Հեղափոխությունը փոփոխությունների հույս է տվել նաև ցմահ դատապարտյալ Մհեր Ենոքյանին

Ցմահ դատապարտյալ Մհեր Ենոքյանն ասել է, որ իրավաբանի մասնագիտությունն ընտրելու հարցում իր վրա մեծ ազդեցություն է ունեցել մարդու իրավունքների  նախկին պաշտպան Լարիսա Ալավերդյանը։

«Ինձ ասել են, որ եթե փորձես իրավաբան դառնալ, կարող ես խնդիրներ ունենալ գողական աշխարհի հետ: Ես դասախոսություն չեմ լսել, բանտում նստած չես լսում դասախոսություն, և ինֆորմացիան ականջների միջոցով չի գնում, ես աչքերի միջոցով եմ այն ստացել»:

Հարցին՝ մագիստրատուրա կընդունվե՞ք, Ենոքյանը պատասխանել է՝ անպայման, բայց մի փոքր դադար կվերցնի գործի վերաբացման համար: 

«Երբ նայում եմ հեռուստացույց, տեսնում եմ, որ ամեն քաղաքացի ուզում է, որ Փաշինյանը հենց իր խնդրին լուծում տա, բայց ես հորդորում եմ մեր քաղաքացիներին համբերատար լինել, ես ինքս փորձում եմ այդպես անել»,- հավելել է Ենոքյանը:

SHANTNEWS.am-ն արդեն հայտնել է, որ «Նուբարաշեն» ՔԿՀ-ում այսօր ցմահ դատապարտյալ Մհեր Ենոքյանի դիպլոմայինի պաշտպանությունն է: Ենոքյանն ավարտում է Հայ-ռուսական համալսարանի իրավագիտության ֆակուլտետը։ Նշվում է, որ առաջին դեպքն է ոչ միայն Հայաստանում, այլև հետխորհրդային երկրներում, երբ ցմահ բանտարկյալը իրավաբան է դառնում: Ենոքյանը դիպլոմային աշխատանքը պաշտպանում է «Օրինական ուժի մեջ մտած դատավճիռների վերանայումը. տեսական և պրակտիկ խնդիրներ» թեմայով: Ենոքյանն ասել է, որ այս ամենն անում է իր գործի վերաբացման համար: Հայտնի է, որ Ենոքյանը 3 անգամ Վճռաբեկ դատարան է դիմել գործի վերաբացման համար, 3 անգամ էլ մերժվել է: Նա իր աշխատանքում Քրեական դատավարությունում օրենսդրական փոփոխություններ կատարելու առաջարկներ է արել:

Հիշեցնենք, որ 1996թ. նոյեմբերի 29-ին Երևանի բժշկական ինստիտուտի երրորդ կուրսի ուսանող, քսանամյա Մհեր Ենոքյանը  դատապարտվել է համակուրսեցուն՝ Իոսիֆ Աղաջանովին սպանելու մեղադրանքով: Ըստ մեղադրանքի՝ հանցագործությունը կատարվել է ընկերոջ՝ գյուղատնտեսական ինստիտուտի ուսանող Արամ Հարությունյանի հետ վերջինիս տանը: Մհեր Ենոքյանն իրեն մեղավոր չի ճանաչում՝ պնդում է, որ պարզապես վկա է եղել այդ հանցագործությանը, որը կանխարգելել չի կարողացել: Ենոքյանը նախ դատապարտվել է մահապատժի, որը ցմահ բանտարկության է փոխվել 2003 թվականին, երբ մահապատիժն արգելվեց Հայաստանում: Մհեր Ենոքյանի ընկերը՝  Արամ Հարությունյանը, որն իրեն մեղավոր է ճանաչել, ստացել է տասնհինգ տարվա ազատազրկում: Նա ազատության մեջ է 2011 թվականից՝ պատիժն ամբողջությամբ կրելուց հետո: 

Մհեր Ենոքյանը մի քանի գրքի և բազմաթիվ թարգմանությունների հեղինակ է: