Արդյո՞ք Գյումրիի մանկապարտեզներում ևս երկարօրյա խմբեր կգործեն

Արդյո՞ք Գյումրիի մանկապարտեզներում ևս աշխատող ծնողների համար երկարօրյա խմբեր ունենալու անհրաժեշտություն կա: Հարցը քննարկման արժանացել է, արդեն կա նախագիծ, որը դեռ փոփոխությունների է ենթարկվում: Այս մասին հայտնում է SHANTNEWS.am-ի թղթակիցը։

Ամեն ինչ նախնական է, բայց արդեն հասցրել է ծնողների ու դաստիարակների շրջանում խոսակցությունների թեմա դառնալ: Երկարօրյա խմբերի անցումով ֆինանսական ինչ հավելյալ ծախսեր կպահանջվեն բյուջեից, արդյո՞ք երեխայի երկու ժամ ավելի մնալու դիմաց վարձավճարի չափ չի ավելանա, կամ ինչքանո՞վ են պատրաստ դաստիարակները հավելյալ աշխատաժամով աշխատել: Սրանք քննարկվող հարցեր են, որոնց հստակեցումից է կախված որոշում ունենալը:

Բոլոր մանկապարտեզներում կան այսպիսի օրինակներ, երբ ծնողն ուշանում է երեխային վերցնել մանկապարտեզից աշխատանքի պատճառով։ Աշխատող ծնողների ու մանկապարտեզի աշխատանքային գրաֆիկը շեղումներ ունի: Մանկապարտեզում շուտ է ավարտվում աշխատանքը, ծնողներինը` ուշ։ Ծնողական խորհուրդներում սա հաճախ բարձրաձայնվող հարց է, առաջարկություններ միշտ եղել են, որ պետք է մանկապարտեզներում պահել գոնե մեկ-երկու երկարօրյա խումբ:

Գյումրիի 24 մանկապարտեզներից, սակայն, 9-ում է երկարօրյա խմբեր պահելու անհրաժեշտություն  առաջացել։ Այս տվյալները փաստացի տեղեկանք է կրթության բաժնի ձեռքին, թեև ոչ իրական պատկերը, որ 9 մանկապարտեզից բացի, մյուսներում աշխատող ծնողների երեխաներ չեն հաճախում:

«Անի» մանկապարտեզն այդ ցանկում է, որի 180 սաներից 40 տոկոսի ծնողներն աշխատանքային խիստ գրաֆիկ ունեն և երկարօրյա խմբակի անհրաժեշտության կարիք զգում են: Մանկապարտեզի տնօրենն իր աշխատախմբով համաձայն է ժամը 17։00-ի փոխարեն աշխատել մինչև ժամը 19.00-ն, եթե  ծախսային ու այլ հարցեր հստակեցվեն:

Հավելյալ աշխատաժամը ենթադրում է, որ աշխատավարձերի նոր հաշվարկ լինելու է, անկախ նրանից, թե մանկապարտեզը  հավելյալ աշխատուժ կներգրավի՞, թե՞ եղած աշխատողների միջև ժամաբաշխում կկատարի: Գումարի ու դրույքաչափի նախնական հաշվարկներ երկու ժամից ավելի աշխատանքի դիմաց արդեն քաղաքապետարանն արել է:

«Հաստիքներ են ավելանալու, բնականաբար, ու մենք տարեկան կտրվածքով հաշվարկել ենք` յուրաքանչյուր մանկապարտեզում երկարօրյա խմբերի համար 5,5 դրույք դաստիարակի համար է ավելանալու, 18,6  դրույք` տնօրենի, դաստիարակի օգնականի, խոհարարի, խոհարարի օգնականի, բուժքրոջ։ Այս թիվը տարեկան կտրվածքով է, ու սա հաստիքների հանրագումարն է։ Բայց դեռ հստակ չէ, թե նոր աշխատողներ կընտրվե՞ն, թե՞ ոչ»,- այս մասին SHANTNEWS.am-ի հետ զրույցում ասել է Գյումրիի քաղաքապետարանի կրթության բաժնի գլխավոր մասնագետ Աստղիկ Դարբինյանը։

Տարեկան հաշվարկով դրույքաչափերի ավելացումը տարբեր է լինելու տնօրենի, դաստիարակի, դայակի, խոհարարի, բուժքրոջ համար: Հավելյալ գումարների նախատեսումը աշխատավարձերի մասով չէ միայն: Հավելյալ ծախսեր կան, որոնց համար տեղական բյուջեից բացի, ծնողներն են վճարում, տվյալ դեպքում խոսքը մեկ երեխայի հաճախման համար սահմանված վարձի մասին է:

««Անի» մանկապարտեզում վարձավճարը 8000 դրամ է կազմում, որից 6000-ը սննդի համար է նախատեսվում, 2000 դրամը` կոմունալ ծախսերի։ Հիմա, երբ հավելյալ 2 ժամ է ավելանում, ստացվում է, որ 1 ընթրիք պետք է ավելանա, այսինքն` մենք հաշվարկել ենք` յուրաքանչյուր 1 սանի համար 100 դրամ կավելանա սննդի համար, 30 դրամ` կոմունալի»,- այս մասին SHANTNEWS.am-ի հետ զրույցում ասել է« Անի» մանկապարտեզի տնօրեն Արփինե Արաքչյանը։

Հաշվարկների վերջնարդյունքում համապատասխան նախահաշվով մինչև տարեվերջ ակնկալում են, որ կունենան նախագիծ: