Ինչո՞վ է կայազորի դատախազի պաշտոնը տարբերվում կայազորի դատախազության դատախազի պաշտոնից. պարզաբանում է Գոռ Աբրահամյանը

ՀՀ գլխավոր դատախազի խորհրդական Գոռ Աբրահամյանը Facebook-ի իր էջում անդրադարձ է կատարել այն մասին, թե ինչով է կայազորի դատախազի պաշտոնը տարբերվում կայազորի դատախազության դատախազի պաշտոնից:

Նա մասնավորապես գրել է.

«Քանի որ Հ. Մաշադյանի դատախազ նշանակվելու շուրջ նախորդ օրերին սկսված աժիոտաժից ակնհայտ դարձավ, որ քաղաքացիների, օգտատերերի ու լրագրողների մեծ մասը չգիտի ու ջանք չգործադրեց օրենքը վերցնելու և իմանալու՝ ինչով է կայազորի դատախազի պաշտոնը տարբերվում կայազորի դատախազության դատախազի պաշտոնից, հարկ եմ համարում ընդամենը հղում կատարել Դատախազության մասին գործող օրենքի նորմերին: Համաձայն դրանց՝ (Հոդված 21)
Կայազորի զինվորական դատախազը.

1) ղեկավարում և կազմակերպում է կայազորի զինվորական դատախազության գործունեությունը.
2) կատարում է իր տեղակալի, կայազորի զինվորական դատախազության ավագ դատախազների և դատախազների (այսուհետ՝ կայազորի զինվորական դատախազության դատախազներ) միջև աշխատանքի բաժանում.
3) առաջարկներ է ներկայացնում գլխավոր դատախազին կամ զինվորական դատախազին՝ կայազորի զինվորական դատախազության դատախազներին խրախուսելու կամ նրանց կարգապահական պատասխանատվության ենթարկելու վերաբերյալ, ինչպես նաև նրանց առաջխաղացման վերաբերյալ.
4) առաջարկներ է ներկայացնում դատախազության աշխատակազմի ղեկավարին կայազորի զինվորական դատախազության աշխատակիցներին խրախուսելու կամ նրանց կարգապահական պատասխանատվության ենթարկելու վերաբերյալ.
5) վերահսկողություն է իրականացնում կայազորի զինվորական դատախազության աշխատակիցների կողմից աշխատանքային կարգապահության պահպանման և ամրապնդման, նրանց կողմից պարտականությունների ժամանակին և պատշաճ կատարման նկատմամբ.
6) իրականացնում է սույն օրենքի 5-րդ գլխով սահմանված լիազորությունները.
7) իրականացնում է դատախազության՝ Սահմանադրությամբ նախատեսված իրավասության շրջանակում օրենքով իրեն վերապահված այլ լիազորություններ:
Այսինքն՝ կայազորի զինվորական դատախազը հանդիսանում է այդ ստորաբաժանման ղեկավարը:

Իսկ «Դատախազության մասին» ՀՀ օրենքի 20-րդ հոդվածը նկարագրում է կայազորի զինվորական դատախազության կառուցվածքը և գործառույթները: Ըստ այդմ՝

1. Կայազորի զինվորական դատախազությունը ապահովում է Սահմանադրության 176-րդ հոդվածի 2-րդ և 3-րդ մասերով սահմանված լիազորությունների իրականացումը զինվորական կայազորում, բացառությամբ օրենքով սահմանված դեպքերի:
   2. Կայազորի զինվորական դատախազությունը կազմված է կայազորի զինվորական դատախազից, կայազորի զինվորական դատախազի տեղակալից, կայազորի զինվորական դատախազության ավագ դատախազներից և դատախազներից:
   3. Կայազորի զինվորական դատախազության նստավայրը որոշում է զինվորական դատախազը` ըստ կայազորի տեղաբաշխման:
   Վերոնշյալ հոդվածի բովանդակությունից, կարծում եմ, ակնհայտ է, որ կայազորի զինվորական դատախազության դատախազի պաշտոնը, որին 2018թ. մարտին նշանակվել է Հ. Մաշադյանը, պաշտոնների դասակարգման մեջ ամենացածր օղակն է: Հուսով եմ՝ հետագայում նման հարցադրումներ առաջանալիս գոնե հարկ կհամարեն բացել ու կարդալ օրենքը: