ՀԿԵ-ն գերիշխող դիրքի չարաշահման համար տուգանվեց 30 մլն դրամով

Այսօր՝ նոյեմբերի 21-ին, «Հարավկովկասյան երկաթուղի» ընկերությունը գերիշխող դիրքը չարաշահելու համար ՏՄՊՊՀ-ի որոշմամբ տուգանվեց 30 մլն դրամով: «Հարավկովկասյան երկաթուղին» փաստացի խոչընդոտել է «ԱՄ գրուպ» ընկերության գործունեությանը՝ պատճառելով ֆինանսական մեծ վնասներ:

ՀՀ Տնտեսական մրցակցության պաշտպանության պետական հանձնաժողովին դիմում-բողոք է ներկայացրել «ԱՄ գրուպ» ընկերությունը: Ըստ բողոքի՝ «Հարավկովկասյան երկաթուղին» չարաշահում է իր մենաշնորհային դիրքը, ինչի հետևանքով ֆինանսական լուրջ վնաս է պատճառվել ընկերությանը և խաթարվել դրա բնականոն գործունեությունը:

Խնդիրն այն է, որ «ԱՄ գրուպ» ընկերությունը «Հարավկովկասյան երկաթուղուց» ձեռք է բերել 40 երկաթուղային վագոն` դրանք հետագայում վերանորոգելու և Վրաստանում վերավաճառելու նպատակով, սակայն արդեն մի քանի տարի է, ինչ երկաթուղին հրաժարվում է իրականացնել թե՛ դրանց վերանորոգումը և թե՛ փոխադրումը՝ վագոնները փաստացի պահելով իր տիրապետության տակ:

«Քանի որ ՀՀ տարածքում երկաթուղային փոխադրում իրականացնող այլ ընկերություն չկա, հետևապես «ԱՄ գրուպը» իր տնտեսական գործունեությունը իրականացնելու համար այլընտրանք չի ունեցել, այսինքն՝ վագոնները այլ կերպ և այլ ճանապարհով Վրաստան տեղափոխումը պարզապես անհնար է:
Տեսնելով, որ տարեցտարի վագոնների կանգնած մնալու հետևանքով իմ գործունեության վնասն ավելի է մեծանում, խնդրել եմ դրանք տեղափոխել առանց վերանորոգման, որից հետո ՀԿԷ-ն պատասխանել է, որ իրեն պետք է ընդհանուր առմամբ 150 մլն դրամ վճարվի ընկերության կողմից, որը հաշվարկվել է որպես վագոնները իրենց պատկանող տարածքում կայանելու և պահպանման ծախս»,- պարզաբանեց «ԱՄ գրուպ» ընկերության տնօրեն Արմեն Մկրտչյանը:

Երկու կողմերի միջև պահպանման կամ նման այլ պարտավորությունների վերաբերյալ որևէ համաձայնություն կամ գրավոր փաստաթուղթ առկա չէ, այնուամենայնիվ, այդ պատճառաբանությամբ ՀԿԵ-ն հրաժարվել է համագործակցությունից: Երկաթուղային միակ բեռնափոխադրող ընկերության վարքագծի հետևանքով «ԱՄ գրուպը» կրել է լուրջ ֆինանսական վնասներ՝ հասնելով սնանկության:

Ֆինանսական խնդիրների պատճառով տնտեսվարողը վագոնները գրավադրել է «Արմսվիսբանկում»՝ հետագայում դրանք վաճառելու և բանկի պարտքը մարելու ակնկալիքով, սակայն «Հարավկովկասյան երկաթուղու» վարքագծի հետևանքով վագոնների վաճառքի շուրջ Վրաստանի գործընկերների հետ ձեռք բերված պայմանավորվածությունները չեղյալ են համարվել, հետևապես անհնար է դարձել նաև բանկի վարկի մարումը և գրավադրված վագոններն անցել են բանկի տիրապետության տակ:

Բանկը ևս իր հերթին փորձել է բանակցել երկաթուղու հետ՝ վագոնները Վրաստան տեղափոխելու և վաճառելու ուղղությամբ, սակայն մերժում է ստացել:

Վերոնշյալից հետո ընդդեմ «Հարավկովկասյան երկաթուղու» ՏՄՊՊՀ է դիմել նաև «Արմսվիսբանկը», որն իր դիմում-բողոքում նշել է, որ անհասկանալի է երկաթուղու վարքագիծը, քանի որ վերջինս, ըստ էության, խոչընդոտում է իրացնել փաստացի արդեն բանկին պատկանող գույքը: Մենաշնորհային դիրք ունեցող ընկերության վարքագծի, տվյալ պարագայում գերիշխող դիրքի չարաշահման հետևանքով անհնար է դարձել «ԱՄ գրուպի» հետագա գործունեությունը, ինչն էլ հասցրել է գործող ընկերության սնանկացման:

«ՀԿ երկաթուղու» պատճառաբանությունները անհիմն են և ոչ փաստարկված: Վարչական վարույթի ընթացքում կատարված ուսումնասիրությունից պարզվել է, որ տևական ժամանակ երկաթուղին մշտապես տարբեր պատճառաբանություններով հրաժարվել է համագործակցել նախ՝ «ԱՄ գրուպի», ապա նաև «Արմսվիսբանկի» հետ՝ խոչընդոտելով տնտեսվարողների գործունեությանը և չարաշահելով իր գերիշխող դիրքը: Նախ՝ պատճառաբանել է, որ վագոնները չեն կարող տեղափոխվել առանց վերանորոգման, ապա նշել է, որ կտեղափոխվեն, սակայն առկա է պարտք, որը մարելուց հետո միայն կքննարկեն տեղափոխման հարցը, ավելի ուշ մատնանշել է վագոնների՝ բանկում գրավադրված ժամանակ դատական ակտերով առկա սահմանափակումները, որը, ըստ էության, իր գործունեությանը չի առնչվում, դիմումի ձևի թերի լրացված լինելը և այլն»,- ասաց ՏՄՊՊՀ նախագահ Արտակ Շաբոյանը:

ՏՄՊՊՀ որոշմամբ՝ «Հարավկովկասյան երկաթուղին» պայմանագրի կողմերին՝ «ԱՄ գրուպին» և «Արմսվիսբանկին», պարտադրել է նրանց համար ոչ շահավետ կամ պայմանագրի առարկային չվերաբերող տնտեսապես չհիմնավորված պայմաններ, ինչը օրենքի խախտում է՝ գերիշխող դիրքի չարաշահում: