Ադրբեջանում կալանավորված Կարեն Ղազարյանի մեղադրանքը խստացվել է. փաստաբան

Ադրբեջանում նոյեմբերի 27-ին կշարունակվի ՀՀ քաղաքացի Կարեն Ղազարյանի գործով դատավարությունը: Փաստաբան Արա Ղազարյանը SHANTNEWS.am-ի հետ զրույցում նշեց, որ իրենք այս գործով արդեն դիմել են ՄԻԵԴ, ՄԻԵԴ-ի միջոցով սպասում են քրեական գործի նյութերին, սակայն դրանք Ադրբեջանը չի ուղարկում, փաստացի, Ադրբեջանն արդեն ՄԻԵԴ հրահանգը չի կատարում:

«Միայն լրատվամիջոցներից իմացանք, որ գործը մտել է դատական փուլ, բայց ինչո՞ւ պետք է լրատվամիջոցներից իմանանք: Ադրբեջանը, Հայաստանի պես, Եվրոպական խորհրդի անդամ պետություն է, պարտավոր է համագործակցել Հայաստանի հետ, բացի դրանից՝ Մինսկի կոնվենցիայի անդամ պետություն է, պարտավոր է համագործակցել, մինչդեռ նշելով, որ դիվանագիտական հարաբերությունները բացակայում են, հրաժարվում է համագործակցել, բայց չէ՞ որ սեղանին դրված է մարդու իրավունքը, կան միջազգային փաստաթղթեր, որոնցով պարտավոր է համագործակցել, թեկուզ նվազագույն չափով, բայց դա էլ չի անում»,- ասաց նա:

Ղազարյանը հայտնեց, որ հիմնական գանգատը ներկայացված է ՄԻԵԴ, սպասում են Ադրբեջանի պատասխանին` դրան պատասխանելու համար, առայժմ այդքանն է: Նա նշեց, որ այս գործին «միջամտությունը» ՄԻԵԴ-ի անմիջական մասնակցությամբ է ստացվում, չմոռանանք, որ ՄԻԵԴ-ը դեռ հուլիս ամսին որոշում է կայացրել գործով դատաքննություն սկսելու` արագացված կարգով, գործին տալով առաջնահերթություն, ՄԻԵԴ-ն ամբողջությամբ ներգրավված է, մենք հիմա դատաքննության փուլում ենք ՄԻԵԴ-ում:

Հարցին` Ադրբեջանի արձագանքելիությունի՞ց է կախված ՄԻԵԴ-ում այս գործի ընթացքը, փաստաբանը պատասխանեց, որ դա Ադրբեջանի արձագանքման արագությունից կախված չէ, գործընթացը կարող է մի փոքր ձգձգվել, բայց նախատեսվող հիմնական ժամանակահատվածը Ադրբեջանի դիրքորոշումից կամ գործողությունից չի տուժի:

Փաստաբանը հայտնեց, որ Կարեն Ղազարյանի մեղադրանքը որոշ կետերով խստացվել է, իրենք ստացել են Ադրբեջանի պատասխանը, համեմատում են, տեսնում են, որ խստացվել է:

«Ինձ հետաքրքրում է` մարդու հիմնարար իրավունքները հարգո՞ւմ են, թե՞ ոչ: Առաջին հերթին, Կարենը ձերբակալման օրվանից մինչ այսօր գտնվում է առանց արտաքին աշխարհի հետ կապի, կալանքի տակ, սա արդեն իսկ խնդիր է բարձրացնում դատավարության, արդար դատաքննության իրավունքի տեսանկյունից: Կարենին մինչև հիմա թույլ չի տրվում կապվել` զանգել, նամակ գրել կամ ամենատարբեր եղանակներով կապ հաստատել իր ծնողների հետ:

Եթե դա լիներ նախաքննության փուլ, և մենք ասեինք, որ նախաքննական գաղտնիքի խնդիր կա, կարելի էր ասել, որ նման սահմանափակումը հետապնդում է իրավաչափ նպատակ, բայց գործն արդեն մտել է դատաքննության փուլ, և դատաքննությունը դռնփակ չէ, ուստի Կարենին թույլ չտալ ընդհանրապես հաղորդակցվել իր ծնողների հետ, դա անիրավաչափ է. միայն կցկտուր ինֆորմացիա են փոխանակում Կարմիր խաչի ներկայացուցիչները, Կարմիր խաչն էլ չեզոքություն է պահպանում, չափազանց պասիվ ակտիվությամբ է գործում, բայց ավելին չի էլ կարող, այսինքն` այն, որ Կարենը գտնվում է ամբողջությամբ շրջափակման մեջ, դա արդեն իսկ բարձրացնում է արդար դատաքննության խնդիր:

Կարենը դատարանի դահլիճում պահվում է «ակվարիումի մեջ». այդպես է կոչվում այդ ապակիներով «արկղը», նրա մոտ նստած է ոչ թե փաստաբանը, այլ ոստիկանը, դրան գումարած՝ Կարենը սաստիկ նիհարել է, նրա ծնողները խիստ մտահոգ են, նրանց հոգեկան տառապանքները պատկերացնո՞ւմ եք, նրանք տեսնում են, որ իրենց որդին իրապես նիհարած է, դա նշանակում է` արդեն աշխատում է կանխավարկածը, որ բանտում նրա պայմանները լավ չեն»,- ասաց նա:

Ղազարյանը շեշտեց` այս ամբողջը, այսպես թե այնպես, դատավարության հետ է կապվում, և շատ բան հայտնի չէ, որովհետև Կարենն ամբողջությամբ աշխարհից կտրված է, դրան գումարած նաև այն, որ Ադրբեջանը չի համագործակցում ՀՀ իշխանությունների հետ, ու այս ամբողջը կրկին դատավարության արդարության մասին հարց է բարձրացնում: Փաստաբանը նշեց, որ համադրելով, թե ինչ մեղադրանքներ են առաջադրվել, ինչպես նաև համադրելով Կարենի անցած ճանապարհը, թե նա ինչ էր անում մինչև անհետանալը, ոչինչ չի համընկնում. Կարենը սովորական քաղաքացի էր, որ աշխատում էր, երեկոյան գալիս էր տուն, հիմա նրան ներկայացնում են իբրև դիվերսանտ, որ նա սահմանը անցել էր ինչ-որ պայթեցումներ կատարելու նպատակով:

Արա Ղազարյանը Ադրբեջանում գերի ընկած և մահացած հայ հովիվ Մանվել Սարիբեկյանի գործով ևս դիմել էր ՄԻԵԴ, այժմ սպասում են ՄԻԵԴ վճռի հրապարակմանը: Նա նշեց, որ դեռ վճիռը չկա, ապա հիշեցրեց` Եվրոպական դատարանում դատական քննություն է սկսվել միանգամից չորս գործով` Խոջոյանի, Սարիբեկյանի, Բադալյանի և Սաֆարովի գործերով: Այս չորս գործերը 2015թ. են կոմունիկացվել, դատավարությունը սկսվել է 2010-2011թթ.:

Հարցին` այս գործերով վճիռն ի՞նչ ազդեցություն կունենա Կարեն Ղազարյանի գործում, փաստաբանը պատասխանեց.

«Հուսով ենք, որ դրանք զսպող ազդեցություն կունենան Ադրբեջանի նկատմամբ ընդհանուր առմամբ, առաջին հերթին, որ արձանագրվի իրավունքների խախտում և հարազատների իրավունքների որոշ վերականգնում, բայց ընդհանուր, թե ինչ ազդեցություն կունենա, հուսով եմ, որ դա տարածաշրջանում ընդհանրապես զսպող ազդեցություն կունենա»:

Փաստաբանն ասաց, որ Կարեն Ղազարյանի գործով ՄԻԵԴ ներկայացվածն անհատական գանգատ է հարազատների կողմից, իրենք պետական մարմինների հետ ընդհանրապես առնչություն չունեն, մյուս չորս գործով պետությունը ներգրավված է որպես երրորդ կողմ, իսկ Կարեն Ղազարյանի գործով` դեռ հայտնի չէ. ՄԻԵԴ-ը պետք է առաջարկի, բայց դեռ տեղեկություններ չկան` ՄԻԵԴ-ից նման առաջարկ եղե՞լ է, թե՞ ոչ: