Քանի՞ մարդ է բնակվում տնակներում և քանիսի՞ն է նախատեսվում բնակարան հատկացնել

Գյումրիում այսօր կառավարության արտագնա նիստի ընթացքում Քաղաքաշինության պետական կոմիտեից ներկայացրել են, որ ներկա պահին աղետի գոտում պետությունը 498 ընտանիքի հանդեպ ունի արձանագրված պարտավորություն, որոնց, ըստ պետության պարտավորությունների, նախատեսվում է բնակարան հատկացնել, բայց կան նաև շուրջ 4000 ընտանիքներ, որոնք բնակվում են տնակներում ու այստեղ միանշանակ չի կարելի ասել, թե պետությունը նրանց բոլորի հանդեպ ունի պարտավորություններ: Մի մասի հանդեպ պետությունը պարտավորություններ ունի, մի մասի հանդեպ չունի, ու այս առիթով պետք է կատարվեն փաստագրման աշխատանքներ: Այսինքն՝ հնարավոր չի ամբողջ 4000 ընտանիքին դասել մի խմբի մեջ, կան մարդիկ, որոնք իրոք տուժել են ու անօթևան են, ու կան մարդիկ, որոնք մի տեղ բնակարան են ստացել, բայց պահպանել են իրենց տնակն ու վարձով են տվել մեկ ուրիշին: Այս մասին վարչապետի պաշտոնակատարին պատմել է Քաղաքաշինության պետական կոմիտեի նախագահ Ավետիք Էլոյանը:

«Բազմաթիվ տարբերակներ կան, ու հենց դրա համար շատ կարևոր է փաստագրման աշխատանքներ կատարելը, որոնք նախատեսում ենք իրականացնել 2019-ի ընթացքում, որպեսզի տեսնենք իրական պատկերը»,- ասել է Էլոյանը:

Նիկոլ Փաշինյանը հարց ուղղեց Գյումրու քաղաքապետ Սամվել Բալասանյանին այն մասին, թե արդյո՞ք վերջինս համաձայն է, որ պետությունը ներկա պահին հստակ պարտավորություններ ունի 498 ընտանիքի հանդեպ, և ինչո՞ւ մինչև այժմ չեն փաստագրվում վերոհիշյալ 4000 ընտանիքները, որոնք բնակվում են տնակներում:

Բալասանյանն ի պատասխան նշել է, որ ներկա պահին Գյումրիում 2856 տնակ կա, ու հիմա ունեն ցուցակ, որում գրանցված են նշվածներից 1014-ը, որոնք տուն կորցրած մարդիկ են, բայց երկրում չեն եղել ու չեն ներկայացրել համապատասխան փաստաթղթեր:

«Բացի դրանից՝ եղել են բազմազավակ ընտանիքներ, որոնց մի մասը տեղափոխվել է ստացած նոր բնակարան, իսկ մի մասը մնացել է տնակում: Նաև կան մարդիկ, որոնք ներգաղթել են Գյումրի և հաշվառվել են տնակում: Կան նաև տնակները վարձակալությամբ վերցրած մարդիկ: Ուրեմն` 451 տնակում ընդհանրապես մարդ չի բնակվում: Ընդհանուր, եթե գումարում ենք այս թվերն իրար, ստացվում է 2856: Ես արդեն 6 տարի է` հաշվառում եմ»,- ասել է Սամվել Բալասանյանը:

Բալասանյանը ներկայացրած թվերին զուգահեռ շատ կարևորեց հստակ փորձաքննական վերլուծություն ու հաշվառում իրականացնելը, քանի որ միայն այդ դեպքում նրանք կկարողանան հասկանալ հստակ թվերն ու ներկայացնել լուծումներ:

Ի պատասխան Բալասանյանի՝ Փաշինյանը նկատել է, որ 30 տարի անց մենք դեռևս չունենք հստակ թվեր ու չգիտենք, թե ինչ ասել է աղետի գոտի ու ինչ է անհրաժեշտ այդ խնդիրները լուծելու համար:

«Միայն բնակարանաշինության մասին չէ խոսքը: Ես կարծում եմ, որ մենք պետք է որոշում կայացնենք, որ ձևավորվի աշխատանքային խումբ և ենթադրվում է՝ Քաղաքաշինության պետական կոմիտեի ներկայացուցչի գլխավորությամբ, որպեսզի ձևավորվի ամբողջական տեղեկատվության փաթեթ»,- ասել է վարչապետի պաշտոնակատարը: