Կուսակցություններն իրավականորեն պաշտպանված են. Տիգրան Մուկուչյան

Ներկա պահին հրապարակված ցուցակում քաղաքական ուժերի հերթականությունը պայմանական է, քանի որ հետագայում հիմնական հերթականությունը որոշվելու է վիճակահանությամբ: Այս մասին «Շանթ» հեռուստաընկերության «Հեռանկար» վերլուծական հաղորդաշարի ընթացքում հայտարարել է ԿԸՀ նախագահ Տիգրան Մուկուչյանը՝ պատասխանելով այն հարցին, թե հրապարակված ցուցակների շարքում ինչու է «Իմ քայլ»-ն առաջին տեղում:

«Այս փուլում մենք ընդամենը ստացել ենք փաստաթղթեր, և կայքում դեռևս հրապարակված է տեղեկատվություն, թե ովքեր են ներկայացրել իրենց փաստաթղթերը: Բացառապես հերթականությունը պայմանական է, որովհետև դրանից հետո դեռ տեղի է ունենալու գրանցման գործընթաց, այնուհետև դրանից հետո տեղի է ունենալու համարների բաշխման գործընթաց: Այսինքն` այստեղ որևէ խնդիր այդ առումով առկա չէ»,- ասել է Տիգրան Մուկուչյանը:

Հարցին, թե տարածքային ընտրատեղամասերում առաջադրված թեկնածուն հրաժարվի մասնակցել ընտրություններին, արդյո՞ք քաղաքական ուժն իրավունք ունի նրան փոխարինել մեկ այլ ներկայացուցչով՝ Տիգրան Մուկուչյանը պատասխանել է, որ մեկ կամ երկու անձի հետ կապված ինչ-ինչ խնդիրները կուսակցության գրանցումն ուժը կորցրած ճանաչելու կամ գրանցումը մերժելու հիմք չեն լինելու:

«Այս պահին այդ ցուցակները, երբ արդեն մենք մտնում ենք գրանցման փուլ, դրանց հետ կապված փոփոխությունների հնարավորություն օրենքը չի նախատեսում, սակայն օրենքը նախատեսում է մեխանիզմներ, որ, եթե, օրինակ՝ ինչ-ինչ պատճառներով, ասեք որևէ մեկ տարածքում, ենթադրենք, ինչ-որ մեկ անձի հետ առաջանում է գրանցման խնդիր, ապա այդ անհամապատասխանությունը, եթե առաջանում է առաջադրման փաստաթղթերը ներկայացնելուց հետո, օրենսդրությունն ամրագրել է, որ օրինակ՝ մեկ-երկու անձի նման փոփոխությունները չեն կարող հիմք լինել գրանցումը մերժելու»,- ասել է ԿԸՀ նախագահը:

Նա ասել է, որ փոխարինում, որպես այդպիսին, նախատեսված չէ: Օրենսդրությունը նման դեպքերի համար նախատեսել է այնպիսի մեխանիզմներ, որոնք թույլ են տալիս պահպանել քաղաքական ուժի գրանցման ու ընտրությունների մասնակցության հնարավորությունը:

«Օրինակ՝ տարածքային ընտրացուցակի համար նախատեսված է 5 թեկնածու: Եթե առաջադրման փաստաթղթերը ներկայացնելուց հետո, օրինակ՝ թեկնածուներից մեկն ինչ-ինչ պատճառներով, դուրս է գալիս ընտրապայքարից, որպեսզի դա  չանդրադառնա կուսակցության գրանցումն ուժը կորցրած ճանաչելու վրա: Հակառակ պարագայում, իհարկե, կլիներ շատ անտրամաբանական, որովհետև կուսակցությունները շատ դեպքերում ներկայացնում են նվազագույն թվով, օրինակ՝ թեկնածուներ այս կամ այն տարածքում, և ցանկացած մեկ թեկնածուի, օրինակ՝ հնարավոր ինքնաբացարկը և այլն, եթե ունենար ազդեցություն, ապա կարծում եմ, որ դա կլիներ խիստ անողջամիտ մոտեցում, որովհետև ցանկացած պարագայում մի ամբողջ կուսակցության ճակատագիր է՝ ընտրությունների մասնակցության, կդրվեր կախման մեջ՝ այս կամ այն թեկնածուի հնարավոր վարքագծից»,- ասել է նա:

Նա հայտարարել է, որ օրենսդրության կանոնակարգումները կառուցողական են, և կուսակցություններն այս դեպքում ունեն իրավական «բավականին լայն պաշտպանվածություն»: