Դա ի՞նչ հրաման է, որ չունի ամիս-ամսաթիվ. Հայկ Ալումյանը` հայտնի 0038 հրամանի մասին

ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը, պատասխանելով հարցին` եթե հայտնի 0038 հրամանն ամբողջությամբ գաղտնազերծված չէ, կալանքի հիմքում կարո՞ղ էր դրվել մասնակի գաղտնազերծված որոշում, ասաց.

«Մեր կարծիքով՝ չէր կարող դրվել, ընդհանրապես մենք ուրիշ փաստարկներ ունեինք` կապված այդ հրամանի հետ. այն չէր կարող դրվել ո՛չ մեղադրանքի, ո՛չ կալանավորման հիմքում, որովհետև այդ հրամանը, այդ թուղթը, որ այսօր գոյություն ունի, չի կարող համարվել հրաման, այն չունի դրա համար անհրաժեշտ պայմանները: Եթե ՀՔԾ-ն թույլ տար, որ այդ հրամանը մենք ձեզ ցույց տայինք, չէր կարող այլ բան ասել»:

Ալումյանը նշեց, որ շահարկումներին վերջ տալու համար ՀՔԾ-ին խնդրելու է` թույլ տան հրամանը ցույց տալ լրատվամիջոցներին: Փաստաբանն ասաց, որ նշված փաստաթղթի վրա չկա տարեթիվ, և ինչքան շատ խոսեն այդ հրամանի մասին, ինչքան շատ իմանան, այնքան կհամոզվեն, որ դրանով մեղադրանքի որևէ դրվագ կամ կալանավորման հետ կապված որևէ հանգամանք հաստատվել չի կարող:

«Հավատացեք, կգա այն օրը, երբ այդ հրամանը բոլորի համար կլինի հասանելի, այս օրը կհիշեք. այնտեղ որևէ բան չկա, որը կարող է մեկնաբանվել պարոն Քոչարյանի դեմ: Այն մասերը, որ ՊՆ-ն չի ցանկացել գաղտնազերծել, տեքստի մեջ կան հատվածներ, որ սևացրած են: Մեզ համար պարզ է, որ դրանք գաղտնի են, բայց որտեղ պիտի լինի ամիս-ամսաթիվ, տարեթիվ, դրանք ոչ թե սևացրած են, այլ ընդհանրապես ոչինչ չկա. ազատ տող է, որը լրացրած չի եղել երբեք: Սա ի՞նչ հրաման է, որը չունի ամիս-ամսաթիվ»,- ասաց նա:

Երկրորդ նախագահի պաշտպաններից Ռուբեն Սահակյանն էլ ասաց, որ նշված հրամանը չի պարունակում տարրեր, որոնցով կարելի է ասել` տապալվել է սահմանադրական կարգը: Նա վստահեցրեց` երբ գա ժամանակը, բոլորը կզգան, որ այն, ինչ այնտեղ գրած է, այդ գործողություններով սահմանադրական կարգ չի տապալվում:

«Սա մանիպուլյացիա է. դուք տեղյակ չեք բովանդակությունից, մենք էլ չենք կարող այն հրապարակել»,- նշեց նա: