Գյումրիում ճանապարհատրանսպորտային պատահարների թիվն աճել է

Երեկո, կիսադատարկ փողոցներ ու վարորդների համար մեքենայի շարժիչի հզորությունն ու արագությունը միմյանց հետ գրազով փորձելու հարմար առիթ: Նման անվերահսկելի վիճակները Գյումրիի փողոցներում ու հրապարակներում վերջին մեկ ամսում բազմաթիվ են: Հարթ, ասֆալտապատ փողոցներում վազանցներն ու արագության գերազանցումները միշտ չէ, որ լավ ավարտ են ունենում:

Ամփոփ տվյալներն էլ, նախորդ տարվա համեմատությամբ, թույլ են տալիս ասել, որ պատահարների թիվն ավելացել է:

«Հիմնականում մարմնական վնասվածքներով վթարների թիվն է շատացել, օրինակ` 2018 թվականի հոկտեմբերին 33 վթար է գրանցվել, 3 զոհ, 40 վիրավոր, իսկ այս տարվա հոկտեմբերին` 41 վթար, 4 զոհ, 54-ը տարբեր մարմնական աստիճանի վնասվածքներ է ստացել»,- SHANTNEWS.am-ի հետ զրույցում ասել է ՃՈ 2-րդ սպայական գումարտակի, 2-րդ վաշտի հետաքննության տեսուչ Արմեն Պողոսյանը։

Նախկին պատճառաբանությունը, թե վթարների պատճառը քարուքանդ փողոցներն են, փոխարինվել է նորով: Հիմա էլ առանց փոսերի, ասֆալտապատ փողոցներն են «մեղավոր», որ վրաերթ, վթար, արագության գերազանցում, միասին կարելի է տեսնել: Նոր տեղադրված երթևեկության նշաններն էլ դեռ չեն օգնում` դրանց հետևող վարորդների թիվը չի ավելանում, չեն ենթարկվում երթևեկության փոփոխված սխեմային:

«Փոխվեց որոշ հատվածների ու հրապարակների շրջանաձև երթևեկության սկզբունքը, ճանապարհաշինական աշխատանքներից հետո էլ փողոցները նշաններով են կահավորվում։ Վթարների հիմնական պատճառն էլ նորակառույց փողոցներում արագության գերազանցումն է, վարորդներից շատերն էլ միմյանց զիջելու կուլտուրա չունեն»,- ասել է Արմեն Պողոսյանը։

Պատահարների մեջ հետիոտների մեղավորություն էլ ճանապարհային ոստիկանները չեն անտեսում` փողոցը հատում են անկանոն: Նորոգված փողոցներն ունեն հետիոտների համար նախատեսված անցումներ՝ իրենց համապատասխան լուսացույցներով:

Ամեն տարի ճանապարհային երթևեկության նշաններով փողոցները զինելու համար տեղական բյուջեն գումարներ  է հատկացնում: Գումարի չափն էլ կախված է կահավորվող  փողոցների քանակից: Օրինակ` այս տարի 10 մլն դրամ է արժեցել  երթևեկության շուրջ 300 նշանի ձեռքբերումը:

«Տեղական բյուջեով ձեռք բերած նշանները հիմնականում տեղադրվելու են բանուկ փողոցներում և երկրորդականներում։ Եղածները հիմնականում մաշված են: Մենք մաշվածները փոխարինում ենք նորերով: Մենք խորհրդակցում ենք ՃՈ-ի հետ»,- այս մասին SHANTNEWS․am-ի հետ զրույցում ասել է Գյումրիի կոմունալ ծառայության տնօրենի տեղակալ Արման Շաբոյանը։

Լայնածավալ ծրագրով այս տարի նորոգված փողոցների երթևեկության նշաններով, գծանշումներով ու լուսացույցներով կահավորումն առայժմ ճանապարհաշինական ընկերության աշխատանքների շրջանակներում է, մեկ տարով երաշխիքային ժամկետից հետո այն կփոխանցվի կոմունալ ծառայությանը։

Ասֆալատապատ նոր փողոցներում հայտնվել են նոր` թվային լուսակիրներ: Հներից տարբերվում են ոչ միայն արտաքին տեսքով, նաև աշխատանքի նոր սխեմայով` վառ լուսավորությամբ, ինչն աչքի ընկնող է հատկապես երեկոյան ժամերին: Նոր լուսակիրներ առայժմ կունենան միայն նորոգված փողոցները, մյուսներին կանդրադառնան հաջորդ տարում, երբ 4 տասնյակից ավելի փողոցներում նոր շինարարություն կսկսվի: