ՄԻԵԴ դիմումի մեջ մանրամասն անդրադարձ է եղել գաղտնալսմանը. Ռոբերտ Քոչարյանի պաշտպան

ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանը դեկտեմբերի 22-ին լրագրողների հետ հանդիպմանը տեղեկացրեց, որ պաշտպանական կողմի՝ ՄԻԵԴ դիմումն արդեն պատրաստ է:

«Հենց հիմա իմ աշխատասենյակում դված է ՄԻԵԴ գանգատը` ամբողջությամբ պատրաստ վիճակում, համալրում ենք փաստաթղթերով, մեկ-երկու օրվա խնդիր է, որ այն մեկնի Եվրոպական դատարան»,- ասաց նա` նշելով, որ ՄԻԵԴ ներկայացված գանգատում մանրամասն անդրադարձ է եղել նաև ԱԱԾ տնօրենի և ՀՔԾ պետի հեռախոսազրույցի գաղտնալսմանը:

Խոսելով ակնկալիքներից` Ալումյանը նշեց, որ ինչպես ՄԻԵԴ գանգատ ներկայացնող ցանկացած անձ, իրենք ևս ակնկալիքներ ունեն, որ տեղի ունեցող անարդարություններին գնահատական կտրվի: Փաստաբանը հակադարձեց ժամանակ առ ժամանակ հանրությանը ՀՔԾ ու ԱԱԾ կողմից հանրությանը ներկայացվող նոր տվյալներին ու փաստաթղթերին:

«Պաշտպանական կողմը նաև ասում էր, որ 2008 թ. կար 300-րդ հոդվածը, բայց գոյություն չուներ ներկայում գործող 300.1 հոդվածը: Կիրառվող հոդվածը պետք է ավելի վատացնող չլինի, քան այն ժամանակ գործողը: Որպեսզի այսօր այդ հոդվածն իրավունք ունենան մեղսագրել պարոն Քոչարյանին, պետք է վստահ լինեն, որ այն ավելի չի վատացնում մեղադրյալի վիճակը, քան այն ժամանակ գործող 300-րդ հոդվածը»,- ասաց Ալումյանը:

Նա հայտնեց, որ այդ հոդվածի հիման վրա ժամանակին մեղադրանք է առաջադրված եղել նաև զանգվածային անկարգությունների կազմակերպիչներից մեկին` Ալեքսանդր Արզումանյանին, հետո, երբ այն տրոհվեց, դատախազությունը համարեց, որ այն վատթարացնում է վիճակը, ուստի հրաժարվեց այդ հոդվածից:

Ալումյանին հարց ուղղվեց` նախկին փոխվարչապետ Արմեն Գևորգյանին Ռոբերտ Քոչարյանն ի՞նչ հրահանգներ է տվել, եղե՞լ են պայմանավորվածություններ, հրահանգներ, որոնք կարող են նպաստել Գևորգյանին նման մեղադրանքի առաջադրմանը: Փաստաբանն ասաց, որ Գևորգյանի մեղադրանքին ծանոթ չէ, սակայն նշեց, որ հայտնի 0038 հրամանի հետ Արմեն Գևորգյանը որևէ կապ չի ունեցել` ուղղակի կամ անուղղակի, մարտի մեկի իրադարձությունների հետ էլ կապ չի ունեցել, Ռոբերտ Քոչարյանը մարտի մեկի հետ կապված հրահանգների մասին բան չի ասել:

Բուն հրամանի մասին Ալումյանը հայտնեց, որ իր պաշտպանյալն անմիջապես հրամանի տեքստը վերցնել ու ծանոթանալ կարող էր այս քննության ընթացքում:

«Դա չի նշանակում, որ պարոն Քոչարյանը փորձում է իրեն հեռացնել այդ հրամանից: Երբ ծանոթացավ, ֆիքսեց, որ նորմալ հրաման է, որտեղ ոչ մի արտառոց բան չկա»,- ասաց նա:

Պաշտպանության նախկին նախարար Միքայել Հարությունյանին դեռ չհայտնաբերելը Ալումյանը տարօրինակ է համարում, նա հիշեցրեց` Ռոբերտ Քոչարյանը ծանուցագիր էր ստացել ժամը երկուսին, որ երեք անց կես հրավիրում են հարցաքննության, անմիջապես տեղեկացրել էր, որ ամսի 25-ին կարող է ներկայանալ ու այդպես էլ արել է, նույնը կարող էր անել նաև Միքայել Հարությունյանը: Ըստ փաստաբանի` Հարությունյանը, տեսնելով, թե ինչ է տեղի ունենում այստեղ, բնական է, չի կարող ցանկություն ունենալ գալ, հայտնվել այդ իրավիճակի մեջ: Ալումյանն ասաց, որ իբրև փաստաբան ինքը շահագրգռված է, որ Հարությունյանը գա ցուցմունք տա, ամեն ինչի մասին, այստեղ գաղտնիք չկա ընդհանրապես:

«Վարչապետի պաշտոնակատարը օգոստոսի 17-ին հայտարարեց, որ մարտի 1-ի դեպքերն ամբողջությամբ բացահայտված են: Մարտի մեկի դեպքերի բացահայտումը ինչ է, միայն այն էր, որ պարոն Քոչարյանը կալանավորվեց, բա էն տասը զոհերը, դրանց մեղավորներին հայտնաբերելու ցանկություն չեմ տեսնում»,- ասաց նա:

Ալումյանը հայտնեց` երկրորդ նախագահը մինչ այժմ ցուցմունք չի տվել ու չի էլ տա, քանի դեռ համապատասխան կառույցի ղեկավարը հեռախոսային հայտնի խոսակցության մեջ ներգրավված անձն է: