Գյումրիում մոտ 700 քարաշեն ու կիսաքարաշեն կառույց տնակի հասցեներով են ու սեփականաշնորհման ենթակա չեն

Գյումրիում եղած 2800-ից ավելի տնակներից մոտ 700-ը, քաղաքապետարանի տվյալներով, քարաշեն և կիսաքարաշեն են, որոնց մեծ մասը կապիտալ շինություններ են, բայց տնակային հասցեներով: Հենց սա էլ խնդիր է ստեղծել բնակիչների համար սեփական գույքը որպես հիմնական տնօրինել: Սեփականաշնորհումից հետո է միայն հնարավոր հասցեավորում փոխել, որով տնակների թիվ կհստակեցվի, իսկ այդ ընտանիքների հանդեպ պետությունը բնակարանային ապահովման պարտավորություն չի ունենա: Քարաշեն տնակների մեծ մասը գտնվում է քաղաքի գլխավոր հատակագծով սահմանված կանաչ գոտիներում, ինչն էլ արգելում է նման տների սեփականաշնորհումը:

Ավտոկայանի բանավանն է, որը Գյումրիի ամենամեծ տնակային թաղամասն է: Այստեղ մոտ 250 տնակային հասցե կա: Մի մասը 30 տարում մարդիկ քարապատել են, դարձրել հիմնական սեփական տներ՝ կոմունալ բոլոր հարմարություններով, բայց տնակի կարգավիճակով: Ոմանք 6 մետրանոց տնակն են քարե տուն դարձրել: 1990-ականներին տեղադրված այս տնակը թաղամասի մյուս տնակների նման ամեն անձրևից հեղեղվում էր: Տարածքի բնակիչները պետական փոխհատուցմանը սպասելու փոխարեն՝ սեփական միջոցներով իրենց բնակարանային խնդիրը լուծեցին։

Տնակի հասցեով ևս մեկ կապիտալ շինություն, որի տերերը նոր են պարզել, որ տարածքը քաղաքի գլխավոր հատակագծով կանաչ գոտի է, որտեղ տների սեփականաշնորհում չի թույլատրվում: Տնակի հասցեներով, բայց քարաշեն կապիտալ, անգամ երկհարկանի տներում ապրող ընտանիքներից ոմանք հասցրել են նաև պետությունից բնակարաններ ստանալ: Հիմա պատրաստ են հրաժարվել ստացած բնակարաններից, եթե այս տները սեփականաշնորհվեն:

Ընտանիքներ էլ կան, որ նախընտրում են ապրել այս տներում, քան 30 տարի անց կորցրած բնակարանի դիմաց ստանալ ընտանիքի անդամների թվին ոչ համարժեք սենյակներով բնակարան: Սեփականաշնորհման դիմումները հիմնականում մերժվում են այն պատճառով, որ տները գտնվում են հատակագծով նախատեսված կանաչ գոտիներում: Ամբողջությամբ քարաշեն 406 տնակային հասցե գոյություն ունի, որոնք քաղաքի տարբեր հատվածներում են: Սեփականաշնորհման թույլտվություն ստանալու համար, ըստ Գյումրիի քաղաքապետարանի քաղաքաշինության բաժնի պետ Արթուր Հակոբյանի, պետք է փոխել հողատարածքների նշանակությունները:

Քաղաքապետարանը դիմել է Քաղաքաշինական պետական կոմիտե, առայժմ 2 տարածքների համար։ Թույլտվություն ստանալու դեպքում նոր քարաշեն տնակների սեփականաշնորհում կկատարվի։ Առայժմ ընտրված 2 տարածքներն ամենաշատ քարաշեն տնակներն ունեն։

Ավտոկայանի բանավանը ուսումնասիրվող տարածք չի ներկայացվել: Նշենք, որ Գյումրիի գլխավոր հատակագծի փոփոխված տարբերակը հաստատվել է 2006 թվականին, երբ տնակային թաղամասերում կապիտալ շինություններն արդեն կային, բայց կառուցապատված այդ տարածքները սահմանվեցին որպես կանաչ գոտիներ, ինչն էլ մինչև հիմա խոչընդոտում է տնակային հասցեներով քարաշենների սեփականաշնորհմանը: