«Արի տուն»-ը և մի շարք այլ ծրագրեր հետաձգվում են՝ կոռուպցիոն ռիսկերի պատճառով

«Առնվազն չենք բացառում, որ 2018թ.-ի պետբյուջեով հաստատված մի շարք ծրագրերում, որ դեռևս չեն իրականացվել, սակայն արդեն անցկացվել են համապատասխան մրցույթներ, կարող են առկա լինել կոռուպցիոն ռիսկեր», – այս մասին հունիսի 5-ին լրագրողների հետ հանդիպման ժամանակ ասել է Սփյուռքի նախարար Մխիթար Հայրապետյանը:

Հունիսի 17-ին պետք է մեկնարկեր «Արի տուն» ծրագիրը, այնուհետև «Ամառային դպրոց» և «Իմ Հայաստան» ծրագրերը, սակայն  այս ծրագրերի իրականացումը նախարարը հետաձգում է՝ ժամանակ հատկացնելով ուսումնասիրություններին և ստեղծված կասկածները փարատելու համար: Մխիթար Հայրապետյանը նաև ներկայացրել է այն փաստերը, որոնք կասկածի առաջացման հիմք են դարձել:

«Իմ հանձնարարականով ուսումնասիրվեցին նախորդ տարիների տենդերների և առաջին եռամսյակի գործունեությունը և պարզվեց, որ տարիենր շարունակ, առնվազն վերջին 3 տարիներին, հիմնականում տենդերը շահել են նույն կազմակերպությունները ու ՍՊԸ-ները: Անունները կհրապարակվեն ՊՎԾ ուսումնասիրություններից հետո, որ դրանք հիմնարար փաթեթով ներակայացնեմ հանրությանը», – ասել է նախարարը և բերել կոնկրետ օրինակներ:

Օրինակ, 2016-ին նույն կազմակերպությունը շահել է 10-ից ավելի մրցույթում, 2017-ին՝ 8, 2018-ին նույն կազմակերպությունը շահել է 7 մրցույթ: Այս պահին որևէ փաստ չկա, սակայն, ըստ նախարարի, կան խոսակցություններ, որ այդ ՍՊԸ-ների մի մասը անմիջական կապ են ունեցել «Հայաստան-Սփյուռք» ՊՈԱԿ-ի նախկին ղեկավարության ու աշխատակիցների հետ:  Չեն ներկայացվել ծանրակշիռ փաստարկներ, որոնք կարող էին փարատել այդ մտահոգությունները:

«Իմ նշանակումով, իմ թիմի ձևավորումով, «Հայրենիք-Սփյուռք» կենտրոնի նոր նշանակումով՝ ի դեմս Հակոբ Ասլանյանի, բոլոր կոռուպցիոն ռիսկերը պետք է բացառվեն: Մենք պետք է ՀՀ քաղաքացուն, ով հարկ է վճարում, լինենք հաշվետու ամեն ծախսված դրամի համար», – նշել է նախարարը:

Նախարարի մոտ կասկած են հարուցել ամառային ճամբարներում սննդի համար իրականացված ծախսերը: Ամեն երեխայի համար սահմանված է մոտ 8000դր՝ 2-անգամյա սննդի համար: Նախարարի խոսքով՝ քրտնաջան աշխատող քաղաքացին, որի վճարած հարկերից է այս գումարը ծախսվում, կարող է հարցնել, թե՝ 4000-ով ի՞նչ լանչ պետք է լինի.

«Գառ պետք է մատուցե՞ն, թե սև խավիար: Միգուցե օրինական առումով կարող ես թույլ տալ նման շռայլություն, բայց հարկատուի վճարած ամեն դրամը պետք է հաշվետու կերպով ծախսվի: Եթե անգամ օրենքը թույլ է տալիս, իմ նշանակումից հետո որևէ նոր մրցույթի պայմաններում չպետք է սահմանվեն առավելագույն թվեր: Նույն մրցույթում լանչը կարելի է սահմանել շատ ավելի մատչելի գներով», – ասել է նախարարը:

Կասկածի տեղիք են տվել նաև հյուրանոցային և տրանսպորտային ծախսերը: Տարիներ շարունակ նույն հյուրանոցն է ընդունել հյուրեր: Գուցե պատճառը մատչելի գներն են, բայց, ըստ նախարարի, պետք է ստուգել:

«Իքս հյուրանոցից մինչև ԵՊՀ 1 կմ է: 1 երեխային տեղափոխել և հետ բերելը հաշված է  1300 դրամ: Ինձ մոտ առաջանում է հարց՝ ի՞նչ չափորոշիչներով է հաստատվել տվյալ գումարը: Անգամ, եթե յուրաքանչյուրին 1 տաքսիով տանում, բերում ես, մինիմալով 1200 է անում, բայց տաքսու մեջ  կարող էր նստել 4 երեխա: Պարզ հաշվարկներ են, որ յուրաքանչյուրին մտածելու առիթ պետք է տա: Թվում է, թե 100 դրամի մասին է խոսքը, բայց արժեհամակարգի մասին է խոսքը: Չեմ ուզում ասել՝  փողեր մսխելու մասին է խոսքը, բայց դա էլ չի բացառվում: Թվում է, թե մեծ գումար չէ, բայց որ բազմապատկեք 1000-ներով, 10 000-ներով, կտեսնեք թե ինչ գումարների մասին է խոսքը», – հայտարարել է նախարարը: