Գյումրիում գազօգտագործման կանոնների խախտման 600 դեպք է արձանագրվել

Ջեռուցման սեզոնին շատ բնակարաններում հայտնաբերվում են գազասարքերի շահագործման կանոնների խախտումներ, ինչը հանգեցնում է թունավորումների: Շմոլ գազից թունավորման վերջին դեպքը Գյումրիում գրանցվել է հունվարի 5-ին: Գազի արտահոսքից ապահովագրված չեն անգամ այն բնակարանները, որտեղ նորագույն գազասարքեր են տեղադրված:

Այժմ գազի ներտնային ծառայության ծանրաբեռնված աշխատանքի շրջան է: Հոկտեմբերի 1-ից ապրիլի 1-ն ընկած ժամանակահատվածում բնակարաններում ընդամենը երկուական այցեր են կատարում, իսկ ռիսկային բնակարաններում ստուգումներն անցկացվում են կրկնակի հաճախականությամբ: Ռիսկային են համարվում այն բնակարանները, որտեղ մեկ անգամ արդեն խախտումներ հայտնաբերվել են: Դրանք շատ են հիմնականում գազաֆիկացված տնակային ավաններում:

Ներտնային ծառայության փականագործի ստուգումները տնակային ավանում սկսվում են հենց դրսում ծխնելույզների բարձրության դիտարկումներից: Անզեն աչքով էլ երևում է, որ ծխնելույզները տանիքից նվազագույնը 1.5 մետր բարձրացնելու պահանջը ոչ բոլորն են պահպանում:

Տնակներ կան, որոնք ջեռուցվում են գազի վառարաններով և համարվում են այսպես ասած ռիսկային բնակֆոնդ:

Գյումրիում 3000-ից ավելի ռիսկային բաժանորդներ կան հաշվառված: Ու սա միայն տնակներին չի վերաբերում: Շենքերում էլ վտանգ են ստեղծում խցանված օդատարները: Ծխատարներով աշխատող ջեռուցման կաթսաների անվտանգ աշխատանքն ապահովելու համար օդատարների ստուգումները պարտադիր են:

Գազի ներտնային ծառայության ստուգումները հենց ջեռուցման սեզոնին են կատարվում ու ամեն բնակարանում ընդամենը 2 անգամ: Չեն թաքցնում`ավելի շատ պատասխանատվություն բնակիչն է կրում: Սեփական բնակարանին ու գազասարքերին տանտերն է պարտավոր ուշադիր լինել, իսկ անհրաժեշտության դեպքում պետք է ահազանգեն մասնագետներին:  Նման ահազանգերի արդյունքում հարյուրավոր խախտումներ են հայտնաբերվել:

«Մոտավորապես 500-600 խախտումներ ունենք: Ու սա միայն Գյումրիում: Արթիկի և Անիի տեղամասերում էլ ունենք նմանատիպ խախտումներ: Ավելի շատ ռիսկային խախտումները ծխատարներին և կափույրներին են վերաբերում: Ունենք 3671 ռիսկային բաժանորդ, որոնց բնակարաններում կրկնակի ստուգումներ ենք կատարում, որպեսզի խուսափենք դժբախտ պատահարներից: Ռիսկային բաժանորդները նրանք են, որոնք օգտագործում են ծխատարներ ունեցող գազասարքեր, և հնարավոր է ծխատարը խաթարում ունենա»,- Shantnews-ին ասել է «ԷՅ-Ի-ՋԻ ՍԵՐՎԻՍ» ՍՊԸ Շիրակի ծառայության պետ Գալուստ Գալստյանը:

Ինքնաշեն վառարանների շահագործումը, գազօջախը ջեռուցման համար օգտագործելը… սրանք հանդիպող հիմնական խախտումներն են: Եթե ներտնային ծառայության սպասարկման ընթացքում խախտումն արձանագրել ստացվում է, գազասարքը կապարակնքում են, բայց սա երաշխիք չէ, որ տարին 2 անգամ ստուգվող բնականում խախտումները չեն կրկնվի: Ըստ էության, բոլոր գազասպառողների կողմից անվտանգության կանոնների վերահսկողությունն անհնար է: Շիրակի մարզում հիմա 56 հազարից ավելի գազասպառող կա: Այս թիվն ավելացել է անցած տարի՝ ի հաշիվ Արթիկի տարածաշրջանի մի քանի գյուղերի գազիֆիկացման: