Սուրեն Պապիկյանը հորդորել է խոշորացույցի տակ պահել համայնքի ղեկավարների աշխատանքը

ՀՀ կառավարության այսօրվա նիստի օրակարգում էր նաև  «ՀՀ կառավարության 2006 թվականի նոյեմբերի 16-ի համար 1708 N որոշման մեջ փոփոխություններ և լրացումներ կատարելու մասին» որոշման նախագիծը: Զեկուցողը՝ տարածքային կառավարման և զարգացման նախարար Սուրեն Պապիկյանն ասել է, որ նախագծով առաջարկվում է սահմանել ՀՀ պետական տարեկան բյուջեներով նախատեսված սուբվենցիաներից բացի, ՀՀ համայնքների տնտեսական և սոցիալական ենթակառուցվածքների զարգացմանն ուղղված սուբվենցիաների հայտի մշակման քննարկման և հաստատման կարգ, մշտադիտարկման մեխանիզմներ, ինչը հնարավորություն կտա արդյունավետ դարձնել համայնքներին տրվող սուբվենցիաների գործընթացը, բարձրացնել  վերահսկողական ցուցանիշները:

«Ձևավորվել են ծրագրային առանձին ոլորտներ, որոնց մասին ես կուզեմ բարձրաձայնել, որպեսզի ավելի հստակ լինի համայնքների բնակիչների համար, հատկապես, որ սրանով նախատեսվում է նաև, որ համայնքներում պետք է անցկացվեն հանրային լսումներ՝ կապված այն բանի հետ, թե որ ոլորտն է ավելի առաջնահերթ համայնքի համար և, ըստ այդմ, կտրամադրվի սուբվենցիան: Համայնքի կարծիքն առկա է լինելու ներկայացվող փաստաթղթերում»,- ասել է նախարարը:

Սուրեն Պապիկյանն առանձնացրել է հետևյալ ոլորտները՝ բնակավայրի, փողոցների կառուցում, նորոգում, ասֆալտապատում, խմելու ջրի մատակարարում, ինչպես նաև ջրահեռացման համակարգի կառուցում, նորոգում, ոռոգման համակարգի կառուցում և նորոգում, փողոցային լուսավորության համակարգի կառուցում և նորոգում, վերականգնվող էներգետիկ, այդ թվում՝ արևային ֆոտովոլտային կայանների տեղադրում, բնակավայրերի գազիֆիկացում, մանկապարտեզների կառուցում: Բացի այդ, հասարակական շենքերի վերակառուցում և նորոգում, բազմաբնակարան շենքերի՝ ընդհանուր բաժնային սեփականության գույքի նորոգում, այգիների, պուրակների կառուցում, բարեկարգում: Մեքենասարքավորումների ձեռքբերում, աղբավայրերի բարեկարգում կամ փակում:

«Հիշյալ ոլորտների առանձնացումը հիմնականում կապված է նրա հետ, որ նախկինում դրանք դասակարգված էին սոցիալական և տնտեսական ենթակառուցվածքներ բաժիններով: Այսպիսով՝ ոլորտը դառնում է ավելի թիրախային և մեզ համար հստակ է լինում, թե տնտեսական ենթակառուցվածքների, սոցիալական ենթակառուցվածքների ոլորտներից որոնք են մեզ համար ավելի առաջնահերթ, իսկ հանրային լսումն ավելի պարզորոշ է դարձնելու, թե համայնքի համար որն է ավելի առաջնային: Փոփոխության է ենթարկվել նաև սուբվենցիայի ֆինանսավորման նվազագույն չափը: Դա կախված է լինելու համայնքի բյուջեի չափից: Հայտերի ներկայացման ժամկետը նախատեսվում է մինչև յուրաքանչյուր տարվա մայիսի 15-ը, ինչը հնարավորություն կտա ավարտել ծրագրերը մինչև ձմռան ամիսների ավարտը: Ընդ որում՝ ծրագրի որակն ու արդյունավետությունն ապահովելու նպատակով առաջարկվում է մինչև սույն թվականի մարտի 10-ը սուբվենցիայի հայտ ներկայացնել»,- ասել է Պապիկյան:

Ըստ տարածքային կառավարման և զարգացման նախարարի՝ մեքենասարքավորումների ձեռքբերման հարցում անհրաժեշտ է  համայնքի ղեկավար երաշխավորագիրը՝ դրանց առնվազն 10 տարի ժամկետով շահագործման, սպասարկման և պահպանման ծախսերը հոգալու համար:

Փոխվարչապետ Տիգրան Ավինյանը հետաքրքրվել է վիճակագրությամբ ու թե ինչքանո՞վ են բավարար գնահատվել իրականացված ծրագրերը: Ի՞նչ համամասնություն կա խոշորացված ու ոչ խոշորացված համայնքների համար ծրագրին մասնակցելու առումով։

«Կառավարության 7 որոշումներով շուրջ 150 սուբվենցիոն ծրագիր է ֆինանսավորվել: ՀՀ պետական բյուջեից տրամադրվել է 1 մլրդ 620 մլն դրամ: Մենք տարվա կեսին հայտարարեցինք, որ կարող ենք տրամադրել շուրջ 10 մլրդ համաֆինանսավորում, բայց, քանի որ տարվա կեսն էր, համայնքներն ի վիճակ չէին այդ փուլում համաֆինանսավորել, և աշխատանքների ավարտը հնարավոր չէր իրականացնել: Դա եղավ պատճառ, որ գումարների մի զգալի հատված տրամադրվեց համայնքներին՝ առաջնահերթ խնդիրները լուծելու համար: Այս տարի մեր առջև խնդիր ենք դրել՝ համայնքների մասնակցությունն ապահովելու համար սկսել ավելի վաղ, և հենց դա է պատճառը մինչև մայիսի 15 ժամկետ սահմանելու համար, և սա թույլ կտա մինչև ձմեռ ավարտել: Մասնակցում են խոշոր և խոշորացված համայնքները, համայնքները, որոնք ֆոնդային բյուջեում կարողանում են գումար գեներացնել»,- ասել է տարածքային կառավարման և զարգացման նախարարը՝ հավելելով, որ եթե համայնքը կարողանում է գումարներ տնտեսել, կառավարության հետ համագործակցության արդյունքում կարևորագույն ծրագրեր են իրականացվում: Փաստն այն է, որ համայնքների ջանքերով շատ քիչ ծրագրեր են իրականացվել համայնքներում: Համաֆինանսավորմամբ փորձ է արվում լուծել խնդիրը: Սահմանամերձ բնակավայրերն արտոնություն ունեն:

Ըստ Սուրեն Պապիկյանի՝ ծրագիրը խրախուսելու է համայնքների մասնակցությունը: Տրամադրվող գումարը կրկնապատկվել է: Որպես հաջողված փորձ նշվել է Գորիս խոշորացված համայնքի օրինակը, որտեղ մի շարք ծրագրեր են իրականացվել համայնք-կառավարություն համագործակցության ու ֆինանսավորման արդյունքում:

«Նախագծի հաստատումից հետո մենք պատրաստվում ենք առաջիկա շաբաթվա ընթացքում հրավիրել համայնքապետերին, ավագանու անդամներին: Ծրագրի մասին նրանց իրազեկել ենք և խնդրել, որպեսզի ավելի ակտիվ լինեն, և խնդրում եմ հիմա համայնքի բնակիչներին ուշադրության, խոշորացույցի ներքո պահել համայնքի ղեկավարի գործունեությունը, համայնքում առկա ֆինանսական միջոցները: Օգնել, որպեսզի ծառայեցվի համայնքին, համայնքի խնդիրների լուծմանը»,- հավելել է տարածքային կառավարման և զարգացման նախարարը: