Մեզ համար անհասկանալի է, թե էս ամբողջ աժիոտաժն ինչու է բարձրացվել. Սիլվա Ադամյանը` կոկորդիլոսաբուծարան հիմնելու մասին

Այսօր բնապահպաններն իրենց մտահոգություններն են հայտնել Արարատի մարզում կոկորդիլոսաբուծարան բացելու տեղեկության առնչությամբ: «Civil voice» կազմակերպության ներկայացուցիչ Նարինե Սահակյանը կոկորդիլոսաբուծարան բացելու հետ կապված մի քանի  հարցում է ուղարկել տարբեր գերատեսչություններ և փորձել պարզել կոկորդիլոսաբուծարան բացելու օրինական հիմքերն ու նպատակները:

Նա պատմել է, որ կոկորդիլոսաբուծարան հիմնելու ծրագրի մանրամասներին ծանոթանալու համար առաջինը դիմել են բնապահպանության նախարարություն և տեղեկություն ստացել, որ ծրագրի հեղինակ կազմակերպությունը հայտ չի ներկայացրել շրջակա միջավայրի փորձաքննություն անցնելու խնդրով: Այս բացթողնման մասին բնապահպանները տեղեկացրել են նաև կոկորդիլոսաբուծարան հիմնողներին, սակայն որոշ ժամանակ անց տեղեկացել են, որ այդ կազմակերպությունը սկսել է տարածքում աշխատանքներ իրականացնել բուծարանի հիմնման մասին: Բնապահպանները կասկածներ են ունեցել, որ այդ ծրագիրը սկսել են մի շարք օրենքներ շրջանցելով:

«Պարզելու համար մենք դիմել ենք մի շարք նախարարությունների ու տեսչական մարմինների և խնդրել ենք մասնագիտական եզրակացություններ տալ»,- պատմել է Նարինե Սահակյանը:

Սահակյանը նույնպես այն կարծիքին է, որ Հայաստանում կոկորդիլոսաբուծարան հիմնելը առաջին հերթին ռիսկի տակ է դնում շրջակա միջավայրի անվտանգությունը: Նա նշում է, որ այս տարվա փետրվարին կոկորդիլոսաբուծարանի հիմնադիրն ասուլիս է տվել և ներկայացրել է մանրամասները:

«Այս ամենի համար մենք կրկին դիմեցինք բնապահպանության նախարարություն: Ի դեպ, իրենք նշեցին ու հաստատեցին, որ 2019-ի փետրվարի 12-ի դրությամբ Դաշտավանի համայնքապետարանի կողմից որևիցե հողհատկացում չի կատարվել  և առհասարակ առանց շրջակա միջավայրի փորձաքննության դրական եզրակացության կազմակերպությունը չի կարող ոչ մի գործունեություն ծավալել: Տեղեկությունը չի համապատասխանում իրականությանը»,- ասել է Նարինե Սահակյանը:

Այս ամենին ի հավելում` բնապահպան Սիլվա Ադամյանը նկատել է, որ փաստորեն իրենց՝ բնապահպաններին չեն կարողանում հստակ պատասխան տալ և ուղղորդում են դեպի բնապահպանության նախարարություն:

«Մեզ համար անհասկանալի է, թե էս ամբողջ աժիոտաժն ինչու է բարձրացվել, եթե էսօրվա դրությամբ որևէ փաստաթուղթ չկա, որը կապացուցի, որ այս մարդիկ նման գործունեություն են ծավալել: Այս ամբողջ բեռը, ես կարծում եմ, պետք է ընկնի Արարատի մարզպետի վրա, որովհետև ամբողջ աժիոտաժն ու սկանդալն ինքն է բարձրացրել ու պիտի պատասխան տա այս իրավիճակի համար: Մենք հետևելու ենք, թե ինչ է կատարվելու»,- ասել է Սիլվա Ադամյանը: