Եվ՛ ես, և՛ իմ թիմակիցները սպասում ենք ոստիկանության քայլերին․ Մ․Պապիկյանը՝ «Մենք»-ի անդամների հետ միջադեպի մասին

«Իմ քայլը» դաշինքից թիվ 1 ընտրատարածքում առաջադրված պատգամավորի թեկնածու, վարչապետի ժամանակավոր պաշտոնակատարի խորհրդական Մեսրոպ Պապիկյանը հայտարարություն է տարածել իր թիմակցին ծեծի ենթարկելու առնչությամբ:

Հայտարարության մեջ, մասնավորապես, ասվում է.

«Արդեն տեղեկացրել եմ, որ «Մենք» դաշինքի անդամների կողմից ծեծի է ենթարկվել իմ թիմի անդամներից մեկը: Այս միջադեպը շահարկվեց, եղան բազում մեկնաբանություններ, որոնց ստիպված եմ ևս մեկ անգամ անդրադառնալ՝ հույս ունենալով, որ նման երևույթներն այլևս չեն կրկնվի:

Միջադեպի մասին տեղեկանալուց հետո ես և իմ թիմը ձեռնարկել ենք հետևյալ քայլերը.

1. Իմանալով, որ իմ թիմակցի վրա կատարվել է հարձակում, մենք դիմել ենք ՀՀ ոստիկանություն։
2. Ոստիկանների հետ միաժամանակ այցելել ենք «Մենք» դաշինքի կենտրոնական գրասենյակի բակ, որտեղ պատահաբար հանդիպել ենք դաշինքի առաջին դեմքերից մեկին, ով մեզ հրավիրել է գրասենյակ:
3. Ոստիկանները չեն մտել դաշինքի գրասենյակ, քանի-որ չունեն դրա իրավունքը: Նրանք սպասել են գրասենյակի բակում: «Մենք» դաշինքի գրասենյակ եմ մտել ես և իմ թիմակիցներից ոմանք: Փորձել ենք տեղի ունեցածի մասին զրուցել «Մենք»-ի անդամների հետ, բայց արժանացել ենք ոչ բարեհաճ վերաբերմունքի: Մեզ դիմավորել են բավական կոպիտ, ծավալվել է «բարձր տոնայնությամբ» խոսակցություն, ինչից ելնելով ոստիկանները ներս են մտել՝ կրքերը հանդարտեցնելու և հնարավոր զարգացումները կանխելու համար: Ուզում եմ ևս մեկ անգամ շեշտել՝ մենք մտել ենք «Մենք» դաշինքի գրասենյակ միայն հրավեր ստանալուց հետո:
4. Ոստիկանների միջամտությունից հետո մենք հեռացել ենք տարածքից և վերադարձել ոստիկանության բաժանմունք:

Եվ այսպե՛ս, նոր Հայաստանում բռնությունը տեղ չունի, նոր Հայաստանում մարդը բացարձակ արժեք է, նրա առողջությունն ու անվտանգությունը կարևորագույն պայման են: Այս հարցով զբաղվում է ոստիկանությունը: Եվ՛ ես, և՛ իմ թիմակիցները սպասում ենք ոստիկանության քայլերին»:

Հիշեցնենք, որ «Իմ քայլը» դաշինքի անդամները հայտարարել էին, որ հարձակվել են ու ծեծել Նիկոլ Փաշինյանի խորհրդական, թիվ 1 ընտրատարածքում «Իմ քայլը» դաշինքով առաջադրված պատգամավորի թեկնածու Մեսրոպ Պապիկյանի թիմի անդամներից մեկին։

Իր հերթին, «Մենք» դաշինքից էլ Անի Խաչատրյանը հայտարարել է, որ «Իմ քայլը» դաշինքի կողմից պատգամավորի թեկնածու և վարչապետի ժամանակավոր պաշտոնակատար Նիկոլ Փաշինյանի խորհրդական Մեսրոպ Պապիկյանը ոստիկանների և մի խումբ անհայտ անձանց հետ ներխուժել է ՄԵՆՔ դաշինքի կենտրոնական գրասենյակ և փորձել հաշիվներ մաքրել: