Արվեստի բուհերի Գյումրիի մասնաճյուղերում ընդունելության հայտերի ընդունման առաջին փուլն ավարտված է

Սահմանափակ հատկացված տեղեր և դիմորդների գրեթե անփոփոխ թիվ … Այսպիսին է ընդունելության վիճակագրությունը արվեստի բուհերի Գյումրիի մասնաճյուղերում: Այս բարձրագույն ուսումնական հաստատությունները ունեն մեկ յուրահատկություն՝ շրջանավարտների թվի աճը կամ նվազումը նրանց ընդունելության ցուցանիշների վրա քիչ է ազդում ու սա պայմանավորված է սրանով, որ արվեստի բուհերը տաղանդավոր դիմորդների համար են: Կոնսերվատորիայի, թատրոնի և կինոյի ինստիտուտի և գեղարվեստի ակադեմիայի մասնաճյուղում դիմորդների հայտերի ընդունման առաջին փուլն ավարտված է և արդեն ունեն այնքան դիմորդ, որքան հատկացված պլանային տեղերն են:

Վոկալ, երաժշտագիտություն, գործիքային կատարողականություն, երաժշտական կրթություն … 4 հիմնական մասնագիտություններն են, որտեղ կոնսերվատորիայի Գյումրիի մասնաճյուղը ընդունելություն է կատարում: Բնատուր տվյալները պարտադիր է, աշխատասիրությունը՝ ցանկալի: Սա է այս բուհի դիմորդներին ներկայացվող պարտադիր պահանջը, իսկ բարձր գնահատականը պարտադիր է անվճար տեղերը զբաղեցնելու համար: Կոնսերվատորիային ամեն տարի նույն, անփոփոխ ու խիստ սահմանափակ պետպատվերի տեղեր են հատկացվում:

«Մեզ հատկացվել է 10 պետպատվերի տեղ և անսահմանափակ քանակով վճարովի տեղեր։ Մի հետաքրքրիր երևույթի ենք ականատես, որ մեզ դիմում են ուսանողներ, ովքեր տարբեր պատճառներով նախորդ տարիներին դուրս էին մնացել բուհից։ Մեր համակարգն այնպիսին է, որ նրանք կարող են հեշտությամբ վերականգնվել։ Նրանք վարձավճարի, առաջադիմության պատճառով դուրս մնացած ուսանողներն էին»,- SHANTENWS.am-ի հետ զրույցում նշել է կոնսերվատորիայի Գյումրիի մասնաճյուղի տնօրենի ժամանակավոր պաշտոնակատար Հասմիկ Հարությունյանը։

Գրեթե անփոփոխ թվով դիմորդներ միշտ ունենում է նաև թատրոնի և կինոյի պետական ինստիտուտը: 30-35 պլանային տեղերը լրացվում են: 6 բաժիններում 26 դիմորդ ունեն առաջին փուլից հետո: Հստակ սահմանված ու սահմանափակ քանակով ուսանող ունենալը իր բացատրությունն ունի՝ մեծ թվով ռեժիսորների, դերասանների, պարուսույցների ու օպերատորների պահանջարկ չկա:

Արվեստի բուհերն էլ մյուսների նման բացառություն չեն՝ նվազագույն շեմը հաղթահարելը բավարար է ուսանող դառնալու համար: Գեղարվեստի պետական ակադեմիայի Գյումրիի մասնաճյուղում առայժմ մրցակցություն գեղանկարչություն բաժնում է՝ 10 տեղի համար 11 դիմորդ կա: Այստեղ էլ մրցակցությունը տաղանդի մեջ է: Սա արվեստի երեք բուհերի ընդհանրությունն է: Արվեստի բուհերում ընդունելության առաջին փուլն ավարտվել է հունիսի 1-ին, իսկ հունիսի 25-ին մեկնարկում է երկրորդ փուլը:

Այն բանակից զորացրվածների և միջին մասնագիտական ուսումնական հաստատությունների շրջանավարտների համար է: