Ո՞րն է ամենավստահելի հեռուստաընկերությունը, ո՞վ է ամենահամակրելի քաղաքական գործիչը. սոցհարցում

«Շանթը» հայաստանյան մեդիադաշտի ամենավստահելի հեռուստաընկերությունն է: «Իրազեկ քաղաքացիների միավորումը» և «Հասարակական հետազոտությունների առաջատար խումբն» այսօր ներկայացրել են հայաստանյան մեդիայի սպառման և ապատեղեկացվածության մակարդակի ուսումնասիրության արդյունքները։

Սոցհարցումներն իրականացվել են  Հայաստանի բոլոր մարզերում և Երևանում՝ ընդհանուր թվով 1200 բնակչի շրջանում: Պարզվել է, որ որպես տեղեկության ստացման հիմնական աղբյուր՝ համացանցն ու հեռուստատեսությունը հավասար մրցակից են: Հարցվածների մոտ 36 տոկոսը տեղեկություններ ստանում է համացանցից, գրեթե նույնքան էլ հեռուստատեսությունից: Իսկ ահա ռադիոյից ու տպագիր թերթերից ինֆորմացիա ստացողների թիվը համապատասխանաբար 3,7 և 1,5 տոկոս է:

Հարցվածների 87 տոկոսը դիտում է հեռուստացույց: «Հիմնականում ո՞ր ալիքներն են նախընտրում դիտել» հարցին՝ ամենամեծ՝ 24,6 տոկոսը պատասխանել է «Շանթ», նույն տոկոսն ունի հայաստանյան ևս մեկ  հեռուստաընկերություն:

Իսկ ահա վստահելիության առումով «Շանթ»-ը միանձնյա առաջատարն է: Հարցվածների 26,6 տոկոսը վստահում է «Շանթ»-ին, այս թիվը 5,1-ով ավելին է երկրորդ տեղը զբաղեցրած հեռուստաընկերությունից:

Ի դեպ,  կազմակերպությունը, որն իրականացրել է հարցումներն ու հետազոտությունները, համարվում է այդ ոլորտում լավագույններից մեկը:

«Շանթ»-ի պարագայում այս նոր ուսումնասիրության արդյունքը նախորդների տրամաբանական շարունակությունն է: Հիշեցնենք նախորդ երեք նմանատիպ ուսումնասիրությունների արդյունքները: Հոկտեմբերի կեսերին հրապարակվեց  բարեփոխումները  լավագույնս լուսաբանող  հեռուստաընկերությունների վարկանիշը, որտեղ, ինչպես 2015-ին և 2017-ին, այնպես էլ այս տարի առաջին տեղում «Շանթ»-ն էր:

Հեռուստատեսության և ռադիոյի հանձնաժողովը հունիսին և սեպտեմբերին  եռամսյակային ուսումնասիրությունների արդյունքներ հրապարակեց, ըստ որոնց՝ լրատվական ծրագրերի առաջատարն ու ամենաբարձր վարկանիշ ունեցողը երկու դեպքում էլ «Շանթ»-ն էր:

Այս վերջին ուսումնասիրությունն իր տեսակով ավելի խորն է: Կան ոչ միայն մեդիադաշտի, այլև իշխանական ու պետական կառույցների, առանձին քաղաքական գործիչների, կուսակցությունների, ժողովրդագրության ցուցանիշների վարկանիշային ուսումնասիրություններ, նաև դրանց համեմատությունները նախորդ իշխանությունների ժամանակ արված հարցումների արդյունքների հետ: Օրինակ, հարցին՝ «Հնարավորություն ունենալու դեպքում արդյոք կմեկնե՞ք Հայաստանից մշտական բնակության», 59,4 տոկոսը պատասխանել է՝ «միանշանակ, ոչ», այն դեպքում, երբ 2017-ին նույն հարցին նույն պատասխանը տվել էր հարցվածների 37 տոկոսը:

«Պետական քաղաքական գործիչներից ո՞ւմ եք համակրում» հարցին 54,8 տոկոսը պատասխանել է՝ նշելով  Նիկոլ Փաշինյանի անունը, 19,5 տոկոսը՝ նախագահ Արմեն Սարգսյանի անունը:

Համակրողներ ունեն նաև, օրինակ, Արմեն Աշոտյանն ու Էդուարդ Շարմազանովը՝ յուրաքանչյուրը հարցվածների 1,1 տոկոսը: Կառույցներից ու քաղաքական գործիչներից առավել շատ՝ մոտ 60,4 տոկոսը վստահում են զինված ուժերին, հետո վարչապետին՝ 52,8 տոկոս, և նախագահին՝ 45,5 տոկոս: Հարցվածների ամենամեծ մասը կարծում է, որ ամենաբարեկամական վերաբերմունքը Հայաստանի հանդեպ ունեն Ֆրանսիան, հետո Ռուսաստանն ու Պարսկաստանը: