Ինչո՞վ է պայմանավորված գազի գնի թանկացումը. վարչապետը պարզաբանումներ պահանջեց

Կառավարությունը սկսել է հերթական նիստը: Մինչ մեկնարկը վարչապետ Նիկոլ Փաշինյանը խոսեց երկու կարևոր հարցի մասին: Ավտոգազալցման կայաններում գազի թանկացում է տեղի ունեցել: Հրավիրել է Շուկայի վերահսկողության տեսչական մարմնի ղեկավար Արմեն Կոտոլյանին: Ինչո՞վ է պայմանավորված, պատասխանատուն ներկայացրել է հետևյալը.

«Որպես այդպիսին գազի գնի փոփոխություն տեղի չի ունեցել: Ամսական, միջին հաշվարկներով, գազի խտությունը եղել է 7.1, վերջին օրերին «Հայռուսգազարդից» գազի միջին խտությունը գալիս է 7.9 -ով աճել է, հետևաբար տնտեսվարողները ծրագրային փոփոխություններ չեն արել, հետևաբար սպառողները ստիպված են եղել ավելի գումար վճարել, որի համար մեր մարմինը բոլոր տնտեսավորողներին տեղեկացրել է, որ ամեն օր փոփոխություն կատարեն դիսպենսերներում և ճիշտ խտություն տեղադրեն»:

Ըստ նրա տվյալների՝ ԱԳԼՃԿ-ներն ամեն օր պետք է գազի խտությունը համապատասխանեցնեն «Գազպրոմ Արմենիայի» տվյալների հետ: Կառավարությունը որոշում էր ընդունել, որ գազի վաճառքն իրականացվի կգ-ներով, բայց այն դեռ ԱԺ-ն չի ընդունել, հետևաբար մինչ այդ պետք է շարունակեն խտությամբ վաճառել:

«ԱԳԼՃԿ-ների տերերի հետ զրուցել ենք, խնդրել, որ ամեն օր գազի խտություն ներմուծեն ծրագրի մեջ, որպեսզի քաղաքացիները ստիպված չլինեն ավել վճարել, դա որակում ենք որպես միտումնավոր կամ ոչ միտումնավոր չարաշահում»,- ասաց Կոտոլյանը:

Նիկոլ Փաշինյանը հետաքրքրվեց ՊԵԿ նախագահից, թե հնարավո՞ր է, որ սա ստվերի դեմ իրենց պայքարի հետևանք կարող է լինել, որի արդյունքում տնտեսվարողները փորձում են դժգոհություն արտահայտել:

«Տեսականորեն հնարավոր է, որովհետև գազալցակայանների աշխատարակները հնարավորություն ունեն և´ կիլոգրամներով, և´ մետր խորանարդներով խտություն ապահովեն, որի ցուցմունքը ամեն օր մարդկային գործոնով է պայմանավորված, ամեն օր մուտք է արվում խտության գործակից, որը տասնորդականների փոփոխության պարագայում կարող է ապահովեր ծավալների փոփոխություն»:

Այս տեղեկություններին հաջորդեց Փաշինյանը կոչն ու հորդորը: Նա հայտարարեց.

«Երեկ մանիպուլյատիվ տեղեկություններ էին տարածվում, որ կառավարության գործողության արդյունքում գազի գինը փոխվել է: Մանիպուլյատիվ տեղեկություն կար, որ կառավարության ընդունած օրենքի հետ է կապված: Նախ` դա դեռ չի քննարկվել ԱԺ-ում, երկրորդն էլ չի կարող գնի փոփոխության բերել, այստեղ ուրիշ խնդիր կա: Ոմանք ուզում են մանիպուլյացիա անել, և մեր վերաբերմունքը պետք է լինի կոշտ: Որոշ նախկին օլիգարխներ, ովքեր մտածում են, որ այս իրավիճակում կարող են մանիպուլյացիաներ անել, սխալվում են, որևէ մեկը թող մեր բարեկրթությունը չփորձի մեկնաբանել որպես թուլություն, թե չէ շատ դաժան հակահարված կստանա անձնապես, բոլորը առանց բացառության, որևէ մեկը թող չտրվի գայթակղության ժողովրդի վստահություն վայելող կառավարության հակահարվածի ուժը իր ծնոտին զգալու: Շուկայի վերահսկողության տեսչությունն ու ՊԵԿ-ը, մյուս մարմինները շատ արագ արձագանքում են և շատ խիստ պատժի կենթարկեն այն տնտեսվարողներին, ովքեր փորձում են մանիպուլյացիա անել, մենք կոմպրոմիս չունենք ստվերի դեմ պայքարում: Չլինի´ գազալցակայան, որ ՀԴՄ չխփի, եթե պիտի սնանկանան, թող սնանկանան,  ապօրինի, ժողովրդի ու պետության հաշվին հարստանալ չլինի»,- հայտարարեց Փաշինյանը:

Նա նշեց, որ սա նաև ազգային անվտանգության խնդիր է, հետևաբար, դիմելով ԱԱԾ տնօրեն Արթուր Վանեցյանին ասաց.

«Խոսքի և տեղեկատվության ազատությունը երաշխավորված է, բայց եթե մարդիկ միլիոններ են ծախսելու սոցցանցերում մանիպուլյացիաներ անելու համար, դա ազգային անվտանոգության խնդիր է: Սոցցանցերում կան հեղափոխության  դրոշներով մարդիկ, ովքեր բռնությունների կոչեր են անում, ընդհուպ նախկին իշխանության ներկայացուցիչների հասցեին՝ ցույց տալու համար, որ հեղափոխական շրջանակների հետ կապ ունեն»:

Նա պահանջեց հետևողական լինել այս հարցում ու անհրաժեշտ քայլեր ձեռնարկել նման մանիպուլյացիաները կանխելու համար: