Մարդիկ ասում են, որ ոտքի վրա կգնան, միայն թե տեղ հասնեն. SHANTNEWS-ի հարցազրույցը երթուղայինների աշխատանքի և խնդիրների մասին

Երեկվանից համացանցում բուռն քննարկում են երթուղայինի վարորդի պահվածքը, ղեկին ծխելը և քննարկումներում շատ օգտատերեր հետաքրքրվել էին, թե ինչ հաճախականությամբ են ստուգվում երթուղայինները, ինչպես են դրանք վերահսկվում, ինչպես են վարորդները աշխատանքի ընդունվում և այլն: Այս հարցերի պատասխանը SHANTNEWS.am-ը ստացել է  «Երևանտրանս» ընկերության փոխտնօրեն Մարտին Քալաշյանից:

-Ընդհանուր առմամբ, այժմ ի՞նչ վիճակում են երթուղայինները և ի՞նչ պարբերականությամբ են դրանք ստուգվում:

-Երթուղայինները հիմա միջին վիճակում են: Մենք պարբերաբար ստուգումներ ենք իրականացնում տարբեր երթուղիներում և որ մեքենաները, որ լինում են ոչ բարվոք, անսարք վիճակում, ապա մեր աշխատակիցները դադարեցնում են տվյալ երթուղայինի աշխատանքը, տրվում են ժամկետներ ու մեքենաները նորմալ վիճակի բերելուց հետո նորից թույլատրվում է դրանց շահագործումը:

-Իրական օրինակ պատմենք Ձեզ: Հենց օրեր առաջ երթուղայինում մի կին նստարանից դուրս եկած երկաթով պատռեց իր շորը: Այդ պարբերական ստուգում ասվածը քանի՞ օր, շաբաթ կամ ամիսը մեկ է լինում և արդյո՞ք բոլոր մեքենաներն են անցնում այդ ստուգումը:

-Մենք և՛ մեքենաների վիճակն ենք ստուգում, և՛  պայքարում ենք հիմնականում վարորդների կողմից սրահում ծխելու դեմ: Շաբաթվա մեջ խառը, այսինքն` երկուսին էլ վերահսկողություն իրականացնում ենք:

-Ինչպե՞ս են ընտրվում վարորդները:

-Իրենք պետք է ունենան հիմնականում վարորդական իրավունքի D կարգ, որով իրավունք է տրվում երթուղային վարել: Համապատասխան հանձնաժողով կա, և նրանք նայում են, ստուգում են և մրցույթ է լինում: Եթե բոլոր փաստաթղթերը համապատասխանում են սահմանված կարգին, այդ ժամանակ վարորդներին ընդունում են աշխատանքի և հրամանագրում են:

-Ըստ օրենքի՝ վարորդներին արգելված է մեքենայում ծխել, հեռախոսով խոսել, բարձր երաժշտություն լսել և այլն: Ինչպե՞ս եք վերահսկում այդ ամենը:

-Մենք ունենք համապատասխան աշխատակիցներ, որոնք ամենօրյա հսկողություն են իրականացնում՝ ծխելու, ղեկին բջջային հեռախոսով խոսելու և բարձր երաժշտություն միացնելու հետ կապված: Հիմնականում ծխելու հետ կապված, երբ մենք արդեն  հայտնաբերում ենք տվյալ վարորդներին, կազմում ենք համապատասխան արձանագրություն: Մեր կազմակերպությունը երթուղին սպասարկող կազմակերպության հետ ունի երթուղու սպասարկման ծառայությունների մատուցման պայմանագիր, որտեղ հստակ ֆիքսված է, որ եթե վարորդը ծխում է, ապա մեր կողմից կազմված է համապատասխան արձանագրություն, տուգանվում են իրենք: Հիմնականում մենք այնպես ենք անում, որ ընկերության կամ վարորդի գրպանին կպնենք, որպեսզի իրենք գոնե  զգոն լինեն:

-Ի՞նչ ծանրաբեռնվածությամբ են աշխատում, ինչպիսի՞ն է նրանց գրաֆիկը:

-Երթուղիներ կան, որ աշխատում են ժամը 07:00-23:00-ը, 10:00-21:30: Այսինքն՝ եթե լինում են փոխարինող վարորդներ, ապա այդ պայմաններում մի օր աշխատում են ծանրաբեռնված և հաջորդ օրը հանգստանում են: Այստեղ իրենց ծանրաբեռնվածությունը կապված է նրա հետ, որ փոխարինող վարորդներ չունեն և D կատեգորիայի վարորդների խնդիր ունենք: Հենց դրա համար շատերը ծանրաբեռնված են աշխատում:

– Երթուղայինում ուղևորների գերծանրաբեռնվածությունը սովորական է կարծես դարձել: Որքա՞ն է նստած ու կանգնած ուղևորների սահմանված քանակը ու արդյո՞ք վարորդներին զգուշացնում են ուղևորների տեղափոխման քանակության մասին:

-Դե, հիմնականում բոլորը նստած պետք է գնան, բայց քանի որ մեր երթուղայինները քիչ են, դրա համար այս պարագայում ստացվում է այն, ինչ ունենք և մարդիկ էլ ասում են, որ ոտքի վրա կգնան, միայն թե տեղ հասնեն: Նոր երթուղային ցանցն արդեն քննարկման փուլում է, նոր ավտոբուսներ են բերելու և առաջիկայում բոլոր հարցերը կկարգավորվեն: Դժգոհությունը, ոտքի վրա երթևեկելն արդեն դրանով կկարգավորվի: