Արամ Ա. Կաթողիկոս Խոհրդակցեցաւ Սուրիոյ Հարցով ՄԱԿ-ի Հետ

7 Հոկտեմբերին, Արամ Ա. կաթողիկոսը Ժընեւի մէջ երկար հանդիպում մը ունեցաւ Սուրիոյ հարցով Միացեալ Ազգերու կազմակերպութեան (ՄԱԿ) պատասխանատու խմբակին հետ՝ ընդառաջելով անոնց փափաքին: Խմբակին ղեկավարը՝ Ճ. Փիթերսոն հանդիպումէն առաջ անակնկալ կերպով ճամբորդած ըլլալով, հանդիպումին ներկայ եղան իր փոխանորդը եւ անմիջական խորհրդականը: Անոնք վեհափառին յայտնեցին, որ 30 Հոկտեմբերին սկիզբ պիտի առնեն Սուրիոյ նոր սահմանադրութիւն մշակելու առաքելութեան լծուած մարմինին ժողովական աշխատանքները, Ժընեւի մէջ:

Յիշեալ մարմինը պիտի բաղկանայ 150 սուրիացի անդամներէ: Այս մարմինը պիտի ունենայ ներկայացուցչական հետեւեալ պատկերը՝ 50 ներկայացուցիչներ կառավարութենէն, 50՝ ընդդիմադրութենէն եւ 50՝  քաղաքացիական հասարակութենէն (համայնքներ, կազմակերպութիւններ, միութիւններ, կրօններ եւ այլն): Մարմինը պիտի ունենայ իր գործադիր վարչութիւնը՝ բաղկացած 45 անդամներէ՝ 15՝ կառավարութենէն, 15՝ ընդդիմադրութենէն եւ 15՝ քաղաքացիական հասարակութենէն:

ՄԱԿի գրասենեակի պատասխանատուները յիշեցուցին, որ այս որոշումը առնուած էր ՄԱԿի Ապահովական խորհուրդին կողմէ (թիւ 2254) եւ կը վայելէ զօրակցութիւնը Ռուսիոյ, Իրանի, Թուրքիոյ եւ, բնականակաբար, Սուրիոյ կառավարութեան:

150 անձերէ բաղկացած մարմինին անդամներուն անունները շուտով պիտի հրապարակուին ՄԱԿի կողմէ: Յատուկ աշխատանք պիտի տարուի, որ նոյն մարմինին մէջ ըլլան նաեւ իրաւաբաններ, իգական սեռի պատկանողներ, կառոյցներու ներկայացուցիչներ, որպէսզի գործընթացքը ըլլայ համասուրիական, ինչպէս նաեւ Սուրիոյ կողմէ նախաձեռնուած ու ղեկավարուած:

Կաթողիկոսը լսելէ ետք պատասխանատուներուն կողմէ տրուած լայն զեկոյցը եւ իմանալէ ետք ցարդ պատրաստուած ցանկին մէջ հայու մը ներկայութիւնը՝

1. Ողջունեց Սուրիոյ համար նոր սահմանադրութիւն խմբագրելու գործընթացը՝ զայն նկատելով առաջին գործնական քայլը Սուրիան դէպի ամբողջական խաղաղութիւն առաջնորդող: Այս ծիրին մէջ հայրապետը շեշտեց Սուրիոյ հողային ամբողջականութիւնը պահելու հրամայականը, որ պէտք է յստակօրէն երաշխաւորուի սահմանադրութեամբ:
2. Քրիստոնեայ համայնքներուն մասնակցութիւնը յիշեալ գործընթացին նկատեց յոյժ կարեւոր՝ որպէս անբաժան մասը սուրիացի ժողովուրդին ու հայրենիքին: Ան ըսաւ, որ համայնքներու ներկայացուցիչները պէտք է նշանակուին պատասխանատուներուն կողմէ եւ իրենց ամբողջական ու գործօն մասնակցութիւնը բերեն այս կարեւոր գործընթացին: Այս ծիրին մէջ վեհափառը շեշտեց մէկէ աւելի հայ ներկայացուցիչներ ունենալու անհրաժեշտութիւնը՝ յիշեցնելով, որ հայ համայնքը Սուրիոյ քրիստոնեայ կարեւոր համայնքներէն մէկն է:
3. Որպէսզի մարմինին, ինչպէս նաեւ գործադիր վարչութեան աշխատանքները ըլլան կազմակերպ, ներդաշնակ եւ հետեւողական՝ կաթողիկոսը առաջարկեց, որ աշխատանքի մեթոտ, ժամանակացոյց եւ ուղեցոյց ճշդուի:

Ողջունելով վեհափառին մտածումները ու թելադրութիւնները՝ գրասենեակի պատասխանատուները առաջարկեցին, որ գրասենեակը խորհրդակցութեան ճամբով մնայուն կապ պահէ կաթողիկոսին հետ:

Այս ծիրին մէջ առաջարկուեցաւ հանդիպում մը ունենալ յառաջիկայ օրերուն, Անթիլիասի Մայրավանքին մէջ: