Հայաստանը որոշակիորեն բարելավել է դիրքը կորոնավիրուսի տարածման համաշխարհային աղյուսակում

Վերջին շրջանում Հայաստանը որոշակիորեն բարելավել է դիրքը կորոնավիրուսի տարածման՝  երկրների և աշխարհագրական տարածքների աղյուսակում:  Մեր երկիրը այժմ զբաղեցնում է 52-րդ հորիզոնականը: Ներկայացնենք վերջին տասը օրերի վիճակագական տվյալների վերլուծությունը:

Սկսենք օրական իրականացվող թեստավորումների և դրական արդյունքների թվերի հարաբերակցությունից: Կորոնավիրուսի տարածման տեմպերը պատկերացնելու համար սա ամենակարևոր ցուցիչն է: Անցած 10 օրում չի եղել մի դեպք երբ դրական թեստերի թիվը գերազանցի ընդհանուր թեստերի թվի 20 տոկոսը: Վերջին օրերին այս դրական միտումն ավելի ակնհայտ է: Երեկ գրանցվել է անցած տասնօրյակի դրական թեստերի նվազագույն տվյալը՝ 11,9 տոկոս: Անցած մի քանի օրերի դրական թեստերի միջինացված թիվը տատանվում է 14-15 տոկոսի սահմաններում, մինչդեռ մոտ մեկ ամիս առաջ այս տոկոսը կրկնակիից ավելին էր: Հունիսի վերջ-հուլիսի սկզբներին օրական թեստավորվածների մոտավորապես 3-ից մեկի մոտ հայտնաբերվում էր կորոնավիրուս: Էականորեն բարելավվել է նաև բուժվածների և գրանցված դեպքերի ընդհանուր թվերի հարաբերակցությունը:

«Այսօրվա դրությամբ՝ Հայաստանում կորոնավիրուսի ընդհանուր դեպքերի թիվը հասել է 40 185-ի, որոնցից 32 395-ը բուժվել են:  Բուժվածները կազմում են վարակվածների ընդհանուր թվի 80,6 տոկոսը:  Փաստացի բուժվողներն այսօրվա դրությամբ 6777 են, ինչը կազմում է վարակվածների ընդհանուր թվի արդեն 16,8 տոկոսը»։

Այս տոկոսը և փաստացի բուժվողների թիվը օրական նվազում է: Այսօրվա տվյալը համադրելի է հունիսի 3-ի, այսինքն՝ մոտ 2 ամիս առաջվա  տվյալի հետ: Այդ երկամսյա միջակայքում էլ կարող ենք փնտրել, այսպես կոչված, պիկը: Այն համընկնում է հուլիսի 5-ի հետ, երբ գրանցվել է փաստացի բուժվողների կամ մահճակալային ծանրաբեռնվածության ամենաբարձր թիվը՝ 11 984: Այժմ բուժվողների թիվը այդ պիկի ցուցանիշից փոքր է մոտ 5200-ով: Վերջին օրերին զգալիորեն նվազել է նաև մահերի թիվը: Այդ ցուցանիշը ընդհանուր դրական միտումների տրամաբանության մեջ է, սակայն դեռ խիստ մտահոգիչ է մնում:

«Հայաստանը մեկ միլիոն բնակչի հաշվով գրանցված մահերի թվով պահպանում է վատագույն ցուցանիշը ասիական տարածաշրջանում: Մեր երկրում մեկ միլիոն բնակչին բաժին է ընկնում 265 մահ: Հայաստանից հետո ասիական տարածաշրջանում վատագույն  ցուցանիշներն ունեն Ղրղզստանը և Իրանը՝ համապատասխանաբար 223 և 216: Իսկ ամբողջ աշխարհում այս ցուցանիշով Հայաստանը 17-րդն է»։

Որոշ գաճաճ պետությունների թվերը չհաշված՝ առաջին տեղում շարունակում է մնալ Բելգիան, որտեղ մեկ միլիոն բնակչին բաժին է ընկնում 851 մահ: Միացյալ Թագավորությունում այդ թիվը 685 է, Պերուում՝ 625, Իսպանիայում՝ 610, Իտալիայում՝ 582, Շվեդիայում՝ 570, ԱՄՆ-ում՝  495, Բրազիլիզյում՝ 469:

Վերադառնանք, սակայն, մեր վիճակագրությանը: Անցած մեկ շաբաթում մահերի թիվը արտահայտվել է միանիշ թվերով: Միջին թիվը մեկ օրում եղել է 5:

Հիշեցնենք, որ մահերի ամենամեծ թիվը՝ 19-ը, գրանցվել է հունիսի մեկին: Այսօրվա դրությամբ՝ Հայաստանում կորոնավիրուսով հիվանդների մահերի ընդհանուր թիվը հասել է 1013-ի և կազմում է հաստատված դեպքերի 2,5 տոկոսը: Սա նշանակում է, որ հետագայում էլ յուրաքանչյուր օր ավելացող դեպքերի 2,5 տոկոսը ավարտվելու է մահով: