Ադրբեջանը և Թուրքիան ռազմական ինքնաթիռներ կգնեն Պակիստանից

Բաքվում երեք երկրների արտաքին գործերի նախարարների հանդիպումներից հետո ադրբեջանցի նախարարը հայտարարել է, որ Ադրբեջանը Պակիստանի հետ շուտով պայմանագիր է կնքելու՝ ուսումնամարտական ինքնաթիռներ գնելու համար։ Ադրբեջանցի գործընկերոջից հետ չմնալով՝ թուրք գործընկերն էլ հայտարարել է, որ իրենք էլ են մտածում այդ ինքնաթիռներից գնելու մասին։

Ուսումնամարտական ինքնաթիռները

Ենթադրվում է, որ խոսքը Պակիստանում արտադրվող MFI-395 Super Mushshak ինքնաթիռների մասին է (լուսանկարում), որոնք նախատեսված են օդաչուների մարզումների համար։ Ադրբեջանի կողմից այս ինքնաթիռները գնելու մտադրության մասին հայտարարություններ եղել են նաև նախկինում։ Հուլիսին պակիստանյան կայքերից մեկը նույնիսկ հայտնել էր, որ 10 ինքնաթիռի գնման մասին պայմանագիրն արդեն կնքվել է։

Ինչ վերաբերում է Թուրքիային, ապա վերջինս ունի սեփական արտադրության ուսումնամարտական ինքնաթիռներ, և Պակիստանից նույն տիպի ինքնաթիռներ գնելու մտադրությունը տրամաբանական չէ։ Սակայն մայիսին տեղեկություն է եղել, որ Թուրքիան արդեն ստորագրել է Պակիստանից 52 միավոր MFI-17 Super Mushshak ինքնաթիռ գնելու պայմանագիր։ Ավելին, դրան զուգահեռ Թուրքիան սեփական ավիապարկից ավելի հին ինքնաթիռների պահեստամասեր էր նվիրել Պակիստանին, ինչը, ենթադրաբար, փոխադարձ գործարք էր։

Պակիստանում այս ինքնաթիռներն արտադրվում են 1980-ական թվականներից՝ Շվեդիայի արտոնագրով։ Փաստացի սրանք շվեդական MFI-17 Supporter ինքնաթիռի տարբերակներն են։ Պակիստանն այս ընթացքում կարողացել է իր արտադրած ինքնաթիռներն իրացնել մերձավորարևելյան երկրներում. իրենց օդուժի համար այս ինքնաթիռներից գնել են Իրանը, Իրաքը, Սաուդյան Արաբիան և այլն։

Այլ ռազմական համագործակցություն

Ադրբեջանի, Թուրքիայի և Պակիստանի արտգործնախարարների՝ Բաքվի հանդիպմանը ստորագրվել է նաև համատեղ հայտարարություն, որում երկու տողով հիշատակվում է նաև ռազմական ոլորտի համագործակցությունը.

«[Նախարարներն] ընդգծել են ռազմական և անվտանգության ոլորտների կարևորությունը և իրենց պատրաստակամությունն են հայտնել ակտիվ համագործակցել այս դաշտում»։

Տնտեսական ու ենթակառուցվածքային համատեղ ծրագրերին նվիրված մեծ-մեծ պարբերությունների կողքին ռազմական ոլորտի նման խղճուկ հիշատակումն առանձնապես դեր չի խաղում։ Սրան, սակայն, որոշակի կշիռ է տալիս հանդիպումից հետո Պակիստանի նախարարի հայտարարությունը, ըստ որի՝ երեք երկրները կարող են ստեղծել ռազմարդյունաբերական ոլորտի համատեղ ձեռնարկություններ։ Նախարարի խոսքը մեջբերում են ադրբեջանական լրատվամիջոցները։

Թուրքիան և Պակիստանը զգալի դիրքեր ունեն ռազմարդյունաբերական ոլորտում։ Թուրքական մի քանի ընկերություն աշխարհի 100 խոշորագույն ռազմարդյունաբերողների ցանկում է, իսկ Պակիստանին այս ոլորտում աջակցում է նրա «թշնամու թշնամի» Չինաստանը։

Եռյակում ավելի նվազ զարգացած է Ադրբեջանը, որն իր սպառազինության մեծ մասը ներկրում է Ռուսաստանից և Իսրայելից։ Հավանական է, որ նմանատիպ համատեղ ծրագրերով Թուրքիան և Պակիստանը պարզապես մտածում են մուտք գործել ադրբեջանական շուկա՝ իրենց արտադրանքը ներկայացնելով համատեղ արտադրության անվան տակ։