Ժնևում Հայոց ցեղասպանությանը նվիրված հուշարձանի դեմ բողոքն ուղղորդում է նույն ուժը, որը գործում էր Փերինչեքի հայցի ժամանակ

Շվեյցարիայի բարձրագույն դատարանը մերժել է Հայոց ցեղասպանությանը նվիրված հուշարձանի տեղադրման դեմ բողոքը: Շվեյցարիա-Հայաստան բարեկամական խմբի գլխավոր քարտուղար Սարգիս Շահինյանը SHANTNEWS.am-ի հետ զրույցում հայտնեց, որ այս հուշարձանի տեղադրման նախաձեռնությունը 2008-ից է սկսվել, երբ քաղաքի ղեկավարությունը որոշեց նման մրցույթ հայտարարել: Մրցույթի հաղթող դարձավ Մելիք Օհանյանը: Շահինյանը հայտնեց, որ հուշարձանի տեղադրման ժամանակ ամենատարբեր ճնշումներ եղան, հատկապես Թուրքիայի դիվանապետության կողմից, արձանի տեղադրումից առաջ երեք անգամ տեղ փոխվեց, մինչև ներկայիս վայրն ընտրվեց:

«Հուշարձանն արդեն մեկ տարի է, որ տեղադրված է, բնակիչների մի խումբ դրա դեմ բողոք էր ներկայացրել զանազան դատական ատյաններին, որն անցյալ ուրբաթ վերջնականապես մերժվեց Շվեյցարիայի բարձրագույն դատարանի կողմից: Նախաձեռնությունը զուտ մշակութային է, այն ներկայացնում է դեպի առաջ միտված տեսլական, մի ցանկություն, որը երկխոսության է նվիրված, և իհարկե, խորհուրդ ունի՝ կարողանալ մարդկանց բացատրել, թե հիշողությունն ինչ է: Դուք կարող եք զանազան պայքարի միջոցներ ձեռնարկել, կարող եք մշակութային հարթության վրա շարժվել, դատական հարթության վրա, զինյալ պայքարի միջոցով, ի վերջո, ցանկությունը մեկն է՝ չմահանալ, այնպես անել, որ հիշողությունը հավերժանա, մանավանդ մի քաղաքում, որ հարյուր տարի առաջ տեսել է ապստամբության արշալույսը՝ քաղաքական, մշակույթի ապստամբության»,- ասաց նա:

Շահինյանը նշեց՝ մեծ հպարտությամբ ու գոհունակությամբ կարող է ասել, որ սա այսօր իրականություն է, սակայն խնդիրը չի ավարտվել, որովհետև դեռ հնարավոր է՝ այդ բողոքը գնա ՄԻԵԴ:  Շվեյցարիա-Հայաստան բարեկամական խմբի գլխավոր քարտուղարի խոսքերով՝ հաջորդ 6 ամսվա ընթացքում ավելի պարզ կլինի, թե ինչ ուղղությամբ են գնալու այդ ուժերը, որոնք, նրա խոսքով, նույն ուժերն են, որոնք Փերինչեքի խնդրի ժամանակներից հանդես են եկել հայ համայնքի դեմ:

«Լավ կլիներ, որ բոլորս լավ հասկանանք, թե մեր գործն իրականում ում հետ է, այսինքն՝ բնակիչները կապ չունեն, լավ կլիներ գիտակցել, որ ուղղորդումն այլ տեղից է գալիս: Հայցը մեկ տարի առաջ Առաջին ատյանի դատարանում էր ներկայացված, հետո մերժվեց, հետո Ժնևի կանտոնի դատարանին ներկայացվեց հաջորդ հայցը, որն էլ մերժվեց, վարչական դատարանի մասին է խոսքը, հետո Բարձրագույն դաշնային դատարանին ներկայացվեց և դա էլ մերժվեց»,- ներկայացրեց Շահինյանը:

Նա ասաց, որ նիստը փակ է եղել, հայցը քննող 5 դատավոր է եղել, դատարանը որոշում կայացնելիս հիմնվել է վարչական իրավունքի վրա՝ ասելով, որ այս բնակիչները լուրջ պատճառ չկարողացան ներկայացնել՝ «խաղաղության խաթարման» հետ կապված, դրա համար էլ հայցը մերժվել է: Շահինյանի խոսքով՝ խնդիրը բավական հստակ էր, որ այս հուշարձանը որևէ կերպ տարբեր համայնքների միջև հակասություն չի կարողանալու ստեղծել, ոչ էլ ստեղծել է, արձանն իր էությամբ խաղաղ և կառուցողական պատգամներ է տալիս բոլոր այցելողների համար՝ տարվա մեջ 365 օր:

Հարցին՝ բողոքի հայց ներկայացնողներն ազգությամբ թո՞ւրք էին, Շահինյանը պատասխանեց, որ նրանց  միայն մի փոքր մասը թուրքական ծագում ուներ, մյուսները շվեյցարական ծագում ունեին, սակայն բոլորն ուղղորդված էին մի փաստաբանի և Շվեյցարիայում գործող մի ուժի, այն է՝ Ֆրանսախոս թուրքական կազմակերպությունների ֆեդերացիայի կողմից:

Շահինյանը շեշտեց՝ դա նույն կառույցն է, որն իրենց դեմ էր դուրս եկել Փերինչեքի դատական գործընթացի ժամանակ, նրանց փաստաբանը այն պատգամավորն է, որը ծայրահեղ աջակողմյանների կուսակցության անդամ է և որը նրանց փաստաբանն էր նաև Ստրասբուրգում Փերինչեքի հայցի բողոքարկման ժամանակ: