Քանի՞ ընտրող ունի Գյումրին նախնական ընտրացուցակներով

Դեկտեմբերի 9-ին կայանալիք ԱԺ արտահերթ ընտրությունների ցուցակները, որոնք փակցված են ընտրատեղամասերում, դեռևս համարվում են նախնական: Ըստ ոստիկանության տվյալների՝ նախնական ընտրացուցակներով, Գյումրին ունի 124.523 ընտրող, իսկ քաղաքի մշտական բնակիչների թիվը 117.000-ն է, հայտնում է SHANTNEWS.am-ի թղթակիցը Գյումրիից:

Ինչպես նախորդ ընտրություններին, հիմա էլ ընտրողների ցուցակային թիվն ավելին է քաղաքի մշտական բնակիչների թվից: Սա բացատրվում է նրանով, որ ընտրացուցակները կազմվում են ոչ թե բնակչության փաստացի, այլ պետական ռեգիստրում հաշվառվածների թվի հիման վրա, այսինքն՝ երկրից բացակայող քաղաքացիների անուններն այս ընտրացուցակներում ևս ընդգրկված են, անձնագրային բաժինները նրանց ընտրացուցակներից հանելու իրավունք չունեն:

Գյումրիի ընտրացուցակներում անճշտությունների թիվը միշտ մեծ է եղել մյուս բնակավայրերի համեմատ : Պատճառը հիմնականում տնակային անկանոն ու փոփոխվող հասցեներն են՝ ընտրողների կրկնվող անուններով կամ քանդված տնակներում քաղաքացիների հաշվառումներով: Իսկ այն, ինչ լուրջ խնդիր է եղել հանրապետության գրեթե բոլոր ընտրացուցակներում, մահացածների անունների առկայությունն է:

Անձնագրային բաժանմունքներն այս օրերին մահացած քաղաքացիների անուններն են ընտրացուցակներից դուրս բերում: Տվյալները ստանում են թաղման բյուրոյից, բայց մահվան վկայական չունենալու պատճառով անունները հնարավոր չէ հանել:

Գյումրիի «Կումայրի» անձնագրային բաժանմունքի պետ Ջուլիետա Քալաշյանի խոսքով՝ ցուցակներից հնարավոր չէ դուրս բերել արտերկրում մահացած և Գյումրիում հուղարկավորվածների անունները, քանի որ այդ մասին ոչ մի տեղ գրված չէ, մահվան գրանցում էլ չի կատարվում: Մնում է միայն ոստիկանության տեսուչների այցերով ճշտել՝ տվյալ անձը մահացա՞ծ է, թե՞ ոչ: Այս դեպքում կազմվում է զեկուցագիր, ու մահացած անձի անունը հանվում է ընտրացուցակներից, բայց ոչ բնակչության ռեգիստրից:

Ըստ պատասխանատուի՝ քաղաքի անձնագրային բաժանմունքները իրավասու չեն նաև քանդված տնակների հասցեներով հաշվառվածներին հայտնաբերել ու ցուցակներից հանել. սա արդեն քաղաքապետարանի գործառույթն է: Ըստ Ջուլիետա Քալաշյանի՝  համայնքապետարանի խնդիրն է՝ տնակը կա՞, թե՞ չկա:

Գյումրիի քաղաքապետի մամուլի խոսնակը SHANTNEWS.am-ի թղթակցին տեղեկացրել է, որ ընտրացուցակների հետ իրենք անելիք չունեն, իսկ ընտրության օրը քվեարկությունը միայն ըստ հաշվառման հասցեների է՝ լրացուցիչ ցուցակներով կարող են քվեարկել միայն հաշվառում չունեցող և այլ համայնքներում հաշվառված անձինք, ովքեր քվեարկության օրը Գյումրիում են գտնվելու: Բացակաների անունները ևս ընտրացուցակներից չեն հանվի:

Անձնագրային բաժանմունքում նշում են, որ եթե երկրից բացակայող քաղաքացին արտերկրի որևէ հյուպատոսական կառույցի տեղյակ չի պահել, որ ինքն այնտեղ նոր հաշվառում է ունենալու և պետք է այստեղի հաշվառումից դուրս գա, ապա նա կշարունակի մնալ հաշվառված Հայաստանում, իսկ անձնագրային բաժանմունքն այս դեպքում իրավունք չունի նրան հաշվառումից հանել:

Նշենք, որ եղած մի քանի ընտրություններում Շիրակի մարզն ակտիվության ցածր ցուցանիշ է ունեցել: Վերջնական ընտրացուցակով, որը կհրապարակվի նոյեմբերի 30-ից հետո, ըստ ոստիկանության տարածած հայտարարության, Գյումրիի ընտրողների թիվը կնվազի մահացած անձանց, զորակոչիկների և հաշվառումից դուրս բերված անձանց հաշվին: