Քրեական հետապնդումը պետք է դադարեցվի. Խաչատուրյան քույրերի փաստաբանների հայտարարությունը

Մոսկվայում իրենց հոր՝ Միխայիլ Խաչատուրյանի սպանության մեջ մեղադրվող Անգելինա, Քրիստինա և Մարիա Խաչատուրյանների փաստաբանները դիմում-բողոք են ներկայացրել ՌԴ քննչական կոմիտեի ղեկավար Ալեքսանդր Բաստրիկինին: Դրանում, մասնավորապես, ասված է.

«Նախորդ ուրբաթ քննությունը Խաչատուրյան քույրերին մեղադրանք է առաջադրել. նրանց բոլոր հնարավոր մեղադրանքներից ամենածանրն է ներկայացվել՝ նախնական համաձայնությամբ խմբակային սպանություն: Քույրերին 8-20 տարվա ազատազրկում է սպառնում: Դատարանը, փաստորեն, հաշվի չի առել, որ հետաքննությունը պարզել է՝ քույրերը երկար տարիներ ապրել են հոգեկան ծանր, տրավմատիկ վիճակում: Մի քանի տարի շարունակ Միխայիլ Խաչատուրյանը դուստրերի նկատմամբ ֆիզիկական և սեռական բռնություն է կիրառել՝ օգտվելով նրանց՝ իրենից կախվածության հանգամանքից: Հոր պահվածքն աղջիկների հոգեկան աշխարհի վրա խորը հետք է թողել, ինչն ապացուցվում է փորձագիտական եզրակացություններով: Մեղադրանքի որակավորման հետ քույրերի փաստաբանները կտրականապես համաձայն չեն: Մենք պնդում ենք, որ քույրերն իրենց գործողությունները կատարել են՝ ելնելով Միխայիլ Խաչատուրյանի կողմից տարիներ շարունակ կիրառվող բռնությունից ինքնապաշտպանության անհրաժեշտությունից:

Կրտսեր քրոջ՝ Մարիայի փաստաբան Յարոսլավ Պակուլին.

«Իմ պաշտպանյալին ուրբաթ օրը առաջադրվել է նույն մեղադրանքը՝ Խմբակային սպանություն՝ նախնական համաձայնությամբ: Դատարանի որոշումը նախորդից տարբերվում էր միայն սպանության դրդապատճառի առավել մանրամասն նկարագրությամբ: Վստահ եմ, որ այս որոշումը դեռ կարժանանա թե Քննչական կոմիտեի, թե դատախազության քննադատությանը՝ նախքան գործի՝ դատարան ուղարկվելը: Հոր կողմից բռնությունը Մարիայի հոգեկան աշխարհի վրա խոր հետք է թողել: Նրա մոտ ախտորոշվել է «սթրեսի նկատմամբ սուր արձագանք», որի պատճառով Մարիան գործել է անմեղսունակ վիճակում, որը չի բացառում ինքնապաշտպանության անհրաժեշտությունը: Ես վստահ եմ, որ Մարիայի գործողությունները պետք է դիտարկվեն իբրև անհրաժեշտ ինքնապաշտպանություն»:

Միջնեկ քրոջ՝ Անգելինայի պաշտպան Ալեքսեյ Պարշին.

«Մենք կարծում ենք, որ քննության կողմից տրված որակավորումը հակասական է: Ելնելով հավաքված ողջ նյութից, բազմաթիվ փորձաքննությունների արդյունքներից, գործը պետք է կամ ընդհատվի, կամ այլ որակավորում ստանա: Այն փաստը, որ աղջիկների գործողությունները թելադրված են եղել տուժածի գործողություններով, նշվել է քննության կողմից ու հաստատվել փորձաքննություններով: Մենք պնդում ենք, որ աղջիկների կողմից հարձակումը եղել է՝ ի պատասխան հոր կողմից կիրառվող բարոյական և ֆիզիկական, այդ թվում՝ սեռական բնույթի բռնության: Փորձագետները ավելի քան 20 դատական փորձաքննություն են անցկացրել, որոնց վերլուծությունն ապացուցում է՝ աղջիկների հայրը բազմիցս սեռական ոտնձգության է դիմել նրանց նկատմամբ: Իբրև հիմնական վարկած՝ քննությունը պետք է դիտարկի ինքնապաշտպանության անհրաժեշտությունը, իսկ Միխայիլ Խաչատուրյանի դեմ հետմահու պետք է քրեական գործ հարուցել»:

Ավագ քրոջ՝ Քրիստինայի փաստաբան Ալեքսեյ Լիպցեր.

«Իմ պաշտպանյալը փաստացի մասնակից չի եղել հանցագործության կատարմանը, և դա օբյեկտիվորեն հաստատվել է: Բայց քննությունը կատարված հանցագործությանը Քրիստինայի՝ մասնակից չլինելու հանգամանքին պատշաճ գնահատական չի տվել: Քույրերը պետք է մեղավոր ճանաչվեն, քանի որ անհրաժեշտ ինքնապաշտպանության վիճակում էին: Չնայած քննությամբ տրված եզրակացությանը, որ, ի տարբերություն Մարիայի, Անգելինան ու Քրիստինան հանցանքի պահին կարող էին գիտակցել կատարվող գործողությունների բնույթը, նրանց հոգեբանության մեջ ևս որոշակի խախտումներ են արձանագրվել: Իսկ դրանք հետևանքն են եղել հոր կողմից իրականացվող անօրինական գործողությունների, որոնք աղջիկների համար հոգետրավմատիկ վիճակ են ստեղծել:

Մեղադրող կողմի վարկածով՝ դա եղել է հանցանքի կատարման դրդապատճառ. Միխայիլ Խաչատուրյանը աղջիկների կյանքն ուղղակի անտանելի է դարձրել: Դատարանը նաև պարզել է, որ աղջիկների նկատմամբ բռնություն է կիրառվել տևական ժամանակ: Մարիայի ու Անգելինայի գործողությունները միտված են եղել՝ դադարեցնելու անխուսափելի և ահաբեկող հանցագործությունները, որ կատարվում էին իրենց և քրոջ՝ Քրիստինայի նկատմամբ»:

Մենք՝ փաստաբաններս, ընդհանուր դիրքորոշում ենք հայտնում. մեր պաշտպանյալները զոհեր են՝ դաժան բռնության ու ցինիկ անպատժելիության, նրանք չեն կարող դատապարտվել կանխամտածված սպանության համար: Ներկայում որևէ մեկը չի վիճարկում այն հանգամանքը, որ աղջիկներն ապրել են մի իրավիճակում, երբ նրանցից յուրաքանչյուրն ամեն պահի վտանգ է զգացել՝ սեփական կյանքի ու քույրերի կյանքի համար: Հարաբերական մեկուսացման պայմաններում նրանք վստահ են եղել, որ չեն կարող արտաքին օժանդակություն ստանալ, ինչն իրավիճակն անելանելի էր դարձնում:

Մենք շարունակում ենք պնդել, որ աղջիկներն անմեղ են, քանի որ նրանց գործողությունները միտված են եղել՝ դադարեցնելու դաժան ու անխուսափելի հանցագործությունը, որ կատարվում էր իրենց նկատմամբ: Մենք կարծում ենք, որ Մարիան, Անգելինան ու Քրիստինան գտնվել են անհրաժեշտ պաշտպանության իրավիճակում, և նրանց նկատմամբ քրեական հետապնդումը պետք է դադարեցվի»: