Մեր իշխանությունը, որ լավը լիներ, նստած կլինեի ձեր տեղը, դուք կքննադատեիք. Շարմազանով

ԱԺ փոխխոսնակ Էդուարդ Շարմազանովը նոյեմբերի 13-ին ԱԺ ամբիոնից 2019թ. բյուջեի նախագծի վերաբերյալ քաղաքական շեշտադրումներով հանդես եկավ:

Նա ասաց, որ երբ իշխանության ներկայացուցիչ էր, ներկայացնում էր պետբյուջեի դրական կետերը, այսօր, իբրև ընդդիմադիր, չգրված օրենքով պետք է ներկայացնի բացասականը՝ ուղղելու, ոչ թե խանգարելու միտումով:

«Ապրիլ-մայիսին Հայաստանում տեղի ունեցան քաղաքական զարգացումներ, ապագա պատմաբանների խնդիրն է՝ դա հեղափոխությո՞ւն էր, իշխանափոխությո՞ւն, թե՞ իշխանազավթում, և դրա պատճառներից մեկը ժողովրդի չբավարարված սպասումներն էին՝ տնտեսական աճի, աշխատատեղերի, արդարության հետ կապված: Հեղաշրջումից կամ իշխանափոխությունից հետո նոր կառավարությունից սպասումները չափազանց շատ են, որովհետև հեղափոխության լիդերները բարձր պլանկա էին դրել՝ թռիչքային զարգացում, Հայաստանում աղքատներ չեն լինելու»,- ասաց նա:

Շարմազանովը շեշտեց, որ ներկայացվող բյուջեն իներցիոն չէ, իներցիոն էր 2018թ. բյուջեն, քանի որ դա իրենց կառավարության օրոք է ընդունվել, իսկ վարչապետի պաշտոնակատար Նիկոլ Փաշինյանը ստիպված էր աշխատել նախկին վարչապետ Կարեն Կարապետյանի ներկայացրած և Հանրապետական մեծամասնության ընդունած բյուջեով: ԱԺ փոխխոսնակը շեշտեց՝ սա այն բյուջեն է, որը բերել է նոր իշխանությունը, որի պատասխանատուն նրանց քաղաքական ուժն է և վարչապետը:

Շարմազանովը հարց ուղղեց՝ արդյո՞ք ներկայացված բյուջեում տրված են մտահոգիչ հարցերի պատասխանները, ի վերջո, ժողովուրդը հաջորդ տարի ավելի լա՞վ է ապրելու, թե՞ վատ: Նա հիշեցրեց՝ այդ մարդիկ հրապարակ գնացել են նաև այն պատճառով, որ վատ էին ապրում, մինչդեռ այժմ ֆինանսների նախարարն ավելի քիչ աճ է խոստանում: ԱԺ փոխխոսնակը հռետորական հարցով դիմեց կառավարությանը՝ 6․5 տոկոս տնտեսական աճո՞վ են լավ ապրում, թե՞ 4․9 տոկոսով:

«Ասում էիք՝ միլիոնավոր դոլարներով բյուջեն կավելացնեք, բա ո՞ւր է: Ասում էիք՝ ստվեր կա, բա ո՞ւր է: Ես չեմ ասում՝ ստվեր չի եղել, դուք ասում եք՝ եղել է, ես էլ, որպես ընդդիմություն, ասում եմ՝ բա ինչո՞ւ գրած չէ, ո՞ւր է էդ ստվերը»,- ասաց նա:

Շարմազանովը նշեց, որ կա թե՛ ներդրումների, թե՛ արտահանման ծավալների անկում, իսկ վերջին օրերին էլ «իմացան, որ հեղափոխական Հայաստանում հնարավոր է էվոլյուցիոն օպտիմալացում»: ԱԺ փոխխոսնակի գնահատմամբ՝ կառավարության արածը շատ դեպքերում հակասում է իր իսկ լիդերի հռչակած սկզբունքներին:

«Երբ մենք էինք իշխանության, ասում էինք, որ, այո՛, անհնար է խուսափել օպտիմալացումից, մեծ, հեղափոխական տնտեսական աճ ապահովել, կտրուկ՝ 800 մլն դոլարով ավելացնել բյուջեն, դուք ասում եք՝ չէ, անհնար չէ: Բայց դուք նաև այդ լոզունգներով եք եկել իշխանության»,- հիշեցրեց նա:

Բյուջեի բովանդակային մասին անդրադառնալով՝ Շարմազանովը կարևոր թիրախներն առանձնացրեց: Նա ընդգծեց՝ Հայաստանի թիվ մեկ խնդիրը ոչ թե կոռուպցիայի դեմ պայքարն է, որը կարևոր է, սակայն, որը չի կարելի իրականացնել ասֆալտին փռելով, այլ քաղաքական կամքով ու հետևողական ու շարունակական օրենսդրական բարեփոխումներով: Շարմազանովը կարևորեց ժողովրդավարության ու բազմակարծության ապահովումը, մարդու իրավունքների պաշտպանությունը: Նրա խոսքով՝ ՀՀ քաղաքացիները բոլորը օրենքի առաջ պիտի լինեն հավասար՝ անկախ նրանից՝ ի՞ր կողմնակիցներն են, թե՞ Փաշինյանի:

«Իհարկե, Հայաստանի համար թիվ մեկ խնդիրը անվտանգությունն է, դա ասելիս միայն տեսանելի հակառակորդը նկատի չունեմ, այլ այն վատ երևույթները, որոնք կան»,- ասաց նա, ապա դիմեց ԿԳ նախարարին՝ ասելով, որ չի տեսնում հայագիտության բլոկը՝ որպես ռազմավարական բլոկ:

«Գուցե մեր իշխանության ժամանակ էլ չի եղել, բայց մեր իշխանությունը, որ լավը լիներ, էսօր ես նստած կլինեի ձեր տեղը, դուք էլ ինձ կքննադատեիք»,- նշեց Շարմազանովը:

Նա նաև ասաց՝ այսօր գործը հասել է նրան, որ Ալիևն ասում է՝ Երևանը իմ հողն է, Ղարաբաղը իմ հողն է, մենք էլ սպասում ենք՝ մի Շարմազանով կպատասխանի կամ չի պատասխանի:

«Մեզ թվում է՝ բոլորը գիտեն, որ մենք Հայկ Նահապետից ենք սերել»,- ասաց նա:

ԿԳ նախարարին դիմելով՝ Շարմազանովը նաև շեշտեց «Հայ եկեղեցու պատմություն» առարկայի կարևորությունը, ասաց, որ այն պարտադիր պետք է դասավանդվի, ժամերն էլ պետք է ավելացվեն: