«Վրացական երազանք-ժողովրդավարական Վրաստանը» սկսում է կուսակցության շարքերը համալրել նոր անդամներով: Իշխող կուսակցությունում չեն բացառել, որ արդեն ընթանում է հավաքագրման գործընթաց, որին մասնակցում են ինչպես կուսակցության առաջնորդները, այնպես էլ պատգամավորներն ու կուսակցության քաղաքային և շրջանային կազմակերպությունների ներկայացուցիչները:
Նրանց գնահատմամբ` կուսակցության շարքերի թարմացումը մշտական գործընթաց է, սակայն ինչպես նշել է խորհրդարանի նախագահ Իրակլի Կոբախիձեն, այս դեպքում կա կոնկրետ խնդիր՝ 2020 թվականի խորհրդարանական ընտրություններին առավել պատրաստ ներկայանալ:
«Վրացական երազանքի» ներկայացուցիչների խոսքերով՝ նոր դեմքերի փնտրտուքը հիմնականում իրականացվում է հասարակության շրջանում ճանաչում ունեցող մարդկանց շրջանում: Հատուկ շեշտ է դրվում նաև երիտասարդների ներգրավվածության վրա:
Տարածված տեղեկատվության համաձայն` կուսակցությունում շարքերը համալրելու գործի կազմակերպումը հանձնարարված է կուսակցության գլխավոր քարտուղար Կախա Կալաձեին:
