2019 թ. բյուջեով պաշտպանության և ՊՆ բյուջետային հատկացումներն ավելացել են. Կորյուն Նահապետյան

ՀՀ ԱԺ պաշտպանության և անվտանգության հանձնաժողովի նախագահ Կորյուն Նահապետյանը նոյեմբերի 13-ին խորհրդարանում ելույթ ունենալով` նշեց, որ արտասովոր պայմաններում են քննարկում 2019 թ. պետբյուջեի նախագիծը, սակայն արձակված ԱԺ-ն իր սահմանադրական պատասխանատվության շրջանակում պարտավոր է քննարկել երկրի համար կարևորագույն այս փաստաթուղթը: Նահապետյանը կարևորեց այն, որ կա կամք և պատրաստակամություն` ընդունելու այս կարևոր փաստաթուղթը: Նա բարձրաձայնեց որոշ մտահոգություններ՝ պետական և ծառայողական գաղտնիք պարունակող ծախսերի հիմնավորվածության վերաբերյալ:

«2019 թ. մեր երկրի համար լինելու է բավական պատասխանատու տարի, նկատի ունեմ հատկապես անվտանգային միջավայրի և ռազմաքաղաքական իրադրության տեսակետից, որովհետև բոլորիս համար հայտնի է, որ կան բազմաթիվ մարտահրավերներ և սպառնալիքներ, և դրանց մի մասը վերաբերում է նաև մեր երկրի անվտանգությանը և պաշտպանությանը: Բյուջետային քաղաքականությունը պետք է համահունչ լինի այն հիմնական մարտահրավերներին և սպառնալիքներին, որոնք կարող են առաջանալ տարվա ընթացքում»,- ասաց նա:

Նահապետյանն ասաց, որ կարևոր է մարտահրավերների և սպառնալիքների ճշգրիտ գնահատումն ու դրանց հակազդելու իրական միջոցառումների իրականացումը, ինչը պահանջում է պատշաճ բյուջետային քաղաքականություն: 2019 թ. բյուջեի նախագծով պաշտպանության ոլորտի հատկացումներն ավելացել են` պաշտպանության ոլորտի համար 65 մլրդ դրամով, Պաշտպանության նախարարության համար` 30 մլրդ դրամով: Նահապետյանը նշեց, որ պաշտպանության ոլորտի առումով բյուջետային հատկացումները կազմում են ընդհանուր բյուջեի 20, ՀՆԱ` 4 տոկոսը: Հանձնաժողովի նախագահն ասաց, որ պաշտպանության նախարարի հետ փակ քննարկման ժամանակ անդրադարձել են նաև այն միջոցներին, որոնք, ըստ առանձին ծախսային ուղղությունների, ուղղված են լինելու այս ոլորտում արդյունավետ քաղաքականություն իրականացնելուն:

«Այդուհանդերձ, բազմաթիվ ծրագրեր և ծրագրային միջոցառումներ, որոնք գերակայություն են կազմում, իրականացնելու համար պահանջվում են ավելի շատ միջոցներ, հնարավոր ռազմական գործողությունների սկսման հետևանքով հնարավոր են նաև վերաբաշխումներ: Մենք պետք է միշտ պատրաստ լինենք հնարավոր հաջորդ պատերազմին, ինչը պահանջում է բավարար բյուջետային հատկացումներ»,- ասաց նա:

Հանձնաժողովի նախագահը ներկայացրեց, թե ծախսային ի՞ նչ ուղղություններով են ավելացել բյուջետային հատկացումները: Առաջին հիմնական ուղղությունը սպառազինության և ռազմական տեխնիկայի միջոցների ձեռքբերումն է, հիմնանորոգումը և տեխնիկական սպասարկումը. այստեղ ավելացումներն ուղղված են հրթիռահրետանային, ՀՕՊ և ռազմական կարիքներին և այլ միջոցներին: Նահապետյանի խոսքով` ՌԴ-ի հետ կնքած պետական արտահանման վարկային համաձայնագրի շրջանակներում ավելանալու են մեր հրթիռային կարողությունները, հայրենական ռազմաարդյունաբերության ոլորտում ծրագրվել են մի շարք հավակնոտ ծրագրեր, որոնց իրագործումն ընդլայնելու է մեր ԶՈւ կրակային հնարավորությունները, ուշադրության կենտրոնում են պահվելու ԶՈւ կառուցվածքի կատարելագործումը, զինվորական ծառայության կազմակերպումը և ակտիվ պահեստազորային համակարգի ներդրումը: Որոշակի միջոցներ են իրականացնելու առաջնագծում զինվորական ծառայություն անցնող զինծառայողների դրամական, բնակարանային ապահովման և ռազմաբժշկական ոլորտի զարգացմանը:

Խնդիրների մասին խոսելով` Նահապետյանը նշեց, որ պետբյուջեի մասին օրենքում պաշտպանության ոլորտի գերակայությունների, առաջնահերթությունների և դրանցից բխող միջոցառումների հստակ ամրագրման խնդիր. այս ոլորտի գերակայությունները և առաջնահերթություններն ամրագրված չեն պետբյուջեի մասին նախագծում: Նա հիշեցրեց` 2019 թ-ից սկսած` պետբյուջեն պետք է ներկայացվի ամբողջապես ծրագրային բաղադրիչով, դա վերաբերելու է բոլոր ոլորտներին, այդ թվում` պաշտպանության և անվտանգության ոլորտներին, և այստեղ, ըստ Նահապետյանի, ոչ մի բացառություն պետք է ընդունելի չհամարել, քանի որ եթե չկան մշակված արդյունքային ցուցանիշներ, չի կարող լինել նաև գնահատական: Նա կոչ արեց կառավարությանը` հաշվի առնել այս մոտեցումը, և հաջորդ տարվանից սկսած` պետբյուջեի նախագիծը կազմակերպելիս որևէ բացառություն չնախատեսել: