Ադրբեջանի բանակը գիշերը սկսել է իր խոշոր, հարձակողական սցենարով զորավարժությունը

Ադրբեջանի բանակը, դեռ լույսը չբացված, սկսել է իր այս տարվա առաջին խոշոր զորավարժությունը, որին ներգրավել է մոտ 10․000 զինծառայող։ 4 օր՝ մինչև մարտի 15-ը տևող զորավարժության ընթացքում ներգրավվելու է նաև մեծ ծավալի զինտեխնիկա․

• 500 միավոր տանկեր, զրահատեխնիկա, հատուկ և տրանսպորտային մեքենաներ,
• 300 միավոր հրետանային ու հրթիռային տեխնիկա, որոնց թվում՝ նաև ականանետներ,
• 20 միավոր բանակային ու ճակատային ավիացիա, այդ թվում՝ ուղղաթիռներ։

Հայաստանի ՊՆ խոսնակն արդեն հայտնել է, որ սա Վիեննայի փաստաթղթի խախտում է․ Ադրբեջանը պարտավոր էր համապատասխան խողովակներով նախապես զգուշացնել սպասվող զորավարժության մասին։ Իսկ Արցախի նախագահի խոսնակը SHANTNEWS.am-ի հետ զրույցում տեղեկացրեց, որ Արցախում էլ Պաշտպանության բանակը բերվելու է մարտական պատրաստության համապատասխան աստիճանի։

https://www.facebook.com/SHANTNEWS.am/videos/2004195443031688/?v=2004195443031688

Այս զորավարժությունն աչքի է ընկնում ներգրավվող բանակային անձնակազմի ավելի «համեստ» թվով։ Մինչ այս, ավելի մեծ թվեր էին հայտարարվել, որոնց հավաստիությունը կասկածելի էր։ Իսկ այս մեկն ավելի հավաստի է թվում։ Մինչ այս, հայտարարվել են այսպիսի թվեր․

Այս զորավարժությունները ադրբեջանական կողմը հաճախ օգտագործում է նաև քարոզչություն իրականացնելու կամ բանակցային գործընթացի վրա ճնշում բանեցնելու համար։ Այսպես, մարտի 11-ին մեկնարկելիք զորավարժությունն ունի հետևյալ սցենարային կետերը․

• հարձակողական գործողության նախապատրաստում,
• հարվածներ հակառակորդին մի քանի ուղղությամբ,
• պաշտպանության ճեղքում և զորախմբերի ջախջախում,
• պաշտպանության խորքում տեղակայված ռազմական ու ռազմավարական օբյեկտների ուղղությամբ հրթիռային հարվածներ։

Այս ամենը, թեև չի հայտարարվում, բայց նախատեսվում է իրականացնել Արցախի պաշտպանությունը ճեղքելու համար։ Իսկ նախորդ նմանատիպ խոշոր զորավարժության ժամանակ՝ 2018 թվականի սեպտեմբերին, բացահայտ հայտարարվեց, որ զորավարժության սցենարը Արցախի բանակի պաշտպանության ճեղքումն է։

Այս զորավարժությունները, ի դեպ, անցկացվում են նաև միջազգային պարտավորությունների խախտումներով, քանի որ նմանատիպ մասշտաբի զորավարժություն անցկացնելիս ադրբեջանական կողմը պարտավոր է Վիեննայի փաստաթղթին միացած երկրներին, այդ թվում և Հայաստանին նախապես տեղեկացնել այդ մասին՝ լարումից խուսափելու համար։

Բայց այս պարագայում Բաքվի նպատակներից մեկը հենց լարում ստեղծելն է, քանի որ ադրբեջանական կողմը խոստանում է առաջիկա զորավարժության ընթացքում կիրառել նոր գնված սպառազինություն ու իրականացնել հրթիռային արձակումներ։ Ակնարկը, ենթադրաբար, վերաբերում է իսրայելական «Լորա» և բելառուսական «Պոլոնեզ» հեռահար հրթիռային համալիրներին, որոնք նոր են գնվել ու արդեն ցուցադրվել են նախորդ խոշոր զորավարժությունների ժամանակ։