ԱԺ արտահերթ նիստում քննարկված նախագծերի քվեարկությունը, ի վերջո, կայացավ

Խորհրդարանում այսօր փորձում են քվորում ապահովել՝ քվեարկելու համար արտահերթ նիստում քննարկված և առաջին ընթերցմամբ ընդունված նախագծերը: Երեքժամյա ընդմիջումից և «Իմ քայլը» խմբակցության՝ Արցախ ուղևորվող անդամներին ճանապարհից հետ բերելուց հետո գրանցվել էր 80 պատգամավոր:

ԱԺ նախագահ Արարատ Միրզոյանը կոչ արեց աշխատասենյակներում գտնվող պատգամավորներին՝ գալ դահլիճ:

Որոշ ժամանակ անց քվորումն ապահովվեց. դահլիճում 91 պատգամավոր էր:

«Կարծում եմ՝ կարող ենք սկսել»,- ասաց Միրզոյանը:

Խորհրդարանում քվեարկության դրվեց «Ազգային ժողովի կանոնակարգ» Հայաստանի Հանրապետության սահմանադրական օրենքում լրացում կատարելու մասին և «Սահմանադրական դատարանի մասին» ՀՀ սահմանադրական օրենքում փոփոխություններ և լրացումներ կատարելու մասին օրենքի նախագծերի փաթեթը երկրորդ ընթերցմամբ և ամբողջությամբ ընդունելու հարցը:

«Իմ քայլը» խմբակցությունը վաղուց պլանավորած այց ուներ Արցախի Հանրապետություն, այդ պատճառով քվորումի խնդիր առաջացավ:

ԱԺ «Բարգավաճ Հայաստան» խմբակցության անդամ Գևորգ Պետրոսյանը նշեց, որ իրենք շահագրգռված են՝ օրենքի նորմը լինի հստակ ընկալելի, տեղիք չտա տարածական մեկնաբանությունների, ընդունելու դեպքում էլ կիրառումը լինի ոչ հակասական ու ոչ իրարամերժ:

«Այս ձևաչափից ելնելով՝ դրական ենք վերաբերվում նախագծին, նոր թեկնածու եզրույթը հասկանում ենք հետևյալ կերպ. անկախ անձից, արդեն իսկ առաջադրված թեկնածուն այս պահին բավարարում է «նոր թեկնածու» հասկացության չափանիշները, ընտրվելու դեպքում դառնում է ՍԴ անդամ, չընտրվելու դեպքում 7-րդ գումարման խորհրդարանում կարող է ներկայացվել նոր՝ դեռ չներկայացված թեկնածություն, որպիսին կարող է լինել ցանկացած անձ, այդ թվում՝ 6-րդում ներկայացված ու ԱԺ վստահությունը չստացած անձը»,- ասաց նա:

Պետրոսյանը նշեց՝ մտավախություն ունեն, որ հանկարծ տեղի չունենա իրավունքի չարաշահում, և նույն սուբյեկտն անընդհատ ԱԺ չներկայացնի նույն մարդուն, հակառակ դեպքում այստեղ ստիպված իրավունքի չարաշահման արգելքի սկզբունքի հետ կառնչվեն:

ԱԺ «Իմ քայլը» խմբակցության անդամ Վլադիմիր Վարդանյանը նշեց, որ իրենց խմբակցության մոտ ևս դիրքորոշումը չի փոխվել, «առաջադրում է նոր թեկնածու» արտահայտությունն ընկալվում է որպես «նախաձեռնվում է թեկնածուի ներկայացնելու նոր գործընթաց»:

ԱԺ «Լուսավոր Հայաստան» խմբակցության անդամ Տարոն Սիմոնյանը նշեց, որ այս քննարկումները որպես նախապատրաստական աշխատանքներ պետք է ընկալեն՝ նորն ստեղծելու ուղղությամբ:

«Լեզվաբանական կանոններ կան. գոյական՝ իրավասու մարմին, առաջադրում է՝ ստորոգյալ, ուղիղ խնդիր՝ նոր թեկնածու, այս պարզ տրամաբանությունից շեղվելու իրավունք չունենք. երբ գրված է «նոր թեկնածու», դա վերաբերում է և գործընթացին, և անձին»,- ասաց Սիմոնյանը:

ԱԺ «Իմ քայլը» խմբակցության անդամ Վահագն Հովակիմյանը նշեց՝ իր համար կարևոր է, որ իրենք չընդունեն օրենք, այդ թվում՝ սահմանադրական օրենք, որը կարող է գործընկերների կողմից հետագայում այլ կերպ մեկնաբանվել, այլ կերպ շահարկվել: Հովակիմյանն ասաց, որ չի քվեարկելու:

Վարման կարգի վերաբերյալ ելույթ ունենալով՝ «Իմ քայլը», «Լուսավոր Հայաստան» խմբակցությունները հայտարարեցին, որ որոշել են կողմ քվեարկել, «Բարգավաճ Հայաստան»-ը ևս միացավ կողմ քվեարկությանը՝ չփոխելով երեկվա դիրքորոշումը:

Նախագծերի փաթեթն ընդունվեց 83 կողմ ձայնով: