ՀՀԿ-ն առաջնորդվեց իշխանություններին թեկուզ փոքրիկ վնաս տալու ճանապարհով. քաղաքագետ

Ընտրական օրենսգրքում փոփոխություններ կատարելու նախագիծն այսօր խորհրդարանը չընդունեց: SHANTNEWS.am-ը քաղաքագետ Արմեն Բաղդասարյանից հետաքրքրվեց` ի՞նչ զարգացումներ, ի՞նչ իրադարձություններ կհաջորդեն այս քայլին: Քաղաքագետը նշեց, որ որևէ իրադարձություն չի կանխատեսում:

«Ամենայն հավանականությամբ, արտահերթ ընտրությունները կանցկացվեն հին, այսինքն՝ այսօր գործող օրենքով, ինչը ցանկալի չէ, որովհետև քաղաքական գրեթե բոլոր ուժերի գնահատմամբ` առաջարկվող փոփոխություններն առաջընթաց էին, բայց, ցավոք սրտի, ՀՀԿ-ն գերադասեց տորպեդահարել, առաջնորդվեց իշխանություններին թեկուզ փոքրիկ վնաս տալու ճանապարհով` ի վնաս պետության: Ինչ-որ ճնշումներ չեմ կանխատեսում, պարզապես ընտրությունները կանցնեն գործող օրենքով, և դա ընտրությունների վերջնական արդյունքի վրա, կարծում եմ, առանձնապես ազդեցություն չի ունենա»,- ասաց նա:

Հարցին` արդյո՞ք դա ՀՀԿ-ին վերարտադրվելու հնարավորություն չի տա, Բաղդասարյանը պատասխանեց, որ հին օրենսգրքով ընտրությունների անցկացման պարագայում ՀՀԿ-ի շանսերը գուցե ավելին են, որովհետև եթե միայն համամասնական ընտրակարգով լիներ, ինչպես առաջարկվում էր, ՀՀԿ-ն բացարձակապես շանս չէր ունենա հաղթահարելու անցողիկ շեմը, իսկ այսպես երևի հույս ունեն, որ եթե ռեյտինգային ընտրակարգը պահպանվի, դեռևս իրենց հավատարիմ մնացած մեծահարուստներով, հեղինակությունների միջոցով գուցե հաղթահարեն անցողիկ շեմը:

«Չեմ կարծում, թե կստացվի, որովհետև չեմ կարծում, թե նրանք կհամարձակվեն գործել հին մեթոդներով, այսինքն` ճնշումներ, ընտրակաշառք և այլն»,- նշեց քաղաքագետը:

Բաղդասարյանը նաև ընդգծեց` այս նախագծի տապալումը մի քիչ էլ ուժի ցուցադրություն էր ՀՀԿ-ի կողմից, նրանք ցանկացան ասել, որ իրենք դեռևս քաղաքական դաշտում գոյություն ունեն, դեռևս ինչ-որ լծակներ ունեն, պետք չէ իրենց վերջնականապես խաղից դուրս թողնել:

«Իրենք ցույց տվեցին, որ ցանկության դեպքում կարող են փայտ խրել իշխանությունների սայլի անիվի մեջ, սակայն չեմ կարծում, թե դա նրանց որևէ օգուտ կտա»,- ասաց Բաղդասարյանը:

Անդրադառնալով ֆեյսբուքյան առանձին խմբերի հայտարարությանը, որ պատրաստվում են գնալ ԱԺ, հարցին` հնարավո՞ր է դարձյալ փողոցային պայքարի դիմեն, արդյո՞ք այդ դեպքում վարչապետի պաշտոնակատարը կամ իր թիմակիցներից որևէ մեկը կմիանա այդ պայքարին, քաղաքագետը պատասխանեց, որ դրա մեջ առանձնապես իմաստ չի տեսնում:

«Ամեն դեպքում, էլի եմ ասում, անգամ հին ընտրակարգով ընտրությունների դեպքում արդյունքներն էապես չեն տարբերվելու այն արդյունքներից, որ կլինեին նորի դեպքում, բացի այդ, ցանկալի չէ, որ Ընտրական օրենսգրքի փոփոխություններն այդպիսի ուղղակի ճնշման տակ անցկացվեն: Լավ կլիներ, եթե ՀՀԿ-ն ուղղակի չգնար այդ քայլին, այդ փոքրիկ սաբոտաժին, բայց դե հիմա, եթե եղել է, դա չի նշանակում, թե ամեն այսպիսի առիթով կառավարությունը պետք է ցույց տա իր համաժողովրդական ուժը: Այդպես չէ, չի կարելի ամեն անգամ թնդանոթով կրակել ճնճղուկի վրա»,- նշեց նա: