնաբերել են վտանգավոր շեղումներ:

Նահապետավան գյուղի բնակիչները երկու շաբաթից ավելի է՝ կասկածելի բաղադրության ջուր են խմում: Մանթաշի ջրամբարից եկող ջրից գյուղի մեծ մասն է օգտվում, նրանք էլ աղիքային տարբեր գանգատներով դիմել են հիվանդանոց, վստահ են, որ պատճառը հենց ջուրն է: Գյուղի բուժքրոջն ամեն օր մեկը դիմում է: Նա էլ չի բացառում, որ մեծերի ու փոքրերի մոտ առաջ եկած գանգատները Մանթաշի ջրի պատճառով են: Պետական հիգիենիկ և հակահամաճարակային տեսչության մարզային կենտրոնի մասնագետները եղել են գյուղում, կրկնակի լաբորատոր ստուգում են արել ու բացատրել, որ խմելու ջուրն իսկապես մաքուր չէ: Այսինքն` վիճակը գյուղերում կրկնվում է, երբ Մանթաշի ջրամբարում ջրի մակարդակն է իջնում: Նույն գյուղից չեն, բայց նույն գանգատներն ունեն հարևան Հառիճ գյուղում:

Պետական հիգիենիկ և հակահամաճարակային տեսչության Շիրակի մարզի տարածքային կենտրոնը յուրաքանչյուր երեք ամիսը մեկ ջրի որակի լաբորատոր ստուգումներ է անում, իսկ պարբերականությունը փոխվում է, երբ բողոքներ են ստանում: Այդպիսի բողոքներ հաճախակի են լինում Արթիկի տարածաշրջանի գյուղերից: 119 բնակավայրից մոտ 50 գյուղական համայնքներում ջրի վարակազերծման համար պատասխանատու են համայնքի ղեկավարները, իսկ մյուսներում «Վեոլիա ջուր» ընկերությունը: Արթիկի տարածաշրջանի տասնյակ գյուղերում լաբորատոր ստուգումները պարզում են, որ քլորացում չի էլ եղել: Սպառողին անորակ ջուրն օգտագործելն արգելելու լիազորություն ունեն համայնքի ղեկավարները, բայց սովորաբար դա չի էլ լինում, իսկ պատճառն ու հետևանքները գալիս են Մանթաշի ջրամբարի աղտոտվածությունից: Խնդիրը ոչ թե մի քանի, այլ տասնյակ տարիներով մնում է անլուծելի: Ոռոգման, նաև խմելու նպատակներով օգտագործվող ջրամբարից բաց եղանակով սպառողին հասնում է առանց մանրէազերծման, ընդամենը քլորացված ջուր: