Պատվոպահակային վաշտում ծառայելու համար ինչպե՞ս է կատարվում նորակոչիկների ընտրությունը

Ամառային զորակոչի շրջանակներում շարքային կազմի պարտադիր զինվորական ծառայության զորակոչի ենթակա քաղաքացիներին զինված ուժերի պատվո պահակային վաշտում զինվորական ծառայության նշանակելու նպատակով այսօր N զորամասի տարածքում իրականացվում էր զորակոչիկների ընտրություն:

Պատվո պահակային վաշտում ծառայելու պատրաստ թեկնածուների խիստ ընտրություն է կատարվում: Մասնակիցները պետք է ունենան 1.80-1.90 սմ հասակ, լինեն ֆիզիկապես առողջ ու բարետես: Հանձնաժողովում, սպայակազմից բացի, ընդգրկվում են հոգեբան, ոստիկանության աշխատակից:

Հանձնաժողովի նախագահը գնդապետ Աշոտ Հակոբյանն է: Հենց նա է եղել այս ստորաբաժանման առաջին հրամանատարը: Այսօր N զորամասի հրամանատարն է:

«Ընտրության ժամանակ հատուկ ուշադրություն դարձնում ենք նախ` հասակին, արտաքին տեսքին, մարմնի կառուցվածքին և համաչափությանը: Այն պետք է համապատասխանի մեր չափանիշներին: Ուշադրություն դարձնում ենք նաև քայլի տեսակին, որ մեր հետագա աշխատանքը անարդյունք չլինի»,- ասում է գնդապետ Հակոբյանը:

Նրա խոսքով՝ նույնիսկ գեղեցկության մրցույթների ժամանակ, երբ կանայք քայլում են բեմում, քայլի այդ ձևը զինվորական քայլվածքից է վերցված: Նորակոչիկների ընտրություն նաև երեկ են կատարել, այսօր վերջին օրն էր: Գնդապետն ասում է՝ դեռ լավ տպավորություն ունի:

«Շատ լավ է, որ մեր երիտասարդների մոտ մեծացել է ցանկությունը մասնակցելու այս ընտրությանը, մանավանդ  Աբու Դաբիում մեր վերջին ցուցադրական ելույթներից հետո: Ամբողջ աշխարհը գնահատական տվեց մեզ, և մենք էլ պատրաստվում ենք առաջիկայում հաղթանակի 75-ամյակի մեծ շքերթին մասնակցելու»,- նշում է Աշոտ Հակոբյանը:

Հիշեցնենք, որ Հայաստանի պատվո պահակային վաշտը վերջերս տպավորիչ ելույթ է ունեցել նաև Աբու Դաբիում IDEX-2019 ցուցահանդեսի շրջանակներում:

Աշոտ Հակոբյանի դիտարկմամբ՝ նորակոչիկների հետ աշխատանքի համար երկար ժամանակ է պահանջվում, բայց աշխատանքի ժամկետը կրճատվում է ճիշտ ընտրության շնորհիվ:

«Ճիշտ ընտրության ժամանակ հեշտ է լինում իրենց հետ աշխատելը, հեշտ ենք հասնում արդյունքի, մենք մեր առջև դրած խնդիրը 1993 թվականից մինչև այսօր կատարել ենք պատվով, թե՛ մեր երկրում պետական միջոցառումների ժամանակ, թե՛ արտերկրում: Այսօր առավոտյան մեր սպան մեր զինվորների հետ մեկնել է Մինսկ` ներկայացնելու Հայաստանի Հանրապետությունը, մեր դրոշը, մասնակցելու շքերթին, որը տեղի է ունենալու Մինսկում՝ Բելառուսի ազատագրման առիթով»,- տեղեկացնում է գնդապետը:

Աշոտ Հակոբյանի խոսքերով՝ իրենց զինծառայողների պատրաստվածության մակարդակը շատ բարձր է. մասնակցել են տարբեր միջոցառումների, դիմավորել-ճանապարհել են շատ երկրների նախագահների, վարչապետների, պաշտպանության նախարարների և այլ բարձրաստիճան պաշտոնյաների ու միշտ պատվով կատարել իրենց առջև դրված խնդիրները:

Աշոտ Հակոբյանը իրենց ստորաբաժանման հաջողությունների մասին խոսելիս շատ օրինակներ է թվարկում: Պատմում է՝ 2015թ. Մոսկվայում հաղթանակի շքերթին մեր զորախումբը ՌԴ պաշտպանության նախարար Սերգեյ Շոյգուի կողմից ճանաչվել է լավագույնը:

«Մասնագիտական մոտեցումը, սպաների պատրաստվածությունը և զինվորների ցանկությունը»,- գնդապետը սա է համարում իրենց ստորաբաժանման հաջողությունների բանալին: