Ավագանին քննարկում է Ազատության հրապարակի ստորգետնյա ավտոկայանատեղին հավատարմագրային կառավարման հանձնելու որոշման նախագիծը

Այսօր` մարտի 22-ին, Երևան քաղաքի ավագանին գումարել է արտահերթ նիuտ: Օրակարգային առաջին հարցով քննարկվում է Ազատության հրապարակում գտնվող ստորգետնյա ավտոկայանատեղին հավատարմագրային կառավարման հանձնելու վերաբերյալ որոշման նախագիծը:

Նախագիծը  ներկայացրեց Քաղաքապետարանի Զարգացման և ներդրումայն ծրագրերի զարգացման պետ Տիգրան Սարգսյանը, ով նշեց, որ փոքր Կենտրոնը տրանսպորտային միջոցների կայանումից ազատելու և ստացիոնար կայանատեղեր ապահովելու նպատակով կառուցվել և շահագործման է հանձնվել ստորգետնյա ավտոկայանատեղի, որ նախատեսված է շուրջ 500 մեքենայի համար: Ավտոկայանատեղին եռահարկ է, ստորգետնյա ավտոկայանտեղիները միմյանց միջև փոխկապակցված են մեքենաների երթևեկության համար նախատեսված թեքամուտքերով, իսկ հետիոտների համար` աստիճաններով և չորս վերելակներով:

«2013-2018թթ ֆինանսական ցուցանիշների վերլուծությունը ցույց է տալիս, որ ավտոկայանատեղին գործում է թերբեռնված` հատկապես ձմռան ամիսներին: Նոյեմբեր-ապրիլ ժամանակահատվածում օգտվողների թիվն ավելի փոքր է, քան մայիս-հոկտեմբեր ամիսներին: Շուրջ 10 տարի առաջ տեղադրված գործող տեսահսկման համակարգն ունի արդիականացման անհրաժեշտություն: Նախատեսվում է մուտքի և ելքի ավտոմատ վճարման համակարգի տեղադրում, ինչպես նաև հիմնական վերանորոգման աշխատանքներ: Շահագործման հանձնելուց առ այսօր լուսային համակարգը փոփոխության չի ենթարկվել և նախատեսվում է  նաև արդիականացնել այդ համակարգը` տեղադրել էներգախնայող լուսատուներ: Ներդրումների իրականացման արդյունքում նախատեսվում է կայանատեղերի հագեցվածությունը զգալիորեն մեծացնել», – ասաց Տիգրան Սարգսյանը:

Այս որոշման նախագծով առաջարկվում է թույլատրել Երևանի քաղաքապետին՝ օրենսդրությամբ սահմանված կարգով հայտարարել մրցույթ՝ Ազատության հրապարակում գտնվող ստորգետնյա ավտոկայանատեղին  հավատարմագրային կառավարման հանձնելու վերաբերյալ, սահմանել, որ մրցույթին իրավունք ունեն մասնակցել այն իրավաբանական անձինք և անհատ ձեռնարկատերերը, ովքեր.

1) անշարժ գույքի հավատարմագրային կառավարման ոլորտում ունեն
առնվազն երեք տարվա փորձ.
2) վերջին երեք տարվա ընթացքում ունեն տարեկան միջին հաշվարկային
առնվազն 300,000,000 դրամի շրջանառություն:

Արդյունքում նախատեսվում է ավելացնել կառավարման արդյունավետությունը, ավտոկայանտեղիներից օգտվողների թիվը, բարձրացնել մատուցվող ծառայությունների որակը, մեծացնել ֆինանսական մուտքերը, բարձրացնել սպասարկման ծախսերի արդյունավետությունը, նպաստել երթևեկության բարելավմանը և փոքր Կենտրոնում խցանումների նվազմանը:

Ավագանու անդամ Իզաբելլա Աբգարյանը հարցրեց` արդյո՞ք պայմանագրային կառավարիչն իրավունք կունենա փոխելու սակագինը քաղաքացիների համար: Ի պատասխան` Տիգրան Սարգսյանն ասաց.

«Ատոկայանատեղի վճարը հաստատվում է ավագանու կողմից յուրաքանչյուր տարվա համար ավագանու որոշմամբ և դա տեղական վճար է, այս պահին գործում է դեկտեմբերի 25-ին հաստատված վճարի չափը, մեկ ժամվա համար` 200 դրամ, մեկ ամսվա համար` 20 հազար դրամ»: