Շիրակի մարզի Քարաբերդ գյուղի դպրոցում լարված վիճակ է. պատճառն ուսուցչուհին է

Անի խոշորացված համայնքի Քարաբերդ գյուղի միջնակարգ դպրոցի աշակերտներն ու ծնողները բոյկոտում են քիմիայի և կենսաբանության դասերը` փակել են դպրոցի դռները և թույլ չեն տալիս այս առարկաների ուսուցչուհուն աշխատանքի գալ: Իսկ պատճառը, ըստ նրանց, աշակերտների նկատմամբ ուսուցչուհու ագրեսիվ ու արհամարհական պահվածքն է, որը հանդուրժել են մի քանի տարի և հիմա պահանջում են նրան աշխատանքից ազատել:

Բողոքը մինչև մարզպետարան է հասել ու անպատասխան մնացել, ինչն էլ դասադուլի է հանգեցրել:

Քարաբերդի միջնակարգ դպրոցում 3-րդ օրն է, պարապմունքներ չկան, դասադուլը ծնողներն ու աշակերտները հայտարարել են անորոշ ժամանակով: Ամբողջ գյուղն էր հավաքվել դպրոցում, պարզվեց` բողոքը ընդամենը 1 մարդու դեմ էր` դպրոցի քիմիայի և կենսաբանության ուսուցչուհու: Պահանջում են աշխատանքից հեռացնել Մարինե Սարգսյանին:

Պնդում են, թե նա ուսուցչուհուն անվայել պահվածք ունի. աշակերտների աշխատանքներն է պատռում, երեխաներին դասի ժամանակ արհամարհում է, դաս չի հարցնում, վիրավորում է, ծեծում: Քիմիայի եւ կենսաբանության ուսուցչուհին միակն է դպրոցում:

Ըստ ծնողների` այս վիճակը նոր չէ, բայց չէին բողոքում, որովհետև դպրոց ուղարկելու երեխաներ էլի ունեին: Իրենց խոսքերը աշակերտները ձայնագրություններով են ապացուցում:

Քիմիայի և կենսաբանության ուսուցչուհուն դասի ժամանակ ձայնագրել են: Դրանցից մի քանիսը դպրոցի տնօրենին են փոխանցել: Ըստ Մարինե Սարգսյանի` ձայնագրությունը ոչ թե դասի ժամանակ է եղել, այլ դասերից հետո ու պնդում է, թե վեճը հրահրված էր: Հերքում է, որ երբևէ որևէ մեկին վիրավորել է կամ դասի ժամանակ բարձրաձայն խոսել:

Դպրոցի տնօրենն էլ ցույց է տալիս 12-րդ դասարանի մատյանի էջը, որտեղ ոչ մի նշում չկա: Ուսուցչուհին նախորդ կիսամյակում դասարանի 10 աշակերտներից ոչ մեկին չի գնահատել, կիսամյակն էլ չի փակել: Իսկ այդ գնահատականները մինչև հունվարի վերջը պետք է ուղարկված լինեին Գնահատման և թեստավորման կենտրոն:

Տնօրենն ընդունում է, որ ինքը չափից դուրս հանդուրժող է եղել ու սպասում է, որ իրեն էլ նկատողություն կտան:

Քիմիայի և կենսաբանության ուսուցչուհի Մարինե Սարգսյանի բացատրությամբ, ամեն ինչ սկսվել է նրանից, որ 4 ամիս ոչինչ չարած աշակերտները գնահատական են պահանջում ու սպառնում:

Դպրոցի մանկավարժներն էլ են միացել ծնողների բողոքներին ու հաստատել, որ իրենց գործընկերը կիսամյակ չի ամփոփում ու  մանկավարժին անվայել պահվածք է դրսևորել տարիներ շարունակ: 30 հոգանոց մանկավարժական հանրույթն էլ նրա հետ խնդիրներ ունի, ինչի պատճառով ուսուցչուհին ուսուցչանոց չի մտնում և մատյան չի վերցնում:

Բացի դրանից, ըստ մանկավարժների, դասղեկները բազմիցս փորձել են հասկացնել նրան, որ աշակերտներին մեղմ վերաբերվի, բայց ոչինչ չի ստացվել, ու բողոքող ծնողների ու աշակերտների հանդեպ նրա վերաբերմունքն ավելի է սրվել: Նա բոլորին վախի ու սթրեսի մեջ է պահել:

Իսկ Մարինե Սարգսյանը, աշակերտների ստուգողականների տետրերը ձեռքին, Շիրակի մարզպետի մոտ էր եկել: Գրավորները, ըստ նրա, շատ վատն են` 12-րդ դասարանցիները, նրա խոսքով, 9-րդ դասարանի ծրագրով էլ ստուգողական չեն կարողացել գրել, փոխարենը իր դեմ բողոք են հրահրել:

Քարաբերդի դպրոցում տիրող իրավիճակից մարզպետարանի կրթության վարչությունը տեղյակ էր: 15 օր առաջ են ծնողները գրավոր դիմում ներկայացրել:

Գրավոր բողոքը ուսուցչին խիստ նկատողություն տալու հիմք է դարձել: Բայց նկատողությունը միայն քիմիայի ու կենսաբանության ուսուցչին չի վերաբերում: Դպրոցից ևս 2 մանկավարժ է նկատողություն ստացել: Տնօրենի նկատմամբ որոշումն էլ, ըստ կրթության վարչության պետի, մարզպետարանը կկայացնի ավելի ուշ:

Մարինե Սարգսյանին աշխատանքից հեռացնելը, ըստ դպրոցի տնօրենի, անխուսափելի է, կքննարկվի մոտ օրերս: Բայց ուսուցչուհին էլ արդեն փաստաբան է վարձել, որ դատարանում վիճարկի իրեն աշխատանքից ազատելու հնարավոր որոշումը: Նա Քարաբերդի դպրոցում ամենաշատ դասաժամեր ունեցող ու ամենաբարձր վարձատրվող ուսուցչուհին է: