Նոր Հայաստանում Հյուսիսային պողոտայի պատմություն չի կարող լինել. Փաշինյան

ԱԺ «Իմ քայլը» խմբակցության անդամ Գևորգ Պապոյանը հոկտեմբերի 23-ին խորհրդարանում կառավարությանը դիմելով՝ բարձրաձայնեց Ֆիրդուսի 17 շենքի բնակիչների մտահոգությունը: Պապոյանը նշեց՝ վերջիններիս թաղամասը 2007-ից համարվում է իրացման գոտի, իրենք սահմանափակված են իրենց գույքը օգտագործելու հետ կապված գործողություններում: Քաղաքացիները դժգոհել են, որ վերջին ամիսներին օտարող կազմակերպության ներկայացուցիչներ են եկել, բանավոր առաջարկել են գին, որին քաղաքացիները համաձայն չեն, սակայն հակառակ պարագայում նրանց կվռնդեն այդ տարածքից: Պատգամավորն ասաց՝ քաղաքացիները վախենում են, որ կկրկնվի Հյուսիսային պողոտայի ճակատագիրը:

Հարցին արձագանքեց ՀՀ վարչապետ Նիկոլ Փաշինյանը:

«Այն, որ Հյուսիսային պողոտայի պատմություն չի կարող լինել նոր Հայաստանում, պարզ է: Այդ հարցերով զբաղվում է փոխվարչապետ Ավինյանը, որը հիմա Վրաստանում է: Նամակը փոխանցեք, մենք համապատասխան ընթացք կտանք, բայց քաղաքացիների իրավունքները կպաշտպանվեն: Ես հիմա չեմ ուզում բացարձակ հայտարարություն անել, իրացման գոտու շրջանակներում բավական մեծ թվով տարածքներ արդեն իրացվել են, եթե ուսումնասիրեք, կտեսնեք, որ գների էական և շոշափելի փոփոխություններ են տեղի ունեցել, սա առաջին ահազանգն է վերջին շրջանում, որ այդտեղ ինչ-որ բան այն չէ, այդ հարցին մենք անպայման կանդրադառնանք»,- ասաց նա:

Ընձեռված հնարավորությունից օգտվելով՝ վարչապետը նաև լրացումներ արեց Էդմոն Մարուքյանի ուղղած հարցադրմանը իր տված պատասխանում:

«Ես չհասցրի երկու կարևոր արձանագրում անել: Ասացի, որ ավանդույթով եկել է՝ այդ կարգի որոշումները գաղտնիությամբ են անում, դա կապված է կոնկրետ իրավական որոշման հետ: Անձնական տվյալների պաշտպանության գործակալության դիրքորոշման համաձայն՝ պարգևավճարները անձի անձնական տվյալ են: Թեպետ Արդարադատության նախարարն ասում է, որ անձամբ դրա հետ համաձայն չէ, բայց, քանի որ իրավական որոշումներ կան, որոշում կայացնելիս պետք է իրավական որոշումների շրջանակում մնանք: Քանի դեռ դրանք չեն փոխվել, աշխատանքային խումբ է ձևավորվել կառավարությունում, որ հանրային ծառայության և ընդհանրապես քաղծառայության ամբողջ համակարգը բարեփոխելու փաթեթ է պատրաստվում, նաև այն պատճառով, որ այս պահին եղած կարգավորումները հաճախ չեն համապատասխանում այն պահանջներին և իրողություններին ու հրամայականներին, որ գոյություն ունեն»,- նշեց վարչապետը:

Մանրամասները` տեսանյութում: