Գյումրիի «Տեքստիլ» կոմբինատի նախկին հանրակացարանի սեփականատերը դատարանով պահանջում է վտարել շենքում բնակվող 3 տարեցներին

Գյումրիի «Տեքստիլ» կոմբինատի նախկին հանրակացարանի շենքում մնացած երեք տարեց կանանց տարածքից վտարելու որոշում է կայացվել։ Երեք ամիս առաջ է շենքի սեփականատերը հարցը վիճարկել դատարանում։ Հարցը լուծվել է հօգուտ նրա: Այս մասին հայտնում է SHANTNEWS.am-ի թղթակիցը:

Միայնակ տարեց բնակիչներն էլ իրենց հերթին են վճիռը բողոքարկել դատարանում ու բնակարանի պահանջ են ներկայացրել, թեև մինչ այդ բնակապահովման բոլոր առաջարկները մերժել են:

Անցած տարի դեկտեմբերին հանրակացարանում գրանցված հերթական փլուզումից հետո քաղաքապետարանը սեփականատիրոջը ներկայացրեց շենքը քանդելու պահանջ ու ժամկետ, որը լրանում է 2019-ի փետրվարին: Շենքի սեփականատերը Ենոք Սարգսյանն է, որը Գյումրիում չի էլ ապրում: Իսկ դատարանի վճիռը կարևոր հիմք է շենքի ապամոնտաժումը սկսելու համար: Սակայն երեք բնակիչներին վթարային շենքից հարկադրաբար դուրս հանել սեփականատերը չի կարող: Ենոք Սարգսյանը «Տեքստիլ» կոմբինատի նախկին տնօրեն Հունան Ավետիսյանից շենքը գնել էր 2005 թվականին՝ սեփականության վկայականով, սակայն մի մասի սեփականատերն է հանդիսանում: 13 տարի առաջ առևտրի կենտրոն կառուցելու ծրագիր է ունեցել։

Երեք տարեց բնակիչները սեփականատեր Ենոք Սարգսյանին առաջին անգամ տեսել են միայն մեկ դատական նիստի ժամանակ, չեն ճանաչում նաև այն տասը ենթադրյալ սեփականատերերին, որոնց անունները թվարկվել են: Վճիռը բողոքարկած երեք տարեցների շահերի պաշտպանը հիմնավոր չի համարում հօգուտ սեփականատիրոջ կայացրած դատավճիռը: Ըստ փաստաբանի՝ վտարման  որոշում կայացնելուց առաջ պետք էր լուծել նրանց բնակության հարցը։

Շենքի սեփականատեր Ենոք Սարգսյանը մեզ հետ զրույցում նշեց, որ երեք ամիս առաջ Գյումրիում՝ դատարանում է բնակիչների հետ հանդիպել ու խոսել: Նրանց առաջարկել է բնակության տարբերակ, բայց դրանից էլ են հրաժարվել:

Շենքում տեղի ունեցած փլուզումներից հետո իշխանությունների երբևէ եղած բոլոր առաջարկները բնակիչները մերժել են։ Սպասելի էր, որ սեփականատիրոջ՝ այն էլ ժամանակավոր լուծման տարբերակը նույն բախտին էր արժանանալու: Այլ տարբերակ առաջարկել, օրինակ՝ բնակարան գնել երեքի համար, սեփականատերը չի պատրաստվում:

Բնակության տեղի լուծման առաջարկներն ու տարբերակները նախկին իշխանություններն էլ արել են։ 30 տարի շարունակ՝ ամեն անգամ գրանցված փլուզումներից հետո, փորձել են բնակիչների տան հարցը լուծել։ Վերջապես այս տարի 9 ընտանիք համաձայնեց դուրս գալ խիստ վտանգավոր շենքից:

Երեք բնակիչներին, որոնք դեռ շարունակում են հրաժարվել, քաղաքապետարանը կրկին առաջարկում է սոցիալական բնակարանի վիճակահանությանը մասնակցել։