ՍԴ-ն ԱԺ-ի նկատմամբ դրսևորել է անհարգալից վերաբերմունք, որը արձագանք կստանա. Մակունց

«ՍԴ-ն, ըստ էության, չի տվել պատասխան ԱԺ-ի ներկայացված այն հարցադրումներին ու մտահոգություններին, որոնք պետք է փարատվեին կամ հաստատվեին, այսինքն` ՍԴ-ն որոշում է կայացրել ու թողել առկախված և դրանով ԱԺ-ի նկատմամբ, իմ գնահատմամբ, դրսևորվել է անհարգալից վերաբերմունք, որը արձագանք կստանա»,- լրագրողների հետ զրույցում, անդրադառնալով ՍԴ-ի և Հրայր Թովմասյանի շուրջ եղած վերջին զարգացումներին, ասաց ՀՀ ԱԺ «Իմ քայլը» խմբակցության ղեկավար Լիլիթ Մակունցը:

Լիլիթ Մակունցը հիշեցրեց, որ «Իմ քայլը» նախագիծը ներկայացնելիս նշել էր, որ առաջնորդվելու են դատաիրավական համակարգի բարեփոխումների պլանով և չեն կապելու Հրայր Թովմասյանի նախագիծը համապարփակ մոտեցումների, լուծումների հետ:

Ինչ վերաբերում է հետագա քայլերին, Մակունցն ասաց, որ արձանագրել են մի փաստ, որով ՍԴ-ն ոչ միայն պատրաստ չէ և չի ուզում լուծումներ տալ առկա խնդիրներն, այլև չի ուզում քննարկել դրանք` այդպիսով ավելի խորացնելով վստահության ճգնաժամը, որ կա ՍԴ-ի նկատմամբ:

«Մեր գործողությունները շարունակելու են մնալ նույնը, ինչ նախկինում էր: Մենք մեր առջև խնդիր չէինք դրել այս նախագծով լուծել ՍԴ շուրջ ստեղծված ճգնաժամը, այս խնդիրը բացարձակապես կապ չունի մեր համապարփակ մոտեցումների հետը: Մենք շարունակելու ենք մեր այն պլանով, որ ներկայացված է թե´ նախարարության կողմից՝ ռազմավարական փաթեթով, բայց նաև չի սահմանափակվելու միայն այդ փաթեթով: Մեր առանձին քայլերի մասին կտեղեկացնենք և դրանք կլինեն այն փուլում, երբ հրապարակման ենթական կլինեն»,- ասաց Մակունցը:

Նա նաև տեղեկացրեց, որ արդարադատության նախարարության և ԱԺ համատեղ աշխատանքի արդյունքում նախատեսում են վաղաժամ կենսաթոշակի փաթեթն ընդունել: