Քաղաքապետն իր աշխատակազմով քայլեր ձեռնարկելիս հաշվի չի նստում ավագանու հետ. Դավիթ Խաժակյան

Հեղափոխությունից հետո ստեղծվել են մեծ հնարավորություններ, որոնցից ժողովուրդը պետք է ճիշտ օգտվի, կարծում է Երևանի քաղաքապետարանի «Լույս» խմբակցության ղեկավար Դավիթ Խաժակյանը: «Հեռանկար» հաղորդաշարի տաղավարում նա ընդգծել է, որ քաղաքապետարանը չունի թափանցիկ և հաշվետու գործելաոճ:

«Մենք կարծում ենք, որ քաղաքապետարանում գործունեության սինքրոնիզացիան բոլոր ուժերի շուրջ չի կայացել, քաղաքապետն իր աշխատակազմով քայլեր ձեռնարկելիս հաշվի չի նստում ավագանու հետ՝ որպես ինստիտուտի, և մեր քննադատություններն ուղղված են լինելու գործողություններին, որոնք իրականացնում են առանց քննարկումների, և մենք արձագանքում ենք իրենց բացասական քայլերին, որոնք արդեն կայացած են»,- ասել է Խաժակյանը:

Ըստ ավագանու անդամի՝ նրանք հայտարարում են այլ բան, բայց առանց հաշվի առնելու ավագանու տեսակետը, անում են այլ բան: Այնինչ, քննարկումների անհրաժեշտություն կա, որպեսզի կարողանան ճիշտ ուղղությամբ հասնել վերջնանպատակին:

«Մեր բանավեճը եղավ տրանսպորտի ոլորտում, և հստակորեն կարող եմ այդ ուղղությունը շարունակել, հիմա քննարկվում է մետրոյի երկու կայարանների կառուցումը, մատնանշվում է ճանապարհ, որին մենք սկեպտիկորեն ենք վերաբերվում և հիմքեր ունենք, բայց դա բխում է սրտացավությունից, ուզում ենք, որ ամեն ինչ հաջողի և լավ ուղղությամբ գնա, որովհետև բոլորիս օգուտն է լինելու, և կարևորում ենք քայլերը, որոնցով կառավարությունը պետք է հասնի իր կողմից դրված նպատակին»,- կարծում է նա:

Ավագանին, որը Խաժակյանը քաղաքական մարմին է համարում, տնօրինում է համայնքի բյուջեն և պետք է սահմանի առաջնահերթություններ, քաղաքային մակարդակով քաղաքականության մշակում է իրականացնում, հետևաբար պետք է մասնակից դառնա ֆինանսական միջոցների արդյունավետ օգտագործմանը:

«Եթե ունի երկու այլընտրանքային հարց, մեկը քաղաքային տրանսպորտ, մյուսը մետրոպոլիտենի կառուցում, սա երկընտրանք է, որը պետք է կայացնի քաղաքային իշխանությունը»:

Հարցին, թե հնարավոր չէ՞ երկուսի զուգահեռ իրականացում, պատասխանում է.

«Շատ դեպքերում բացառվում է, երբ վարկային միջոցներ են ձևավորվում, պետք է հասկանալ՝ որ ուղղությամբ: Ասում են՝ մասնավորից պիտի վերցնենք, բայց մասնավորը հասանելի չէ, օրինակ՝ Հալաբյանի վրա բիզնես կենտրոն պետք է կառուցվի, որտեղ հասնելու է նաև մետրոյի կայարանը, որպես ներդրման մի մաս նոր կայարանը կառուցվի: Բայց այն արժեքը, որը գնահատվել է, շուրջ 100 մլն դոլար, դժվար է պատկերացնել որևէ բիզնես ներդրում, որը մեծ ծավալներ պետք է ունենա և կարողանա նաև մետրոպոլիտենի կայարանի կառուցման ծախսերը հոգալ»: