Հիվանդության բուժման քաղաքականությունը փոխարինվում է այն կանխարգելելու քաղաքականությամբ. Փաշինյան

ՀՀ կառավարության` դեկտեմբերի 20-ի նիստում առողջապահության նախարարի պաշտոնակատար Արսեն Թորոսյանը ներկայացրեց նախագիծ, որով առաջարկվում է «Պետական հիմնարկների և կազմակերպությունների աշխատողների բժշկական օգնության և սպասարկման ծառայություններ» ծրագրի շահառուների ցանկում ներառել առողջապահական ոլորտի կազմակերպությունների աշխատողներին:

Թորոսյանի խոսքերով` սոցիալական արդարության սկզբունքից ելնելով, հնարավորության սահմաններում, անհրաժեշտություն է առաջացել առողջապահական ոլորտի առանձին կազմակերպությունների և առանձին ծառայություններ մատուցող անձնակազմի աշխատողներին ներառել այս ծրագրի շրջանակներում բժշկական օգնություն և սպասարկում ստանալու իրավունք ունեցող շահառուների ցանկում և նրանց համար նույնպես ձեռք բերել առողջության ապահովագրության փաթեթներ:

Թորոսյանը հայտնեց, որ 8 խոցելի խմբերի 230 հազար քաղաքացիների համար կատարել են պետպատվերի ծառայությունների շրջանակի ընդլայնում` այն մասերը, որոնք սոցփաթեթից վատն էին, հավասարեցնելով սոցփաթեթին: Նախարարի պաշտոնակատարը, սակայն, նշեց, որ այնտեղ կան նաև ծառայություններ, որոնք սոցփաթեթում չկան:

ՀՀ վարչապետի պաշտոնակատար Նիկոլ Փաշինյանը ներկայացվածն ամփոփելով` նշեց.

«Ունեինք պրոբլեմ, որ պետությունը, ըստ էության, երաշխավորում էր մարդու անվճար բուժօգնությունը հիվանդանոցում, բայց երբ մարդը պետպատվերի շրջանակներում գնում էր հիվանդանոց` տարբեր ծառայություններից օգտվելու, այնուամենայնիվ, նրանից որոշակի պատրվակներով որոշ գումարներ գանձվում էին: Դա պայմանավորված էր նրանով, որ բուժհիմնարկը պատշաճ մակարդակի չէր վճարվում, այսինքն` պակասող մասը ստիպված էին կոմպենսացնել այդ կերպ: Այժմ նույն ծառայությունների համար ավելի շատ ենք վճարելու բուժհիմնարկներին` չթողնելով, որ զարտուղի ճանապարհներով պետպատվերի շահառուներից գումար գանձեն, առավել ևս, հաշվի առնելով, որ նրանք, ըստ էության, սոցիալական խոցելի խմբերի ներկայացուցիչներ են, և այս պրոբլեմը կրկնապատիկ մեծանում է»:

Թորոսյանն ասաց, որ իրենք ութ ամենախոցելի խմբերն են ընտրել, բայց դեռ տեղ ունեն զարգանալու, այս տարվա բյուջետային միջոցները չեն բավարարի ավելին անելու, նա նաև ասաց, որ որոշ այլ խմբերի համար արդեն այդ գները լավն էին, մյուս փուլով էլ մնացածի հարցերը կլուծեն: Նա ասաց, որ ամենայն հավանականությամբ, սոցփաթեթի ընդլայնումն այսքանով սահմանափակեն, որպեսզի անցնեն համընդհանուր ապահովագրությանը: Կատարված փոփոխություններով, ըստ Թորոսյանի, քաղաքացիներին կապում են առաջնային օղակին, կանխարգելում են հիվանդանոցում բուժզննման ժամանակ արհեստականորեն հոսպիտալացումները, նաև ֆինանսական հոսքեր են կարգավորում հիվանդանոցից դեպի պոլիկլինիկա:

Փաշինյանը հավելեց շղթայական պրոցես հանդիսացող մի քայլ` պոլիկլինիկաների աշխատողների աշխատավարձերի բարձրացումը. մինչ այժմ որոշ բուժհիմնարկներ ունեցել են մենաշնորհներ առողջապահական ծառայությունների մատուցման ոլորտում, ինչն այս կերպ կկանխվի:

«Ունեինք ավերակների վերածվող պոլիկլինիկաներ, ու թեպետ սրանով շատ արագ փոփոխության չենք հասնի, բայց աշխատանքի մակարդակի բարձրացման պահանջ կձևավորենք, աշխատավարձերի բարձրացումով բարձրորակ կադրերի` պոլիկլինիկաներում աշխատելու ցանկություն կձևավորենք, սրանով բնակիչներին գումար խնայելու հնարավորություն կտանք»,- ասաց նա:

Առողջապահության նախարարի պաշտոնակատարը հայտնեց, որ Երևանի քաղաքապետարանը այս տարի բյուջեով նախատեսում է 150 մլն դրամի սարք-սարքավորում տրամադրել միայն Երևանի պոլիկլինիկաներին, նաև համայնքային իշխանությունների կողմից ուշադրություն կա:

Վարչապետի պաշտոնակատարն ընդգծեց` այս քաղաքականությունը շատ հարմար է, հիվանդությունները բուժելու քաղաքականությունը փոխարինում են կանխարգելելու քաղաքականությամբ: Փաշինյանի խոսքերով` մարդու համար ավելի ճիշտ է բուժսպասարկում ստանալ իր պոլիկլինիկայում: