3 տարբեր ժամանակաշրջանների ու 3 տարբեր պատմությունների հերոսների դրամատիկ ճակատագրերը՝ մեկ ֆիլմում

«Էրկեն կիշեր» կամ «Երկար գիշեր». երեկ Գյումրիի «Հոկտեմբեր» կինոթատրոնում նոր ֆիլմի պրեմիերա էր: Այն պատմական դրամա է, որտեղ ներկայացվում են երեք ժամանակաշրջաններ, որոնք ընդգրկում են մեր օրերը, Հայոց ցեղասպանության տարիներն ու Միջնադարը. ժամանակագրությամբ իրարից հեռու են, բայց գաղափարներով գրեթե նույնը, այն է՝ պայքար կյանքի ու հոգևոր արժեքների պահպանության համար:

Մեկ գիշեր և երեք պատմություն: Երեք մասից բաղկացած ֆիլմը ստեղծված է 2018, 1915, 1003 թվականների համադրումներով: Առաջին հայացքից տարբեր այս պատմությունները մեկ ընդհանուր սցենարային գծով են. նրանց միավորում է երկար և սարսափելի ճանապարհը` մի դեպքում լի ընտանեկան վեճերով, մյուս դեպքում` փախուստի փորձով, իսկ վերջում` հավատի և փրկության ակնկալիքով: «Պտույտ» կոչվող և մեր օրերը ներկայացնող առաջին պատմության հերոսները ցոփ ու շվայտ կյանքով ապրող ամուսիններ են, ովքեր դժգոհ են ընտանեկան կյանքից:

Ընտանեկան այս դրամայում հայտնվում է երրորդ կողմ՝ մարմնավաճառի կերպարով, ու նա ստիպում է ամուսիններին հասկանալ, որ հարստությունից այն կողմ այլ արժեքներ կան:

«Փախուստը» ֆիլմի երկրորդ պատմությունն է, որի հիմքում ընկած է Դերենիկ Դեմիրճյանի «Ավելորդը» պատմվածքը: Հերոսները՝ Հաճի աղայի ընտանիքի անդամները, անցնում են 1915 թվականի սարսափների միջով: Թուրքերից փրկվելու համար նրանք հարկադրված բռնում են փախուստի ուղին՝ տանը թողնելով հաշմանդամ քրոջը: Գաղթի ճամփին ընտանիքը վերցնում է այն, ինչ  համարում է կարևոր. դա նյութականն էր ՝ ոսկեղեն, դրամ ու կտորների հավաքածու: Թուրքերը սպանում են տանը մնացած քրոջը: Եղբոր վերադարձն արդեն ուշացած էր, ու նույն ճակատագրին արժանանում է նաև ինքը:

Երրորդ պատմությունը վերնագրված է «Ուղի»: Այստեղ բնութագրվում է ավելի հին ժամանակաշրջան՝ 1003 թվականը, դժվար  ճանապարհով անցնող մարդու կյանքն է, ով  որդուն փրկելու համար սարսափների միջով է անցնում: Փրկության ճանապարհն  էլ Գրիգոր Նարեկացին  է՝ Սուրբ Նարեկով: Ֆիլմի երեք պատմությունների գաղափարը մեկ ընդհանրություն ունի ՝ հոգևոր հավատը, ինչից, ըստ ռեժիսորի, մարդկությունը հեռացել է:

Մոտ լինել հոգևոր ու ազգային արժեքներին. սա է ֆիլմի հիմնական ուղերձը: Նկարահանումները տևել են 3 տարի, ընդգրկել են Հայաստանի բնակավայրերը, որոշ դրվագներ նկարահանված են Գյումրիում: