Նախահեղափոխական արժեքների վերակենդանացման ցանկացած փորձ կկասեցնեմ. Փաշինյան

Դատավորներին սոցիալական երաշխիքներ տալով՝ մենք հնարավորություն ենք տալիս հասարակությանն օգտվել անկախ դատական համակարգի ծառայություններից. այսպիսի միտք արտահայտեց Նիկոլ Փաշինյանը՝ պարզաբանելով, թե ինչին է միտված դատավորներին սոցփաթեթում ներառելու մասին որոշումը: Մանրամասնեց.

«Զեյնալյանը ճիշտ նշեց, որ առնչվում է ոչ միայն ՀՀ դատավորներին, այլև քաղաքացիների անկախ դատական համակարգի ծառայություններից օգտվելու իրավունքից, մենք համոզված ենք, որ պետության զարգացման համար դատական համակարգի 100 տոկոսով անկախությունը կարևոր է: Սրանով լուծում ենք հարց ոչ միայն դատավորների համար, այլև ՀՀ քաղաքացիների համար, պետք է հնարավոր պայմանները ստեղծենք, որ դատավորները սրա-նրա ձեռքին նայելու անհրաժեշտություն չունենան: Պետք է խստորեն պայքարենք կամայական որոշումների դեմ, մյուս կողմից քայլեր ձեռնարկենք, որ ծագման սոցիալական բաղադրիչը հնարավորինս ընդլայնենք»:

Վարչապետը փորձելով կայացրած որոշման մեկ արդարացում ներկայացնել՝ համեմատականներ տարավ՝ նշելով, որ սոցիալական փաթեթից օգտվող քաղաքացիների թիվն ընդլայնվել է 250 հազարով, իսկ դատավորների թիվը մոտ 250-ն է:

«Մենք այսօր հասել ենք թափանցիկության պետական կառավարման աննախադեպ մակարդակի, որը հնարավորություն է տալիս բաց, ուղիղ, ազնիվ, բայց ոչ ափալ-թափալ որոշում ունենալ: Կարող ենք պետբյուջեի ծախսերը պլանավորել, երբվանից պետք է ուժի մեջ մտնի, բայց պետական կառավարման համակարգի գրավչությունը որակյալ աշխատուժի համար պետք է բարձրացվի, դրանից է կախված քաղաքացիների կյանքում տեղի ունեցող փոփոխությունների որակը և արդյունավետությունը»,- ասաց նա՝ հավելելով.

«Կարող ենք գերանդին առնել և ամբողջ պետական համակարգը մաքրել, հնձել բոլորին, բայց կառաջանան հետևանքներ, որոնք տասնյակ տարիներով հնարավոր չի լինի հաղթահարել, պետական կառավարման համակարգը զգայուն է»:

Նա շեշտեց, որ պետք է գործել հեղափոխության բերած արժեքների տրամաբանության շրջանակներում, շեշտեց, թե նախկին արժեքների վերակենդանացումը պետք է բացառել:

«Սա հոկտեմբերյան սոցիալիստական հեղափոխությունը, չէ, որտեղ հաղթողները պատերի տակ գնդակահարում են պարտվողներին կամ բաժանում սպիտակների և կարմիրների, մեր դեպքում՝ սպիտակների և սևերի, ըստ այդմ են գործում, սա սիրո և համերաշխության հեղափոխությունն է, յուրաքանչյուրը պետք է նոր արժեքային համակարգը որդեգրելու շանս ունենա: Նախահեղափոխական արժեքներն ու հարաբերությունները շանս չունեն վերակենդանանալու, ես դա համարում եմ իմ պարտավորությունը, և վերակենդանացման ցանկացած փորձ կկասեցնեմ, լինի ասֆալտին փռելով, լինի պատերին տալով կամ որևէ այլ օրինական միջոցներով»,- հայտարարեց Փաշինյանը: