Սահմանադրական հանրաքվեի նախնական ընտրացուցակով քանի՞ ընտրող կա Գյումրիում

Դպրոցներ, բուհեր, նախակրթարաններ ու մշակութային հաստատություններ։ Այն կառույցներն են, որոնք բոլոր ընտրությունների ժամանակ վերածվում են ընտրատեղամասերի, մի բան, որ անփոփոխ է մնում բոլոր ընտրությունների ժամանակ։

Փոփոխությունները հանձնաժողովի կազմերում են և ընտրացուցակներում։ Նախնական ընտրացուցակներն արդեն տեղամասերում փակցված են, որոնք մինչև ապրիլի 5-ը ճշտումների են ենթարկվելու: Գյումրիի պարագայում դժվար է ընտրացուցակներում անճշտությունները նվազագույնի հասցնելը: Խնդիրը հիմնականում տնակային անկանոն ու փոփոխվող հասցեներն են: Մշտական հաշվառում տնակային հասցեով երկու տարի է` անձնագրային բաժանմունքները չեն կատարում, իսկ ժամանակավոր հաշվառումը միայն ընտրությունների համար է թույլատրվում:

«Մենք որոշեցինք այդ մարդկանց հնարավորություն տալ հաշվառվել տվյալ տնակի փողոցով, այսինքն` ենթադրենք, թե տնակը գտնվում է Ղանդիլյան N հասցեում, մենք իրեն հաշվառում ենք միայն փողոցի հասցում ու լրացուցիչ ցուցակով»,-SHANTNEWS.am-ի թղթակցի հետ զրույցում ասել է Գյումրիի «Կումայրի» անձնագրային բաժանմունքի պետ Ջուլիետա Քալաշյանը։

Միայն փողոցի անվանումով ժամանակավոր հաշվառում ունեցող ընտրողները կընդգրկվեն լրացուցիչ ցուցակներ։ Նրանք այն քաղաքացիներն են, որոնք որևէ տեղ գրանցում և հաշվառում չունեն։ Տնակային հասցեների հարուցած մյուս խնդիրը վերաբերում է հետևյալին ՝ տնակը քանդված է, իսկ քաղաքացին շարունակում է հաշվառված մնալ գոյություն չունեցող տնակում, բայց բնակվել մեկ այլ հասցեում: Նման կարգավիճակում հայտնված ընտրողները մինչև մարտի 26-ը ժամանակ ունեն հստակեցնելու ընտրության վայրը և այս դեպքում դիմելու են անձնագրային բաժանմունքներ։

Բոլոր ընտրություններից առաջ ընտրացուցակներ ճշտելու, կազմելու գործընթացում դժվար կարգավորվող հարցերից մեկը  մահացածների անունները բացառելն է։ Անձնագրային բաժանմունքներին այդ մարդկանց մասին տվյալների բազան տրամադրում են թաղման բյուրոները։ Տրամադրած տվյալների հիման վրա էլ անձնագրային բաժանմունքները ցուցակներից դուրս են բերում մահացածների անունները, բայց լիարժեք մաքուր ցուցակներ ունենալ չի ստացվում. սա էլ իր պատճառներն ունի։

«Ենթադրենք` մարդը մահացել է արտերկրում և այնտեղ էլ հուղարկավորվել է, մենք ո՞նց պիտի իմանանք, եթե ոչ մի իրավասու մարմնից չունենք փաստաթուղթ այդ մասին, որ կարողանանք հաշվառումից դուրս հանել, տեսուչները այցելում են տներ, մենք իրենց ունեցած տվյալների հիման վրա էլ նոր կարողանում ենք ճշտումներ անել»,- ասել է Ջուլիետա Քալաշյանը։

Նախնական ընտրացուցակներով Գյումրին ունի 123 հազար 854 ընտրող. թիվը փոփոխություն ամեն դեպքում կկրի: Դա կախված է, թե ինչքան մարդ մինչև ընտրությունները կհաշվառվի կամ հաշվառումից դուրս կգա: Ընտրացուցակներում իրենց անուն-ազգանունը փնտրել-գտնելու մոտ մեկ ամիս ժամանակ կա։

Վերջնական ընտրացուցակով ընտրողների թիվը տեղամասերը կունենան հանրաքվեից 3 օր առաջ: Մինչև  վերջնական տարբերակը ևս երկու նախնական փուլ էլ անցնելու է ընտրացուցակների ճշտումները։ Մարտի 16-ին և մարտի 26-ին անձնագրային բաժանմունքներն ունենալու են մաքրված ցուցակներ: Մինչև հանրաքվե անձնագրային բաժանմունքները աշխատելու են այլ գրաֆիկով։ Շաբաթվա վեց օրն աշխատանքային է, ու մինչև ժամը 20։00-ն: