Գյումրիի նախկին Տեքստիլ կոմբինատի վթարային հանրակացարանի ապամոնտաժման ժամկետները կերկարաձգվեն

Գյումրիի նախկին Տեքստիլ կոմբինատի հանրակացարանային մասնաշենքի ապամոնտաժման ժամկետները կերկարացվեն:  Հանրակացարանային շենքը խիստ վթարային է ու այն ապամոնտաժելու թույլտվություն սեփականատերը 2017-ին է ստացել: Այս ընթացքում, սակայն, ապամոնտաժման գործնական քայլեր չեն ձեռնարկվել:

Շենքում 3 միայնակ ծեր է ապրում, որոնց բնակարանային ապահովման խնդիրը չի լուծվում: Շենքի սեփականատերը Ենոք Սարգսյանն է: Բնակիչները նրան չեն տեսել ու չեն ճանաչում, որովհետև հանրապետությունում չի բնակվում: Նա Ռուսաստանի Վլադիմիրի մարզի բնակիչ է: Համենայնդեպս, այդպես է նշված հայցադիմումում, որը նա ներկայացրել է Շիրակի մարզի առաջին ատյանի դատարան ու բնակիչներին վտարելու որոշում ստացել: Դատարանը որոշել է, որ բնակիչները պետք է շենքն ազատեն, իսկ քաղաքապետարանը առայժմ չի գտել համապատասխան տարածք, որը բնակիչների սրտով կլիներ:

«Մեզ այլ հանրակացարաններում են սենյակներ առաջարկել։ Մենք համաձայն չենք դուրս գալ մեկ հանրակացարանից՝ մեկ ուրիշը տեղափոխվելու պայմանով։ Մենք բնակարան ենք կորցրել ու պահանջում ենք, որ մեզ ապահովեն մեկ սենյականոց բնակարաններով: Մեր շենքը քանդել պատրաստվողներն են անընդհատ անհանգստացնում, թե արագացրեք, դուրս եկեք, որ շենքը քանդելու են»,- SHANTNEWS.am-ի հետ զրույցում ասել են շենքի բնակիչները։

Քաղաքապետարանի այլընտրանքային բնակտարածքի առաջարկներին բնակիչները չեն համաձայնում: Մյուս կողմից էլ Շիրակի մարզի ընդհանուր իրավասության դատարանը տարածքն ազատելու որոշում է կայացրել: Սեփականատերն ու բնակիչները հիմա էլ այս որոշումն են վիճարկում Վերաքննիչ դատարանում: Բնակիչները նոր բնակարան են պահանջում, մյուս կողմից էլ իրենց իսկ հակասող քայլի են դիմել:

Գյումրիի փոխքաղաքապետ Վաղարշակ Մխիթարյանն է բացատրում՝ նրանք դիմել են Վերաքննիչ դատարան ու պահանջում են տարածքն ազատելու մասին Առաջին ատյանի դատարանի որոշումը բեկանել, ինչը նշանակում է, որ ուզում են հանրակացարանային սենյակներում մնալ:

«Բնակիչները համաձայնության չեն եկել, նրանք գտնում են, որ Առաջին ատյանի դատարանի որոշումն անօրինական է ու բողոքարկել են, իսկ եթե համաձայնության գային սեփականատիրոջ հետ, բնակարանային այլ տարբերակներ կքննարկվեին։ Բայց հիմա դեռ այս որոշումն են դատարանում վիճարկում։ Ըստ այդմ՝ սեփականատերը պետք է դիմի ապամոնտաժման թույլտվության ժամկետները երկարացնելու համար, քանի դեռ դատական վեճը չի լուծվել»,- SHANTNEWS.am-ի հետ զրույցում տեղեկացրել է Գյումրիի քաղաքապետի տեղակալ Վաղարշակ Մխիթարյանը։

Ապամոնտաժման վերջնաժամկետ սահմանված էր փետրվար ամիսը: Արդեն պարզ է, որ մինչ այդ շենքը չի քանդվելու, իսկ մինչ այդ, թե վթարային շենքում քանի փլուզումներ կլինի ու դա ինչ հետևանք կունենա, ոչ ոք անվտանգության երաշխիք չի տալիս: