Շիրակի մարզի գործարարներին 2 տարի առաջ խոստացված պետական աջակցությունն ուշանում է

Անցած տարեսկզբին Շիրակի մարզի գործարարների ներկայացրած բիզնես ծրագրերով նախատեսվում էր բացել 1800 նոր աշխատատեղ, բայց ծրագիրն իրականացվեց կիսով չափ. 852 աշխատատեղ բացվեց, ընդ որում, դրանց մի մասը նախորդ տարիներից խոստացվածներն էին: Օրինակներն են «Սաստեքս» ընկերության կարի և Բավրայի հնդկաձավարի մշակման արտադրամասերը, որոնք դեռ 2 տարի առաջ պետք է գործարկվեին: Մի քանի ծրագրեր մարզում կա՛մ սառեցվել են, կա՛մ ձախողվել:

2017 թվականից կառավարություն ներկայացվել էր 26 բիզնես-ծրագիր, հիմնականում ցածր տոկոսով վարկավորման: Ընդ որում՝ Շիրակի մարզից՝ ամենաշատ թվով:

Ջերմոցային տնտեսություն, ալյուրի, հացամթերքի և մսի արտադրություն: Մայիսյան գյուղում գործող «Հացատու» ընկերությունը այս բիզնեսների զարգացման համար է ակնկալում պետական աջակցություն՝ ցածր տոկոսով վարկերի տեսքով: Գործարարն այս դեպքում պարտավորվել է 43 աշխատատեղ բացել, բայց պետական սուբսիդավորումն է ուշանում: Ընկերության տնօրեն Լևոն Համբարյանի խոսքով՝ էժան վարկավորումը թույլ կտա անցնել նոր տեխնոլոգիաների, ինչը ջերմատնային տնտեսությունում բարձր բերքատվություն ու ցածր ինքնարժեք կապահովի, կներկրվեն բարձր կաթնատու և մսատու անասուններ:

Ալրաղացում լավորակ ալյուր, դրանից էլ որակյալ հաց ստանալու համար նույնպես նոր տեխնոլոգիաների կիրառում է պետք, բայց դրա համար գործարարը վարկային նոր բեռի տակ մտնել չի կարող: Բարձր վարկերով բիզնեսի ճյուղերում շահույթ ակնկալել, ասում է՝ հնարավոր չէ:

Ամիսներ առաջ ջերմոցային տնտեսությունն ընդլայնելու, նաև ջեռուցման ծախսերը հոգալու համար «Արտյոմ Խաչատրյան» ընկերության համասեփականատեր Ցոլակ Չադրյանն էլ էր դիմել կառավարություն նույն խնդրով՝ ցածր տոկոսով վարկավորման։ Սակայն, դեռ երկու տարի առաջ խոստացած տարեկան 5 տոկոս տոկոսադրույքով վարկավորումն ուշանում է, բայց սեփականատերը աշխատանքները ջերմոցում չի սառեցրել:

Չի սպասել պետական սուբսիդավորման, բարձր տոկոսով բանկից գումար է վերցրել ոչ թե դրամով, այլ դոլարով: Նշում է, որ դրանով ոչ միայն վարկային բեռն է ծանրացել, նաև վերադարձելիության ռիսկերն են մեծացել:

Շիրակի մարզպետարանի զարգացման ծրագրերի և զբոսաշրջության բաժնի պետ Կարեն Բադիշյանը հավաստիացնում է, որ արդեն 2 տարի կառավարությունում շրջանառվող բիզնես ծրագրերը էժան վարկավորման կարժանանան, բայց գործարարները դեռ սպասելու են: Մարտի 28-ին Գյումրիում կազմակերպվելու է «Իմ քայլը հանուն Շիրակի» ֆորումը, որին մասնակցելու են նաև ներդրողներ արտերկրից: Թե որքանով օտարերկրացի գործարարներին կհետաքրքրի մարզի արտադրական ներուժը և արդյո՞ք հնարավորություն կստեղծվի սառեցված ձեռնարկների մեկնարկը տալ, տնտեսական համաժողովի արդյունքներից է կախված:

Շիրակի մարզի արտադրական ներուժը շարունակում է ոչ լիարժեք կիրառվել: Ներդրումների համար գործարար շրջանակները մարզը դիտարկում են ռիսկային գոտի: Պատճառները 30 տարի է՝ գրեթե չեն փոխվել: Ոչ միայն բնակչության ցածր գնողունակությունը, նաև գործարարի համար շահավետ բիզնես միջավայրի բացակայությունը, ըստ ոլորտի պատասխանատուների, չի ապահովում ներդրումների վերադարձելիությունը: