Գյումրիի կրթամշակութային 3 կառույց նախատեսվում է տեղակայել քաղաքապետարանի նկուղային հատվածում

Գյումրիի Սերգեյ Համբարձումյան 35 շենքը 30 տարի է, ինչ կենտրոնական գրադարանի անփոփոխ հասցեն է, գրադարանը այստեղ է տեղավորվել 1988-ից հետո: Այն քաղաքի պատմամշակութային` 19-րդ դարի վերջի կառույցներից մեկն է, եղել է մանկապարտեզ: Պատմական շենքի պատերին արտաքինից քարաթափումներ են, իսկ ներսում` հենց մուտքի մոտ, փայտե առաստաղն արդեն կախվել է բաց տանիքի պատճառով: Տեղումների ազդեցությունն էլ պարզ երևում է ներսում: Այս մասին հայտնում է SHANTNEWS.am-ի թղթակիցը:

Առաստաղի փլուզում սանհանգույցի հատվածում մեկ տարի առաջ է եղել: Բաց տանիքից ներս լցվող անձրևաջրերը, պարզվում է, գրքերը չեն վնասում, իսկ թե ինչպես են դրանք պաշտպանում տեղումներից, պարզվում է, միայն գրադարանավարներից է կախված:

30 հազար կտոր գրականության պահպանման համար հարմարություններ չկան, հարյուրավոր գրքերի տեղը պատուհանագոգերն ու հատակն են: Շենքը ջեռուցվում է գազի վառարանով:

Գրադարանի աշխատակիցները մեկ սենյակում համատեղում են մի քանի բաժնի աշխատանք: Պայմանների բարելավում գուցե խոստանա քաղաքապետարանի նոր նախագիծը, որը ոչ թե վերանորոգում, այլ տեղափոխման տարբերակ է նախատեսում: Կենտրոնական գրադարանը նպատակ կա տեղափոխել քաղաքապետարանի նկուղային հատված:

Ի՞նչ կարող է լինել նկուղում. այն, ինչ անօգտագործելի է կամ պահեստավորելու: Նույն պատկերն էր նաև  քաղաքապետարանի նկուղում: Բայց տարածքը, ըստ նախագծողների, հարմար է նպատակային օգտագործելու համար: Համաձայն էսքիզի` 276  քառակուսի մետր տարածքում կենտրոնական գրադարանի 17 աշխատակիցներն ու 30 հազար կտորից ավելի գրականությունը կարող են տեղավորվել:

Գրադարանին 276 քառակուսի մետր է հասնելու, բայց նկուղի մակերեսը ավելին է՝ 1600 քառակուսի մետր է, նախագծա-նախահաշվային փաթեթով մի հատվածում կբացեն «Կումայրի» արգելոց-թանգարան ու կցուցադրեն պատմամշակութային հարուստ ժառանգությամբ քաղաքի 6000-ից ավելի նմուշները` սկսած բրոնզե դարից:

Այս նմուշները մեկ ամիս առաջ են բերվել քաղաքապետարանի նկուղ. դրանք համարակալված են, արգելոց-թանգարանի գրանցամատյանում ունեն իրենց անձնագրերը: Դեռ հազարավոր նմուշներ տեղափոխման ենթակա են: Պատմական ժառանգություն հանդիսացող իրերը երբևէ չեն ցուցադրվել:

Կառավարության համաֆինանսավորման հույսով գրված նախագիծն այս նկուղում միայն գրադարան, թանգարան հիմնելով չի սահմանափակվում: Մշակութային քաղաքում պատկերասրահի բացակայության հարցն են ուզում փակել: Նախագծով առաջարկվում է նկուղում մեկտեղել նաև պատկերասրահը:

Քաղաքապետարանի նկուղը կրթամշակութային կենտրոնի վերածելու գաղափարն արդեն ամբողջական նախագծով կա: Սուբվենցիոն ծրագրում ընդգրկելու ցանկությամբ այն ուղարկվել է կառավարություն: Եթե այն հաստատվի, համաֆինանսավորման հարաբերակցությունը 60-40-ով է: Գումարի 60 տոկոսի չափաբաժինը քաղաքի բյուջեից է լինելու: