Խորեոգրաֆիայի թատրոնի տնօրենն ու աշխատակիցները դժգոհում են Մշակույթի նախարարությունից ու տնօրենի նոր ԺՊ-ից

«Ցանկացած քաղաքացի, երբ ազատվում է աշխատանքից, պետք է պատշաճ կերպով ծանուցվի, ես առ այս պահը Մշակույթի նախարարությունից չունեմ ազատման հրաման, այդ պատճառով տեղեկացված չեմ եղել, որ ազատված եմ աշխատանքից: Միայն երեկ, երբ ոստիկանությունը եկավ թատրոն, ոստիկանության մոտ տեսա իմ ազատման հրամանը»,- հունվարի 17-ին կայացած ասուլիսի ժամանակ լրագրողներին ասաց Խորեոգրաֆիայի պետական թատրոնի նախկին տնօրեն Գայանե Կարապետյանը:

Նա պարզաբանեց, որ ինքը ստացել է ծանուցում, որ իր պաշտոնավարման ժամկետը լրանում է դեկտեմբերի 28-ին, և որ իր ժամկետը կարող է չերկարացվել: Արդյունքում պնդում է, որ առանց ծանուցման, որ ինքն ազատված է աշխատանքից, թատրոն է ներկայացել տնօրենի ժամանակավոր պաշտոնակատար Լիլիթ Փալանջյանը և պահանջել է հանձնել կնիքը:

«Եկել է մի աղջիկ, որի պրոֆեսիոնալ կրթությունը որպես բալետմեյստեր է, խորեոգրաֆ, համարվում է ուսումնարանի կրթություն ստացած, հետո ինչ-որ մասնավոր բուհերում սովորած, օպերայի կարդաբալետի եսիմ որերորդ աստիճանի պարող, չգիտեմ ինչ, չեմ ուզում որակել, որովհետև չեմ ճանաչում նրան, բայց եկել է մի աղջիկ, ով ունի իմ ազատման հրամանը, ներկայանում է ոստիկանություն, ասում է, որ ես տնօրենը չեմ, որ դուռը ջարդեք, բացեք և կնիքն էլ թող բերի հանձնի»,- ասաց Գայանե Կարապետյանը:

Գայանե Կարապետյանի խոսքերով՝ 2010-ից ինքն ընդունել է թատրոնը, այն որևէ գույք չի ունեցել, բայց հանուն իրենց կատարած ներդրումների՝ որոշել են մնալ ու աշխատել, արել են 7 ներկայացում, որոնք պահանջված են եղել և ցուցադրվել են տարբեր բեմերում՝ Ստանիսլավսկու, Սունդուկյանի թատրոններում, ցուցադրվել են նաև մարզերում, սահմանամերձ գյուղերում ու Ստեփանակերտում:

«Մեր զբաղեցրած տարածքը եղել է կաթսայատուն, որը սարքվել է ամբողջ կոլեկտիվի ուժերով, և հիմա ինչ-որ մեկը որոշել է ինչ-որ մեկի հրամանով ներս մտնել ու տիրանալ… Մշակույթի նախարարությունը մինչ այդ երբևէ մտե՞լ էր այդ թատրոն: Դա նման է նրան, որ փոքր երեխան ասի` մամա ջան, գուցե ինձ կերակրեի՞ր, մայրն էլ ասի` ես հիմա քո ժամանակը չունեմ, զբաղված եմ»,- ասաց թատրոնի գլխավոր ռեժիսոր Սամվել Սարգսյանը:

Գայանե Կարապետյանի ազատման հրամանը ստորագրել է մշակույթի նախկին նախարար Լիլիթ Մակունցը:

Թատրոնի դերասանները ևս իրենց դժգոհությունն են հայտնում՝ նշելով, որ թատրոնը ցանկանում են վերափոխել բալետային թատրոնի, ինչի արդյունքում իրենք առանց աշխատանք կմնան:

«Իմացանք, որ ֆորմատը փոխվելու է, ես դրամատիկական ժանրի դերասանուհի եմ, և ի տարբերություն բալետայինի՝ և՛ երգում ենք, և՛ պարում ենք, և՛ դրամատիկական դերեր ենք խաղում: Այսինքն՝ մնալու ենք առանց աշխատանքի, չեմ կարող թույլ տալ, որովհետև երբ եկել եմ, գործող թատրոն չի եղել, ես արել եմ բանվորի, դերձակի աշխատանք, մենք գիշերներն ինքնուրույն ենք վարագույր ներկել, դեկորացիա սարքել, մեկս մյուսին գրիմ արել: Այսինքն՝ իմ ու իմ կոլեգաների ջանքերով թատրոնը ստեղծվել է և չեմ պատրաստվում ասել՝ «Համեցեք, բարի գալուստ», և թատրոնը զիջել միայն նրա համար, որ ֆորմատին չեմ համապատասխանում»,- ասաց թատրոնի դերասանուհի Մերի Հակոբյանը: